15
Nzayrplapxngr Kxnzrmnr-ngrbzng Kcng Rlimz Tzoliqting Heven
1 Mz nibrde, mc-moux rkx kxmatq mz bongavz x kctipx-zlwzx. Enjrl nzrlimzng nzkabz badr nzayrplapxngr rlimz. kxnzrmnr-ngrbzng. Murde mzli kc nayrkrpx-ngrbz nzayrplapxngr lcng, zngya ngr drtwr Gct kc tqyrkrpxpe-kzpz.
2 X mc-kzx prla kx apule dzpq kx rlxlvzmi nyr. X leplz kcng tzaovxiolr Mrlx Kc Tqdrka'ngr, murde trnzangiolru mqngrde kxnzlz x nzpx-ngrdr nzrtwz-krdr rkx ngr drtqde. Nztu-aepztrng mz prla lc x nzrmale-lxblrng gita kx kabz Gct badr.
3-4 X nzngr-ngrdr nabz ngr nzmyalz-esz'ngrkr Gct mz nzarlapx-kai-krde leplz nedeng mz kxnzawz nede Mosis, x mz Nei Sip kc ate. Nzrpilr kx,
“Yawe, Gct kc tqrninr,
King abzo mzli kc bqnc
Krlzmle mzli ka, nzwz-krmqng myapx-
Esz'ngr x kctipxkrng.
Nqmq krmqng da angidr,
X tubq-esz'ngr.
Leplz nzamrluelr nim.
X trpnzngr kx napxtxpx-ngrde
Nzglqlz-krde nqmq krm.
“Nim txpwz kxtr-esz'ngr,
X nzamrluelr nim.
Trpnzngr leplz kx napxtxpx-ngrde
Nzglqlz-krde nqmq krm.
Murde nqmq krmqng kxtubq,
Lr nrlc amrlx sa navzmqng
Mz nzangio-krdr nim.
Murde aelwapxpe-ngrn nqmq krmqng kxtubq,
Tubq-esz'ngr, eu.”
5 Mz nibr nzngr-krdr, obqlzbo x mcx Mrkc Tqtr-esz'ngr mz nabz Tentkxtr nzlvxpxpe Heven.
6 X nzvzpxmqng elr enjrl kcng rlimz tzrka-nebang nzayrplapxngr kcng rlimz. Enjrl lcng nzkqng amrlx ngrdr nzkq kxprkitxpx, x nzlunyao-ngrdr kc da kx apule gol.
7 Zbz kzdq kxnzlung kcng pwx twzbzle baol rlimz kx ngi gol ataplxsr-ngrde enjrl kcng rlimz. X Gct kc tqlu zvz, sa nalva-puliole mz nrlc zngya ngr drtwrde na-apule baol lcng nayrbu-lxblrng mz nzayrplapx-krdeng.
8 Mrkc Tqtr lvabqtx atwrnrngr zsikapu kx vzpxm mz zluli x zmatq ngr Gct. X trtxpnzngr kx navztr Mrkc Tqtr, navz navz nakrlz-zpwxbzle nzyrkrpx-krbz nzayrplapxkr Gct lcng rlimz tztwzm enjrl lcng rlimz.