10
इस्राएली माणहान इतिहासाह रेन चेतावणी
1 एय बाय बोणहा, मी नाह हुदेत काय तुमू ज्यी वातीह रेन एंजाणल्या रिवो, काय आपणा आखा डायला जुगान नेड़ा एता, एने आखान आखा देरीयान विच माय रेन पार एय गिल्या;
2 तेवी आखा जुगा माय एने देरीया माय मुसान बपतीस्मा लेदाला;
3 एने आखा एकुस आत्मिक खाणो खादाला;
4 एने आखा एकुस आत्मिक पाणी पिदाला; काहाकाय ता माणहे ता आत्मिक सापरा माय रेन पिताला जो तान आरही आरही चालतालो, एने तो सापोर मसी ईतो।
5 पुण बोगवान ता माय रेन मोकतास जाणा पोर खुस नाह ईनो, केरीन ता जेंगला माय मोर गीया।
6 जी वात आमरे केरता किस्सो ठेरायेल काय जीहे ता लालुस किरेल, तिहेस केरीन आपु खाराब चिजीन लालुस नाह केरनु;
7 एने तुमू मुरतीन पुजारा मा बुणो जोहला काय ता माय रेन कोलाक बोण जायेल एता, जोहलो लिखेल हे, “माणहे खाणे पिणे बोठा एने पासाण एक दिहरा हेऱ्यो खाराब काम केरने बाज गीया।”
8 एने आपु सिनालो नाह केरनु, जोहलो ता माय रेन कोलाक जाणे किरेल एता, एने एक दिह्या माय तेवीच एजार मोर गिल्या।
9 एने आपु नाह मालीकाह पारेखणे जुवे जोहलो ता माय रेन कोलाक जाणे किरेल एता, एने गेड़हान द्वारे खेतेम एय गिल्या।
10 एने नाह तुमू कुरकुर जीह केरीन ता माय रेन कोलाक जाणे कुरकुर केरताला, एने मोतीन दुतान द्वारे खेतेम एय गिल्या।
11 पुण ज्यी आखी वात जी ता पोर पोड़नी किस्सान रिती पोर रेन एती; एने ती आमरा इसारान केरता जो दुनियान सेवल्या टेमा माय रेतेह लेखायेल हे।
12 तानकेरता जो कुण सुमजेह काय मी मोजबुत हे, तो हास केरीन रेय काय पोड़ नेवो जाय।
13 तुमू जी बी पारेख माय मा पोड़तेह ती आखा पोर आवणेवाली हे, एने बोगवान खेरो हे, एने तु तुमूह ताकेतीन बाहेर पारेख माय नाय पोड़ने देय, पुण पारेख माय रेन पार एणेन बी वाट देखाड़ी।
14 ज्यानकेरता एय मारा मोंगाल्ला बाय बोणहा, मुरती पुजाह रेन वोचीन रिवो।
15 मी तुमू सोमेजदार सोमजीन तुमूह केथु, जो मी केथु ताह तुमू पारखो।
16 जो वाटको आपु मालीक ने खाणाम वापेरतेह, तान केरता आपु बोगवानाह दन्यवाद केरतेह, एने जेवी केदी आपु ज्याम रेन पितेह, तेवी मसीन लुय माय बेलातेह? एने जेवी आमु रूटो मुड़ीन खातेह, तेवी मसीन सेरीर माय बेलातेह?
17 जिहकेरीन एकुस रूटो हे, तिहेस केरीन आपु बी जा मोकतास हेते, एकुस सेरीर हेते, काहाकाय आपु आखा तास एक रोटा माय होमायेल हेते।
18 जा सेरीर ने वेह माय इस्राएली हेते ताह दिखो, काय चेड़ावो चेड़ायेल खाणारे बोगवानान वेदी माय नाह बेलाते?
19 पुशो मी काय केथु, ज्यो काय मुरती पोर चेड़ायेल काह हे एने काय मुरती काह हे?
20 नाह, पुण जा माणहे बोगवानाह नाह मानतेह, ता चेड़ावो चेड़ावतेह, ता बोगवानान केरता नाह पुण बुतड़ान केरता चेड़ावतेह, एने मी नाह केत काय तुमू बुतड़ान हाती हेते।
21 तुमू बोगवानान सिंगुल एने बुतड़ान सिंगुल दुय माय रेन पिय नाह सेकते, तुमू बोगवानान पाटलु एने बुतड़ान पाटलु दुय माय बेचकाय नाह सेकते।
22 काय आपु बोगवानाह राग लागाड़तेह? एने काय आपु बोगवानाह रेन जादा ताकेतवाला हेते?
23 थोड़ाक माणहे केतेह, “आखी वातु केरनेन सुट हे।” एने दिहरा माणहे केतेह, “आखो काय केरनेन हाजो हे।” पुण सोब वोस्तु माय वोड़ती नाह एणे।
24 सोतान हाजो नाह पुण दिहरान हाजो केरनेन विचार किरो।
25 जो काय खाटेकड़ान जागे वेचाथे, तो खावु, एने मोनान सेंकान कारेण सावाल मा फुसो?
26 काहाकाय देरती एने तीन बोरपुरी बोगवानान हे।
27 केदी बिगेर बोरहावाला माय रेन कुण बी तुमूह नेवता आपी एने तुमू जाणे हुदहो, ते जो काय तुमरे ओंगाण मेली तोच खावु, एने मोनान सेंकान कारेण सावाल मा फुसहो।
28 पुण केदी एगदो तुमूह केय, “ज्यो ते मुरतीह चेड़ायेल वोस्तु हे, ते ता केणारान कारेण एने मोनान कारेण मा खाहो।”
29 मारो मतलब तारो मोन नाह पुण ता दिहरान मोना माय मार आजादी दिहरान विचार केरीन काहा पारखे?
30 केदी मी दन्यवाद केरीन बेचकाथु, ते जा पोर मी उपकार मानथु, तान वोजेसे मारी बदनामी काहा एणे?
31 तानकेरता तुमू खावु पिवो जो काय किरो, तो आखो बोगवानान बोड़ाय ने केरता किरो।
32 तुमू यहुदिन, युनानीन केरता एने बोगवानान मोंडलीन केरता ठोकरान कारेण मा बुणो।
33 जिहकेरीन मी बी सोब वातु माय आखाह खुस मेलथु, एने आपणो नाह पुण मोकतास ने फायदो होदथु, काय ताह सुटकारो जुड़ी।