4
Diabolo Eta'u Iesu Evakovoa.
(Mk 1.12-13; Lk 4.1-13)
1 Inoku Idume Kabukabuna eta'u Iesu evada'ala deda'a kano'akunai diabolo betata'u bevakovoa.
2 Iesu boni vaninavui mai lani vaninavui elove sia iani kena eania mulinai ia 'eva vikolo eaku si'ala.
3 Laloanai ivakovo kauna easi Iesu kevana e'ouia ediaka, “Bema oni Dilava nakuna koanai, bika'a katania outa palaoa be'ao.”
4 Beia Iesu ediaka, “Puka kabukabunai 'ani ilelena
‘Kau 'eva sia ianiai mo bemauli,
Beia Dilava nutunai dela'asi luvata boutai ai bemauli.”
5 Kanaua'i diabolo eta'u Iesu evada'ala Ielusalema vanua kabukabunai, Lo'e kabukabuna kubuanai evalavala 'au,
6 inoku diabolo Iesu e'ouia ediaka, “Bema oni Dilava nakuna koanai, sibomu kanana'i lovo asi. 'Olana Puka kabukabunai 'ani ilelena,
‘Dilava ena anelu be'outa
be'imamu imatai beabimu isi,
kanaua'i aemu bika'ai sia boakua.’ ”
Sal 91.11,12
7 Iesu ia ena luva evamuea ediaka, “Puka kabukabunai vaka kanania ilelena koma,
‘Lovia namana emu Dilava
sia bovakovoa.’ ”
8 Inoku mune'e diabolo eta'u Iesu evada'ala lolo lakavaikana toilinai evalavala'au, inoku kanobata vanuata boutai nuavita evaikala.
9 Diabolo ediaka, “Bema bokuidula bokukudivo veni'u koanai, katania boutai oni bavenimu.”
10 Iesu diabolo e'ouia ediaka, “Satani e, da'atau! Puka kabukabunai 'ani ilelena,
‘Lovia namana emu Dilava sibonamo bokukudivo venia,
mai da'alana bo'abi.’ ”
11 Kanaua'i diabolo Iesu kele'enai eda'a ovo, inoku anelu deasi deduluia.
Iesu Ena Vinaula
Kalileai Emakavala.
(Mk 1.14-15; Lk 4.14-15)
12 Iesu Ioane vabuto'o lumanai de'alavua valina eika koanai emue eda'a Kalilea kanonai.
13 Sia ua'i Nasaleta vanuanai emia, beia eda'a Sebulona mai Napatali kanotai Kalilea 'ovu 'aba'abanai vanua ka vana Kapelanauma ua'i emia.
14 Kanania epulu 'eva Isaia enolea kauna eluva luvana 'eva bemomo'ai,
15 “Sebulona kanonai mai
Napatali kanonai,
'ovu 'aba'abanai, Iolidana
nutu avekenai,
Kalilea pulu edea kauta
eta kanoai!
16 Kau vabuto'oai
demia kauta 'eva
'ailala nama vaikana 'ani deikaia.
Mai ba va'ava'ana kanonai demimia kauta akatai 'eva
'ailala 'ani ela'asi.”
Isa 9.1,2
17 Melala kanaua'i Iesu ena ilolo emakavala ediaka, “Emui si'avanai olalo 'udai, 'olana Dilava ena lovia vanuana 'eva 'ani ekevai!”
Iesu Va'eka Kauta Vani E'aeta.
(Mk 1.16-20; Lk 5.1-11)
18 Iesu Kalilea 'ovu 'aba'abana eda'aia eda'a koanai, a'a mai kadi lalua eikata, Simona vana ka 'eva Petelo, kadina Andelea ita eta vuo 'ovu laloanai denaia, 'olana ia 'eva va'eka kauta.
19 Iesu e'outa ediaka, “Muli'uai omai. Lau batata'u kau iva'eka venita kaumuiai bavaaomui.”
20 Komolonai mo eta vuo devikanita mulinai deda'a.
21 Eda'a ilulao 'eva a'a kadi lalua Iakobo mai Ioane kamata Sebedeo ita eta asi akanai eta vuo delaumeta eikata inoku e'aeta.
22 Komolonai eta asi mai kamata devikania Iesu mulinai deda'a.
Iesu Eilolo Mai 'Olele
Evanama'inata.
(Lk 6.17-19)
23 Iesu Kalilea kanona itoina laloana eda'aia, Iuda kauta eta lo'e laloatai evaikabasi, Dilava ena lovia vanuana valina nama'ina eilolo vaia, mai kau eta 'olele edeata edeata mai anana edeata edeata boutai evanama'inata.
24 Sulia kanobatana itoina laloanai valina dekava odaoda, kanaua'i kau deta'u 'olele edeata edeata kauta, anaana edeata edeata kauta, nuatai ka'uba si'avata vaika kauta, lalamamalo kauta, mai 'eko kauta devuata deasi Iesu kevana, inoku ia eta'u boutai evanama'inata.
25 Kau mato nama vaikana Kalileai mai Vanua Oukana kataua'i, Ielusalemai mai Iudai, mai Iolidana nutuna avekenai kanota kauta Iesu mulinai deda'a.