8
Ko Sīsū 'ia te tou Taula'aliki Lahí
1 Pea ko 'eni, 'i te 'ū me'a 'oku tou lau 'eni ki aí, ko 'eni pē te me'a 'oku tu'ukimu'á: 'oku 'i ai te tou Taula'aliki Lahi 'oku pehē fau, he kua nofo ifo Ia mei te to'omata'u 'o te taloni 'o Tana 'Afió 'i hēvani,
2 ko te Faifekau 'o te Potu Toputapú, mo te tāpanekale mo'oniá, 'a ē ne'e fokotu'u 'e te 'Alikí, 'o kailoa 'e te tangata.
3 He ko te taula'aliki lahi kotoa pē, kua fokotu'u 'ona ke 'avatu te 'ū me'a'ofa, mo te 'ū feilaulau; ko ia ai, kua pau ke 'i ai Hana me'a ke 'avatu 'e te Taula'aliki Lahi ko 'ení foki.
4 Pea ko 'eni, kā ne 'i māmani 'ia Ia 'e kala Ina kākunga ke taula'aliki, kote'uhí 'oku 'i ai te kau taula'aliki ke 'avatu te 'ū me'a'ofá 'o fakatatau ki te Laó.
5 Kā 'oku notou ngāue ki te fakatātā mo te 'ata 'o te 'ū me'a fakalangi, hangē ko te valoki'i 'e te 'Atuá 'ia Mōsese 'i tana teuteu ke fokotu'u 'ia te tāpanekalé. He ne'e folafola kiā ia 'o pehē, “Tokanga ke ke ngaahi 'ia te 'ū me'á 'o fakatatau ki te fakatātā'anga ne'e faka'ali'ali kiā koe 'i te ma'ungá.”
6 Kā 'i heni 'oku ma'u Ia he lakanga 'oku hulu atu, ke hoa mo te lelei ake 'o te fuakava 'oku nofo 'e Ia ko tono Fakalaloá; 'a ia ko te fuakava kua tu'unga ki te 'ū palōmesi 'oku lelei ake.
7 He ka ne ta'emele 'ia te 'uluaki fuakava ko iá, 'e kala toe fia ma'u he fuakava kehe.
8 He 'oku tala'i 'e Ia te notou melé 'i tana pehē,
“Vakai, 'oku pehē 'e te 'Alikí, 'e hoko mai 'ia te 'ū 'aho
'e Au fakakakato ai ki te ha'a 'Isileli mo te ha'a Siutá he fuakava fo'ou;
9 'a ia 'oku kala hangē ko te fuakava ne Au fokotu'u ki mu'a atu mo'o te notou kau mātu'á,
'i te 'aho ne Au pukenima'i ai 'ia nātou ke taki atu mei 'Isipité;
he ne'e kala notou nofo 'i Taku fuakava ko iá,
pea ne kailoa ke Au tokanga'i 'ia nātou —
ko te Folafola ia 'a te 'Alikí.
10 'Io, 'oku folafola 'e te 'Alikí,
he ko 'eni ia te fuakava 'a ē 'e Au fokotu'u mo'o te ha'a 'Isileli hili te taimi ko iá:
'e Au 'ai Taku 'ū laó ki te notou 'atamaí,
pea 'e Au tohi tongi ia ki te notou lotó;
pea 'e Au nofo ko te notou 'Atua,
pea 'e notou nofo ko Toku kakai.
11 Pea tala'i'eaí 'e notou taki taha ako'i tono kaungā'api,
pe ko tono tokoua, 'o pehē,
‘Ke ke kumi ke 'ilo'i 'ia te 'Alikí’;
kote'uhí he 'e notou lāu'i'ilo kotoa pē kiā Au,
mei te liliki ki te lalahi.
12 Hē 'e Au fakamolemole te notou 'ū fai ta'etotonú;
pea ko te notou 'ū angahalá 'e kala U toe manatua.”
13 Pea 'i Tana pehē mai ko 'ē, “he fuakava fo'ou,” tā kua matu'a 'ia te 'uluakí. Pea ko 'eni, ko te me'a kua matu'a mo vaivaí, kua ofi ta'aná mole.