16
Pwelekei manandrtoyoh para ndrinalokuh ta Ngindrai
1 Pwen uhilingi yoholai iyau yumwa totohun namandran ara ipwai iya kili hu angelou manandrtimou ara ipa, “Akaya pe akatilingi ndrinalokuh ta Ngindrai ita hu pwelekei manandrtoyoh ara kiya kol pwan.”
2 Pwen angelou hamou imu tahu, ara iya pe itilingi pwelekei tan para ndrinalokuh iya ndrita pwan, pe neken pwalan masih pe ngandran para neken namandran ilopwa hu ndramat mepo kinima kan puyap namandran iro kili hu pe hu mepo hu totohun iya kili nombungong tan.
3 Pwen angelou lumou, ara itilingi pwelekei tan para ndrinalokuh iya ndrita ndras, pe ndras irapaiwaniy irayah ndrai tehe ndreye ndramat hamou kinmat, pe hu kan mwalen masih para nondriya ndras hu mat.
4 Pwen angelou timou, ara itilingi pwelekei tan para ndrinalokuh iya ndrita hu ndran pe ndramwiying para ndran, pe hurayah ndrai.
5 Pe uhilingi angelou mepo ngara kiro sokoyou hu ndran ipa:
“Hu tamwanye tam iya hu melit aripo, ara imwonen.
Wou mepo para mamu pe para mahapo, mepo Wou Haiyan,
paratesah, antamwanye hiyan,
6 pe ndreye ndramiram hu haiyan pe hu poropet, ara ita ndritahu ndramat mwomwan,
pe anhang hu ndrai para hu kayin tehe korahu, paratesah, hu tingundruhu.”
7 Pe uhilingi mbulukoyu hamou iyau pere tuntun ipwai ipa,
“Ehe Yapan Ngindrai Pwokeyan iya,
hu tamwanye tam ara ndrokonan pe imwonen.”
8 Pwen angelou haamou, ara itilingi pwelekei tan para ndrinalokuh iya ndrita mwandrai, pe pwoke iya kili mwandrai para kitimwihu hu ndramat iyapolo mwan.
9 Pe ngandrahan pwokeyan iya irahakulihu, pe hupwasimiri ngala Ngindrai, mepo yiy ndroiyi pwoke iya hu nopwaran mwomwan aro, hapeko mbuwali hu para hu karapaiwani ndriyahu pe kahari ngalan.
10 Pwen angelou yimou itilingi pwelekei tan para ndrinalokuh iya ndrohonoku pwanpwan ta king ta kan puyap, pe kolo king tan ara lokuhan iramburuhiy. Pwen hu ndramat huwiri ngandran namandran iya, pe huyantani hu kalamehu.
11 Pe huten ana Ngindrai para kol paingan yang, paratesah, iya neken pe ngandran tahu, hapeko mbuwali hu para hu karapaiwani ndriya hu kiya kultuw mwomwan tahu, ara pwi.
12 Pwen angelou annomou itilingi pwelekei tan para ndrinalokuh iya ndrita ndran namandran Yuprates, pe ndran para aliy isapak, para kiramwanyani saya hu king para kup andre kimwonen.
13 Pwen unime payit matimou mwensehu tehe ndret, hamou isa ngawan poho mwat laman namandran, pe hamou isa ngawan poho kan puyap, pe hamou isa ngawan poho poropet pwasoyou.
14 Pe hu payit pwassin ta sinai ara, ara hu mbusi hu ndraikiya kaipisa pwoke, pe huya kili hu king para kol pwan masih, para kambultani hu para pahun kiyapolo Ngindrai Pwokeyan iya, kiro nondriya lang namandran.
15 “Akahilingiy, yo andre kusa tehe ndramat hamou para pahana! Ngindrai andre kitoholi yiy mepo ita poyoi makoiwen, pwen andre kinto mwaheh pwi, pe kinmasi tehe mwayen pwi, ara pwi.”
16 Pe hu rawure hu king huyawule huya kol para Hipuruw, mepo hupohowe ngalan Armaketon.
17 Pwen angelou anandrtimou itilingi pwelekei tan para ndrinalokuh iya yang, pe yoholai sahin namandran iyau yumwa totohun namandran iyau te ndrohonoku pwanpwan ta king para kol paingan yang, ipa, “Kinhipwen!”
18 Pwen hu kamit ara huro kamiriy, pe hu ngasa-ngasa hu melit huropo iya, pe hu palan huro talon, pe nunuw sahin irayah. Nunuw sahin namandran tehen tora, ara kinho tayah pwi ko iro mwonen ndramat irayah iro kol pwan, ipoo isa matnen.
19 Pwen kol namandran mangalan, ara iramburing iya matisai, pe hu kol namandran para hu kol namandran masih, ara huya pwalngengei. Pe Ngindrai koyun kinmayit kol Papilon mangalan, ara pwi, pe ihang yiy pweniu ipep iya wain para ndrinalokuh namandran tan.
20 Pe iro mwonen nunuw irayah, pwen hu mbuson masih ara hutan huya mawen, pe hu ngondron masih humun omwaihei.
21 Pe mbulou namandran iya indrut tehe hu pat hulon, pe nopwara hu pat ara, ara kilo yimingui, pe hu pat sih-sih ara huyos huyau paingan yang husa ndrita hu ndramat. Hu ndramat ara, ara huten ana Ngindrai iya mwomwan para mbulou pat, paratesah, mwomwan ara ipwalngani hu.