18
Ko te tō ki lalo 'ia Pāpiloné
1 Hili ko iá ne au vakai atu he 'āngelo 'e taha 'oku 'alu ifo mei hēvani, kua 'iā ia he mālohi lahi; pea ne hulu'ina 'ia māmani 'i tono ngingilá.
2 Pea ne'e kalanga le'o lahi ia, 'o pehē,
“Kua tō ki lalo! Kua tō ki lalo 'ia Pāpilone lahi!
Pea kua hoko ko te nofo'anga tēvolo,
ko te 'ananga 'o te fa'ahikehe kotoa pē,
mo te 'ananga 'o te manupuna kotoa pē 'oku ta'ema'a mo fihi'anakina.
3 He kua inu 'ia te pule'anga kotoa pē,
mei te uaine, ko te mamahi 'o tana fe'auakí.
Pea kua fai fe'auaki mo ia 'ia te 'ū tu'i 'o māmaní;
pea ko te kau fakatupu koloa 'o māmaní kua notou koloa'ina
ko te me'a 'i te lahi 'o tana ma'uli fakatu'umālié.”
4 Pea ne au fanongo ki te le'o 'e taha mei hēvani ne'e pehē,
“Hiki meiā ia, 'e Toku kakai,
ke 'aua 'e kotou kau 'i tana hiá,
pea 'inasi 'i tono 'ū fakamamahí.
5 He kua a'u ake ki langi tana 'ū angahalá,
pea kua manatu 'e te 'Atuá ki tana 'ū fai ta'etotonú.
6 'Ē, kotou totongi kiā ia,
'o hangē ko te totongi ne ina fai ki te kakai kehé;
pea 'avatu kiā ia ke tu'a ua,
'o fakatatau ki tana 'ū ngāué.
Ko te ipu ne ina fakafonú,
kotou fakafonu ki ai ma'ana ke liunga ua.
7 Tuku kiā ia 'ia te tauteá mo te mamahí,
'o fakatatau ki te lahi 'o tana fakahīkihiki'i 'oná mo tana ma'uli fakatu'umālié;
kote'uhí ko tana pehē 'i tono lotó,
‘'Okou nofo 'ia au ko te kuini,
pea 'oku kala ko te uitou 'ia au,
pea 'e kala u 'ilo'i he mamahi.’
8 Ko ia ai 'e hoko mai tono 'ū tauteá 'i te 'aho pē taha,
'ia te mate mo te mamahi mo te honge;
pea 'e tutu 'ona 'i te afí.
He 'oku mālohi 'ia te 'Aliki ko te 'Atuá
'a ē kua Ina fakamāu'i 'oná.”
9 Pea 'e tēngihia mo tangilāulau'i 'ona 'e te 'ū tu'i 'o māmaní, 'ia nātou ne'e notou fe'auaki, mo ma'uli fakatu'umālie mo iá, 'i te notou mamata ki te kohu 'o tana velá.
10 'Oku notou tutu'u pē mei te mama'ó, ko te me'a 'i te notou manahē ki tana mamahí, 'o notou pehē,
“Pohoē! Pohoē! 'Ia te fu'u kolo nā,
ko Pāpilone, ko te kolo mālohi!
He kua hoko tou fakamaau'í
'i te houa pē 'e taha.”
11 Pea ko te kau fakatupu koloa 'o māmaní 'oku notou tangi mo fakamamahi 'iā ia, kote'uhí 'oku kala kei fakatau he taha te notou koloá:
12 'ia te notou uta koula, mo te siliva, mo te maka koloa, mo te mata'itofe, mo te līneni mahu'inga, mo te kofu kulakula, mo te silika, mo te kula 'aho'aho; 'ia te 'akau namu kakala kehekehe, mo te 'ū ipu lei kehekehe, mo te 'ū ipu 'akau mahu'inga lahi, mo te ipu palasa mo ukamea mo māpele,
13 mo te sinamoni, mo te me'a pani, mo te 'inisēnisi, mo te mula, mo te laipeno, mo te uaine, mo te lolo, mo te māhoa'a lelei, mo te uite, mo te fanga pulu, mo te fanga sipi, mo te fanga hoosi, mo te 'ū sāliote, mo te kakai, kae'uma'ā 'ia te 'ū laumālie 'o te kakaí.
14 Pea ko te 'ū fua ne'e holi ki ai tou laumālié, kua mole meiā koe, pea mo te me'a fuli pē ne'e ifoifo lelei mo matamataleleí, kua mole meiā koe, pea 'e kailoa 'aupito 'e ke kei 'ilo'i ia.
15 Ko te kau fakatau 'o te 'ū me'a ko iá, 'o notou ma'u koloa ai mei te fafiné, 'e notou tutu'u mei te mama'ó ko te me'a 'i te notou manahē ki tana mamahí, 'o notou tangi mo fakamamahi,
16 mo notou pehē,
“Pohoē! Pohoē! 'Ia te fu'u kolo nā!
'Ia te kolo ne kofu 'aki te līneni mahu'inga,
mo te kofu kulakula, mo te kula 'aho'aho;
mo teu 'aki te koula,
mo te maka koloa, mo te mata'itofé!
17 He kua mole meiā ia 'i te 'aho pē taha
'ia te koloa ko ia ne'e lahi pehē fau.”
Pea ko te 'alikivaka kotoa pē, mo te kakai folau kotoa pē, mo te kau kauvaka, mo ia kotoa pē 'oku ngāue 'i taí, ne'e notou tutu'u mei te mama'ó.
18 Pea 'i te notou sio ki te kohu 'o tana velá ne notou kalanga 'o pehē, “Ko ai ia 'oku tatau mo te fu'u kolo nā?”
19 Pea ne'e notou laku efu ki te notou 'ulú, pea notou kalanga 'i te notou tangi mo fakamamahí, 'o pehē,
“Pohoē! Pohoē! 'Ia te fu'u kolo nā,
'a ē ne'e ma'u koloa ai 'ia te kakai kotoa pē
ne'e ma'u vaka ke folau 'i te taí,
ko te me'a 'i tana fakatau lahí;
He kua lusa fuli pē 'i te houa pē taha.”
20 'E langi, ke ke fiafia kiā ia,
mo kōtou 'ia te kau lotú,
mo te kau 'apōsetoló mo te kau palōfitá;
he kua fakamāu'i 'ona 'e te 'Atuá
kote'uhí ko te 'ū me'a ne ina fai kiā kōtoú.
21 Pea ne'e hanga he 'āngelo mālohi, 'o hiki he fu'u maka hangē he maka momosi, 'o sī ki te taí, 'o pehē ia,
“'E pehē foki te sī ifo 'ia te fu'u kolo ko Pāpiloné,
pea 'e kailoa 'aupito toe 'iloa ia.
22 'Io, 'e kailoa 'aupito toe ongona 'iā koe 'ia te tā 'a te kau tā ha'apé,
mo te kau faivá, mo te kau ifi fangufangú, mo te kau ifi talupité;
pea 'e kala toe 'iloa 'iā koe te kau ngāue 'i te faiva kehekehé,
pea 'e kala toe ongona 'iā koe te longoa'a 'o te me'a momosí;
23 pea 'e kala toe ulo 'iā koe he maama,
pea 'e kala toe ongona 'iā koe he le'o 'o he tangata ta'ane mo he ta'ahine;
he ne'e hau 'i māmani tau kau fakatupu koloá,
pea ne'e takihee'i 'ia te 'ū pule'anga kotoa pē 'i tau fai fakalou'akaú.”
24 Kae'uma'ā ne 'ilo'i 'iā ia te toto 'o te kau palōfitá mo te kakai lotú, mo nātou fuli pē kua mate tāmate'i 'i māmaní.