17
पाप
(मत्ती 18:6,7,22; मरकुस 9:42)
1 ओवतो यीशु तान चेलाह केयो, “ज्य ते एय सिकेह काय थोड़ाक माणहे थोड्युक वातुन केरता पाप नाय केरी, पुण हाय ता माणहा पोर जो ठोकरान कारेण बुणीह।
2 जो कुण ज्या आतल्या माणहाम रेन एकाह पाप केरावी, ते तान गेलाम गेरटीन पुड़ बांदिन देरीयाम जुगार देणे हाजो रेय।
3 तुमू चोकसीम रिवो का काय केरतेह!
“केदी तारो बाहख पाप केरी ते ताह सोमजाड़, एने केदी तार बाहख पासताय ते ताह माफ केर।
4 तो एकुच दिह्याम तार विरोद माय हात वारीन पाप केरी, एने हातु बी वार तार फाय आवीन केय, ‘मी पासताथु,’ ते ताह माफ केर।”
बुरहो
5 तेवी प्रेरित मालीकाह केया, “आमरो बुरहो वोदाड़।”
6 मालीक केयो, केदी तुमरो बुरहो राईन दाणान बाराबोर बी रितो, ताहार ज्या तुतून जाड़ाह उकुम आपता काय मुला बेलुच तार तारेस उखलीन देरीया माय जाय पोड़! ते तो तुमरी मान लेय।
काम
7 केदी एक पावोर खेत खेड़ीन, नाहते मेंड्रा चारीन गेर आवी, ते तान मालीक ताह सेटकोह आवीन खाणे बोह इही केय काय?
8 तो इही नाय केय! पुण इही केय, मार केरता खाणो तियार केर एने जाह वोर मी खाह पीह ताह वोर मार सेवा चाकरी किर; तान बाद तु बी खाय पिय लीजे।
9 पावराह जो काम मालीक होपेल ईतो केरी, ते तो हाजो किरेल केरीन दन्यवाद देय काय?
10 इहीचकेरीन जो काम केरनेन उकुम तुमूह आप मीलेल हे, तो पुरो केरनेन बाद किहो, आमु विणकाम्या पावोर हेते; जो आमुह केरनु एतो आमु तोलोच किरेल हेते।
यीशु कोढवाला दोह दुखाऱ्याह हुदारने
11 यरूशलेम जाणेन बुखेत यीशु सामरीया एने गेलीलान विचीम रेन एन जाणे बाजरियेल ईतो।
12 ते एक गावाम रिगताच यीशुह दोह कोढ लागेल माणहे मीलना।
13 ता यीशुह देखीन जोरेस आयड़ीन केया, “एय यीशु मालीक, आमरी पोर किव केर!”
14 यीशु ताह देखीन केयो, “जावो, तुमरा सेरीराह चाकऱ्याह देखाड़ो।”
ते ता वाटे जाणे बाजरियेल एताच ने चोखा एय गीया।
15 ता माय रेन एक दिख्यो काय मी चोखो एय जायेल हे, तेवी तो मोठेच आवाज माय बोगवानान बोड़ाय केरती लेन पुशो यीशु फाय आवो;
16 एने यीशुन पाया पोड़ीन यीशुह दन्यवाद दिनो; एने तो सामरीवालो ईतो।
17 यीशु ताह केयो, “काय दोह ने दोह चोखा नाह एना काय, ते ओवता ता दिहरा नोव का हेते?
18 विदेसी पुशो आवीन बोगवानान बोड़ाय किऱ्यो पुण दिहरा यहुदि का हेते?”
19 तेवी यीशु ताह केयो, “उठीन उब रे एने जातरे; तु बुरहो किऱ्यो केरीन चोखो एय जायेल हे।”
बोगवानान राज ने आवणो
(मत्ती 24:23-28-37-41)
20 थोड़ाक फरिसी यीशुह फुशा काय बोगवानान राज केवीह आवी, ते यीशु ताह केयो, “बोगवानान राज देखाणेन गेत नाह आवीत।
21 हुमलो बोगवानान राज न्या हे नाहते ता हे इहकेरीन माणहे नाय केती, काहाकाय बोगवानान राज तुमरी विची माय हे।”
22 ओवतो यीशु चेलाह केयो, माणहान बिटोख आवी, ती टेम तुमू एकास टेमाह देखणेन एर किरहो, पुण नाय देख सिकहो।
23 माणहे तुमूह केती, “दिखो पोलो न्या हे!” नाहते “दिखो, ता हे!” तेवी तुमू मा जाहो एने तान पासाण मा चाल पोड़हो।
24 उंजु यीशु केयो, विज जीहे जुगान एक कोपरे रेन जुगान दिहरे कोपरे वोर विजलेह, तिहेच केरीन मी माणहान बेटाख ने आवणेन टेम माय बी एय।
25 पुण ताह पेल जुलूम दुख वेठणे बी जोरेवरी हे, एने ज्यी केलीन माणहान द्वारे नेचो गेणाय जाय।
26 यीशु केयो, एने जिहकेरीन नोहान दिह्या माय ईयेल एतो, तिहेच केरीन माणहान बेटाख ने दिह्या माय बी एय।
27 जेदिह वोर नुह डोंडह्या माय नाह बुठो, ते दिह वोर माणहे खाताला पिताला लेन देन केरताला, एने ता माय वाराड़े एताला। तेवी मुहेल दार्यो पाणी पोड़ीन ता आखाह खेतेम केर दिनो।
28 इहीचकेरीन लुत ने दिह्याम बी ईयेल एतो काय माणहे खाताला पिताला, एने लेणो देणो केरताला, जाड़े लागाड़ताला एने गेरे बाणावताला;
29 पुण जेदिह लुत सदोम रेन निकेलनो, ते दिह हेरगाम रेन आक्ठो एने गंदक पोड़ीन आखाह मार टाकी।
30 माणहान बेटाख ने आवणेन टेम माय बी इहीचकेरीन एय।
31 ते दिह जो गेरान साजा पोर एय एने तान सोमान गेरा माय एय, तो सोमान लेणे बुंदे नाय उतरे; एने तिहेच केरीन जो खेता माय एय तो वोलीन गेर नाय आवी।
32 लुत ने बायकुह एर किरो!
33 पुण जो माणुह तान जीवाह वोचाड़ने होदि तो तान जीवाह गोमाड़ी, एने जो तान जीवाह गोमाड़ी तो तान जीवाह जीवतालो मेली।
34 मी तुमूह केथु, ती राती एक खाटला पोर दुय माणहे हुव रेती; ता माय रेन एक विसाय जाय एने दिहराह सोड़ देय।
35 दुय बायकु एकठ्युस गेरटी देलने बाज रेती, त्यु माय रेन एक विसाय जाय एने दिहरीह सोड़ देय।
36 दुय जाणे खेता माय काम केरने बाज रेती, ता माय रेन एकाह विसाय जाय एने एक रेय जाय।
37 ज्य होमलीन चेला यीशुह फुशा, “एय मालीक, ज्य काहरी एय?” यीशु ताह केयो, “जाहरी देड़ हे ताहरी मोराग्या टोलवाती।”