Malele Lava'ana'ina
IOANE (1)
Eleleia Kauna
Puka Laloana Ilelena luvana
Malele kanania 'olana 'eva lua. Ioane e'ula abiveni kauta beduluta, inoku ia mai Dilava ita Kamata, mai Nakuna Iesu Keliso ita nuata beka'onamo. Ivaluna 'eva ia sia e'ula dede kauta de'asi delebata eta abiveni Dilava kevanai davana beabia tau. Kau katania eta koakoa 'eva vabulai demimia inoku kanania deluva koma, “Kanobata kanania davata 'eva sia denama'ina. Iesu 'eva Dilava nakuna, kanaua 'ounai ia kauai sia be'asi, kanobata kanania davata ita sia bemia ka'ona, ita kau kavavaia boina 'eva sia bedaia.” Maivaka dediaka, “Kau ka e'ula bemia kave'i Dilava kevanai koanai, ia 'eva kanobata kanania davata sia belalonama vaita, kataua daitai nuana sia belaloto'ato'a”.
Malele kanania eleleia 'eva dede katania leleta de'ika kauta evavaita si'asi'a dokadoka. Ia ediaka Iesu 'eva easi ia 'eva kau umauna, inoku Iesu deabivenia kauta kataua 'eva Iesu beulavenia dokadoka mai kau vaka belalonama venita.
Puka Iduvuna Namata
a. Lova aku. (1.1 - 4)
b. 'Ailala mai vabula. (1.5 — 2.29)
c. Dilava nakuna mai diabolo nakuna. (3.1 - 24)
d. Luva umauna mai va'eva. (4.1 - 6)
e. Lalo'au koana. (4.7 - 21)
f. Abiveni ena siavu. (5.1 - 21)
1
Mauli Luvana.
1 Lau vali'u vali kanania alele venimui 'eva kau makavana umaunai emia kauna kanaua valina, kau kanaua kaiamaiai lelena lai aika, makamaiai lai aikaia, makamai umaunai lai aikaia kave'i mai imamaiai lai abia kovo. Ia 'eva Mauli Luvana kauna kanaua 'eva Keliso mauli 'olana.
2 Mauli kanania kanobatai evala'asia. Mauli keinikeini kauna kanania Keliso lai aikaia 'ounai valina lai akakava mai lai ailolo vaia kevamuiai. Ia 'eva Kamana ita demia inoku kevamaiai evala'asia.
3 Lai dava lai aikaia maivaka 'uluna lai aika davana lai ailolo vaia kevamuiai 'eva oi mai lai ita ekavaka'onamo. Eta vaka'onamo 'eva Kamana mai Nakuna Iesu Keliso 'ani ita ita.
4 Lai alele venimui 'olana 'eva ita ekalalonama ka'onamo.
Dilava 'Eva 'Ailala.
5 Vali Keliso enai lai aika valina vali'u lai ailolo vaia kevamuiai 'eva kanania. Dilava 'eva 'ailala, Ia enai 'eva vabuto'o asi'i vaika.
6 Ita kamadiaka Dilava ita kavaka'onamo beia vabuto'o laloanai kadada'a koanai ita 'eva kadedede mai Dilava ena luva umauna sia kada'avaia.
7 Beia Dilava 'ailala laloanai emimia boina ita 'ailalai kadada'a koanai ita 'eva banota ita ekavaka'onamo, Nakuna Iesu lalanai eta si'avana boutai edeini ovo.
8 Ita kamadiaka eta si'avana asi'i koanai ita sibota kalebata maivaka Dilava ena luva umauna 'eva nuatai asi'i.
9 Beia ita eta si'avana Dilava vailanai eka'outa dae koanai ia 'eva lele ivavua venina kauna mai komolo kauna inoku eta si'avana be'ou kao maivaka eta va'eva boutai bedeinita ovo.
10 Ita kamadiaka si'avana sia ka kavavaia koanai Dilava 'eva dede kaunai kavaoa, maivaka ena luva 'eva nuatai asi'i vaika.