Ko te 'Ipiseli 'a Paula ki te Kakai
'Efesoó
Ko te talateú
Ko te tafito'i kaveinga 'o te 'Ipiseli 'a Paula ki te Kakai 'Efesoó ko te fokotu'utu'u 'a te 'Atuá “ke fālute 'ia te me'a kotoa pē 'iā Kalaisi, 'ia te 'ū me'a 'oku 'i langí, mo te 'ū me'a 'oku 'i māmaní” (1:10). 'I te 'ipiseli ko 'ení 'oku fakalotolahi'i ai foki 'e Paula 'ia te kakai 'a te 'Atuá ke notou ma'uli 'o taau mo te fokotu'utu'u 'a te 'Atuá: ke taha 'ia te fa'ahinga 'o te tangatá 'iā Sīsū Kalaisi.
'I te konga 'uluaki 'o te 'ipiseli nei (vahe 1-3) 'oku kamata 'e Paula tana fakamatalá ki te anga tono fili 'e te 'Atua ko te Tamaí Tono kakaí, kua Ina fakamolemole'i te notou angahalá 'o fakatau'atāina'i nātou 'iā Sīsū Kalaisi ko Tono 'Aló. Kua ngaahi 'e Ia 'ia te Siú mo te hītení ko te kakai pē 'e taha 'iā Sīsū Kalaisi, pea kua Ina foaki mai te Laumālie Mā'oni'oní ko te fakamo'oni ki te tala'ofa kāfakafa 'a te 'Atuá. Ko te konga tono ua 'o te tohí (vahe 4-6) ko te kole ange 'e Paula ki te kau Kalisitiane 'o 'Efesoó ke notou fai 'ia te fa'ahinga tō'onga ma'uli 'e mo'oni ai te notou taha 'iā Kalaisí 'i te anga 'o te notou nofó.
'Oku ngāue 'aki 'e Paula 'ia te lea fakatātā 'ihi ki tono fakahaa'i 'ia te taha 'o te kakaí 'a te 'Atuá 'iā Kalaisí: ko te siasí 'oku hangē ko he sinó, ko tono 'ulú 'ia Kalaisi; pea 'oku hangē he falé, ko Kalaisi tono maka tulikí; pea hangē he hoá, ko Kalaisi 'ia te 'unohó. Ko te 'ū lea mālie mo fakapunake 'aupito 'oku fa'u 'aki 'ia te 'ipiseli ko 'ení 'i te mātu'aki ongo kiā Paula 'ia te 'ofa tu'unga'a 'oku fai mai 'e te 'Atuá 'iā Kalaisí. 'Oku hulungia tana kupu'i lea kotoa pē mei te 'ofa, mo te si'aki ma'uli, mo te fakamolemole, mo te kelesi, mo te mā'oni'oni 'a Kalaisí.
Ko te kakano 'o te tohí
Ko te talateú (1:1-2)
Ko Kalaisi mo te siasí (1:3—3:21)
Ko te ma'uli fo'ou 'iā Kalaisí (4:1—6:20)
Ko te tātukú (6:21-24)
1
Ko te fakafe'iloakí
1 Ko au Paula, ko he 'apōsetolo 'a Kalaisi Sīsū 'i te finangalo 'o te 'Atuá, ko taku tohi ki te kāinga lotu 'oku nofo 'i 'Efesō, 'ā ē 'oku notou tui kiā Kalaisi Sīsuú.
2 'Ofa ke kotou ma'u kelesi mo te fiamālie, mei te 'Atua ko te tou Tamaí mo te 'Alikí ko Sīsū Kalaisi.
Ko te tāpuaki fakalaumālie 'iā Kalaisí
3 Fakafeta'i ki te 'Atuá ko te Tamai 'a te tou 'Alikí ko Sīsū Kalaisi, 'ā ē ne'e tāpuaki'i tātoú, 'aki te 'ū tāpuaki fakalaumālie kehekehe 'i te 'ū feitu'u 'o langí 'iā Kalaisi.
4 He kua Ina fili'i 'ia tātou 'iā Kalaisi 'i te he'iki ai fakatupu 'ia te māmaní, kote'uhí ke tou mā'oni'oni mo ta'emele 'i Tana 'Afio ifó, 'o tu'unga 'i te 'ofa,
5 'o toka tu'utu'uni 'e Ia 'ia tātou ke ohi 'iā Sīsū Kalaisi ki Tana 'Afió, 'o fakatatau ki te me'a ne'e hā lelei ki Tono finangaló,
6 ke fakamālō'ina te lāngilangi'ina 'o Tana kelesí 'a ē ne'e me'a'ofa 'aki mai 'i te Pelé.
7 'I te tou 'iā Iá, 'oku tou ma'u 'eni 'ia te huhu'í, ko te me'a 'i Tono ta'ata'á, ko te fakamolemole te tou 'ū angahalá, 'o fakatatau ki te lahi fau 'o Tana kelesí,
8 'a ia ne Ina lilingi mai ke lahi ko te poto fuli pē mo te 'ilo'ilo;
9 'i Tana faka'ilo kiā tātou te misiteli 'o Tono finangaló, 'o fakatatau ki te me'a ne'e hā lelei kiā Iá, 'a ia ne Ina tu'utu'uni 'iā Ia pē,
10 kote'uhí 'i te kakato 'o te 'ū kuonga kua Ina tu'utu'uní, ke fālute 'ia te me'a kotoa pē 'iā Kalaisi, 'ia te 'ū me'a 'oku 'i langí, mo te 'ū me'a 'oku 'i māmaní.
11 Kua tou hoko 'eni ko te tofi'a 'o Tana 'Afió 'iā Ia, 'o fakatatau ki te fa'italiha 'o Tana 'Afió, 'ia Ia 'oku ngāue'i 'ia te 'ū me'a kotoa pē 'o fakatatau ki te poto 'o Tono finangaló;
12 kote'uhí ke nofo 'ia mātou mo'o fakamālō'ina Tana lāngilangi'iná, 'ia mātou ne'e fu'aki falala kiā Kalaisí.
13 Pea ne'e kotou falala foki kiā Ia, 'i te kotou fanongo ki te tala 'o te mo'oní, ko te ongoongolelei 'o te kotou fakama'ulí; pea 'i te kotou tuí ne'e fai 'iā Ia te kotou sila'í 'aki 'ia te Laumālie Mā'oni'oni ne'e tala'ofá;
14 'a ia ko te me'a faka'amanaki 'o te tou tofi'á; kote'uhí ke lava te huhu'i 'o nātou ne'e fakataú, ki te fakamālō'ina 'o Tono lāngilangí.
Ko te lotu 'a Paulá
15 Ko ia ai, ko aú foki, 'i taku fanongo ki te kotou tui ki te 'Aliki ko Sīsuú, mo te kotou 'ofa ki te kāinga lotú kotoa pē,
16 pea 'oku kailoa tuku taku fakafeta'í kote'uhí ko kōtou, mo taku takua kōtou 'i taku 'ū lotú;
17 ke hanga 'e te 'Atua 'o te tou 'Aliki ko Sīsū Kalaisí, ko te Tamai 'oku 'A'ana te lāngilangí, 'o tuku kiā kōtou 'ia te Laumālie 'o te potó, mo fakahā me'á ke ngāue 'i te 'ilo'i lelei 'o Tana 'Afió;
18 kua fakamāma'i te mata 'o te kotou lotó, ke kotou 'ilo'i pe ko te ā te 'amanaki 'oku tupu mei Tana uí, pea ko te ā te koloa lelei 'o Tono tofi'á, 'a ia 'oku ma'u 'e te kau mā'oni'oní,
19 mo tono lahi 'i te lahi ange fau 'o Tana māfimafí, 'a ē 'oku ngāue ma'a tātou 'oku tuí; 'a ē 'oku hoa mo te ngāue tōtōivi 'o Tono māfimafí,
20 'a ē ne'e fai 'e Ia 'iā Kalaisí, 'i Tana fokotu'u 'Ona mei te pekiá, mo fakanofo 'Ona mei Tono to'omata'ú 'i te 'ū feitu'u 'o langí,
21 'o mā'olunga lahi Ia 'i te 'ū pule kotoa pē, mo te ma'u tu'unga, mo te ma'u mālohi, mo te tu'unga 'aliki, 'io, 'i te hingoa kotoa pē 'oku hingoa 'aki 'i te maama ko 'ení, pea 'i te maama foki kā hoko maí;
22 pea ne'e tuku 'e Ia ke 'i Tono lalo va'é 'ia te me'a kotoa pē; pea fakanofo Ia ko te 'ulu 'o te me'a kotoa pē kote'uhí ko te siasí.
23 He ko te siasí ko te sino ia 'o Kalaisí, ko te nofo'anga 'o te katokātoa 'o Tana 'Afió, 'a ia 'oku Ina fakafonu 'ia te 'ū me'a kotoa pē 'aki te notou 'ū me'á.