2
Tjawunalu Kuka Kapingkatjaku Tjuninguru Mama Kuurrnga Marninypungkulanytja
1 Nyangka Tjawunalu kuka kapingkatjaku tjuninguru Mama Kuurrnga ngaapirinypa marninypungkula-lu watjaranytja,
2 “Yuwa Puurr, kapingka mirrirrikitjalu-rnanta tjapirnu,
nyangka-rnin kuliralpi yirringkanu.
Mirrirrikitjalu-rnanta mirrangu watjarnu,
‘Wankala-rni!’
Nyangka-rnin kuliralpi wankarnu.
3 Tjiinya-rnin warningu kapi kaninytjarra tjarrpatjunu,
nyangka-rni kapi purlkanyalu tjuturnu kanyiranytja.
Nyangkan kapi purlkanya yurritjingaranyangka
tirtu-rni rulyupungkula kanyiranytja.
4 Tjiinya-rna yarlaku kuliranytja
nyuntulu-rnin payira witura-wanarnu wantingu
tiwa-rna yankula nyinatjaku,
puru tjurrtju purlkanyangka
tjarrpanytjamaaltu wantitjaku.
Palunyakukantjalu-rna kuliranytja.
5 Kapi kaninytjarra-rna tjarrpangu
ngita-ngitarringkulalpi purtu ngaalymaranytja.
Tjiinya kapilu-rni tjutura kanyiranytja.
Nyangka-rni yukiri kapingkatjalu kata karrpirnu kanyiranytja.
6 Tjiinya-rna kapi kaninytjarra pitjalayirnu
yapu kaninytjarrangkatja pampurnu.
Palunyalu-rna kulirnu, ‘Wartalpitjanu-rna mirrirriku.
Palunyalu-rna marlaku pakalkitjamunu.’
Nyangka-rnin nyuntulu wankarnu pakaltjingarnu.
7 Yuwa Puurr, nguwanpa mirrirringkulalpi-rnanta tjapirnu
nyangka-rnin yilkaringuru kulirnu.
8 Nyangka kutjupatjarralu-ya yapu wartatarrartu
kunpu-kunpu pupakatirra marninypungkula.
Tjiinya-ya nyuntuku mula-mularringkutjamaalarringu.
9 Nyangka-rnanta ngayulu yinkaku marninypungku.
Kuka-rna pungku tililku tjunkulalpi nyuntuku nintilku.
Puru-rna kalkurnu wantitjalu palyalku.
Yuwa Mama Kuurr, nyuntulu kutjulun wankalpayi.”
Palunyapirinypa Tjawunalu marninypungkula watjaranytja.
10 Nyangka Mama Kuurrtu kuka kapingkatja watjarnu Tjawunanya mantangka yulkapatjunkutjaku. Nyangka mularrpartu mapitjangu mantangka-lu yulkapatjunu.