3
Ebiribaŋo Kurisito ko ahene agobole
1 Baaŋo nʼomanyire oti mu ndaalo ekeneeresi Kurisito ko ahene agobole, ŋalibaaŋo ebiseera ebigosi.
2 Hiri hiityo olwohuba abaatu balyemanya boŋene, ni bali nʼomulungo gwʼebbeesa, abepaaha, ebʼehyeŋulisi, abaduha abahyawe, abataŋulira basaaye baawe, abatasiima, abatala ebya Hatonda,
3 abatenda bahyawe, abatasoniŋa, abaŋaayira abahyawe, abatebalirira mu bibahola, abakambwe, abaŋoomerwa ebibi,
4 abeekwe, abenda ebiitu ebyamangu, abeebona, abasangalira ebinyumyo ohuhira Hatonda.
5 Hu mugulu balyeraganga abaatu abaŋa Hatonda eŋono, cooka mugati mula ni batafugiirira maani ga Hatonda hubacuusa.
6 Soholanga muhumba nʼabaatu hyʼabo, olwohuba balala hu bo bengiririra ebidaala byʼabaatu ni basomesa ebyʼobudulingi, nga bafuga owongo wʼabahasi abaŋuma epunga eyiita ehiswa, aba ehibi nʼohwegomba ohubi ohwa buli ngeri hwahenamo amagesi.
7 Abahasi hyʼabo, hiisi obuhya baba hugwa hwega hiisi somesa epyaha eyibaluhaŋo aye sibaŋanga kadi naŋatotono ohufaania nʼohwabulaŋo obuhwenda wa Hatonda obutuufu.
8 Ngʼolu Yanesi ni Yamburesi baŋahania Musa, nʼabasinde abo abasomesa ebyʼobudulingi boosi pobali, baŋahania amazima. Abaatu abo beŋwitania, era baŋuma hufugiirira hutuufu.
9 Aye baŋuma eyi baja, olwohuba ngʼolu obudulingi wa Yanesi ni Yamburesi weeta aŋalafu, boosi obudulingi waawe buuja hweta aŋalafu abaatu bosibosi babufaanie.
Obulamu wa Pawulo ngʼehyohuboneraho eyiri Temuseewo
10 Ne ewe omanyire byosibyosi ebi tiinire ni somesa, omanyire esambo jange, omanyire hiina ehi fululuhanira, omanyire ohufugiirira ohu ndi ni nahwo mu Kurisito, omanyire engeri eyi nendamo abaatu, omanyire nʼobugumiikiriza hwange,
11 omanyire ohugudya ohu bangudisye nʼohubonaabona ohu mbitiremo. Omanyire ebigosi ebyanjolireho mu bibuga ehyʼAtiyokiya, ehya Yikoniyo nʼehya Lisitura. Mu butuufu bangudya bugali! Aye Musengwa gambisya mu byosibyosi.
12 Cooka ehihulu hiri hiiti, hiisi muutu owenda ohugendera mu bulamu owʼohuŋa Hatonda eŋono nʼafugiirira Yesu Kurisito, balimuhiyaania,
13 ate ehiseera njʼehyene abaatu ababi, nʼabadulingi balyeyongera ohuba ababi, ni badulinga abaatu ni bababbaamya, ate nindi boosi ni babadulinga.
14 Ne ewe olwohuba omanyire ate wesiga abahusomesa, gumya ebyo ebi bahusomesa ebi wahena nʼohwehahasa ti bituufu.
15 Nʼehindi, ohimanyire ti ohuŋwa mu buŋere bubwo, otinire ni weega Ebyaŋandihiwa ebyabufu ebiŋanga ohuhuŋa amagesi, wanoŋoha olwʼohufugiirira Yesu Kurisito.
16 Hatonda njʼomwene Byaŋandiihiwa era njʼowabita hu myoyo jʼabo ababiŋandiiha husobole ohubyeyedesanga mu husomesa, ohunenya, ohugolola, nʼohutendeha abaatu ko baholenga ebituufu.
17 Era gabituŋa bisobole ohuleetera hiisi muutu aŋeeresa Hatonda, ohuba owolereeye era asobola ohuhola hiisi mulimo omulaŋi.