6
1 Ŋaahani ngʼolu Hatonda gatuŋa ohuba abatambi ni naye, hubegayirira ohutatambisa bubi ehisasabirisi ehi gabaŋa.
2 Hatonda aloma ati,
“Mu hiseera hyange ehituufu
nabagobolamo,
era hu ludaalo olwʼohunoŋoha
nabayeeda.”
Era mbalomera ti hino njʼehiseera hya Hatonda, era olwa leero njʼoludaalo olwʼohunoŋoha.
Ebigosi ebi Pawulo gaasuna
3 Sihwahendire hwesitaaza muutu yesiyesi mu bihuhola ko bataŋaha obuŋeeresa weefe esiro.
4 Aye mu hiisi hiitu hulaga huuti huli baŋeeresa ba Hatonda. Olwʼehyo hwehaliiriha bugali ebigosi omuli embeera embi,
5 ebihubbe, ohutuboŋa mu komera, abaatu ohutuyabuluhiraho, ohutamba emirimo ejʼamaani, ohutalimba hwiro nʼohuhaya ehyohulya.
6 Era hulagire huuti huli baŋeeresa ba Hatonda mu nebisya yeefe, mu hulaga huuti hutegeera Hatonda, mu hugumikiriza nʼohuba abʼehyere, nʼomuhuboneha ti amaani gʼOmwoyo Omutukuvu gaholera mu fe era ti ohwenda hwefe hubulamo hwehubbira.
7 Ni hwongera hu ebyo, hulomera abaatu Amaŋuliro Amalaŋi mu maani ga Hatonda. Era hutambisa obugwalaafu ngʼehisoosa mu muhono gwefe omulungi nʼomugooda.
8 Ŋaliŋo abatuŋa eŋono abandi batujerega, abatulomaho ebiraŋi abandi ebibi, abatulanga baati huli baŋeeresa abatuufu abandi baati huli badulingi.
9 Batuŋira hyʼabaatu aba batamanyire ate nga batumanyire. Batubalira mu bafu aye huli balamu, era batugudya baatwite aye sihufa.
10 Wayire batunakuŋasa, husigala ni huli basangaafu. Wayire huboneha hyʼabagadi, huleetera bangi ohuba baŋinda. Wayire huboneha oti huŋuma hiitu hyosihyosi, huli ni hiisi hiitu.
11 Enywe abaatu bʼe Koriiso, efe hiisi hiitu huhiromire mu lwatu eyi muli ni ŋaŋuma ehihubagisa.
12 Efe hubalagire huuti mutuli hu mwoyo aye enywe mutulagire muuti hubali ŋaleeŋi mu biŋeego byenywe.
13 Mbasunga ngʼolu nahasungire abaana bange, mwesi mutulage muuti hubali hu myoyo jenywe.
Mutaholanga muhumba nʼabatafugiirira Kurisito
14 Mutaholanga muhumba nʼabatafugiirira Kurisito. Hiri hiityo olwohuba ŋaŋuma ehiŋanga ohuŋimba abaatu abahola ebiruŋamu nʼabahosi bʼebibi. Oba kolagana hi eŋanga ohubaŋo ŋagati wʼenjase nʼehiirema?
15 Kolagana hi eriŋo ŋagati wa Kurisito ni Sitaani? Hiina ehiŋimba omuutu afugiirira Kurisito nʼatamufugiirira?
16 Era kolagana hiina eriŋo ŋagati wa Yekaalu ya Hatonda nʼeyebitali Hatonda? Huli Yekaalu ya Hatonda omulamu. Era Hatonda galoma ati, “Naabenga mu bo era nagendenga ni nabo. Nja huba Hatonda waawe, boosi banaabenga baatu bange.”
17 Era Musengwa aloma ati,
“Olwʼehyo, mubaŋwemo,
mubeyabuleho.
Mutaŋambanga hu hiitu ehitali hitukuvu,
keesi nja hubasangaalira.”
18 “Nja huba Senywe,
mwesi muja huba baana bange.
Ese Musengwa Omwene Buŋangi, ndiise aloma.”