5
Ko te takainga tohí mo te Lamí
1 Pea u vakai, tā 'oku 'i te 'aofi nima to'omata'u 'o Ia ne'e 'afio 'i te taloní he takainga tohi, kua tohi 'i loto mo tu'a, pea sila'i 'aki he sila 'e fitu.
2 Pea u vakai he 'āngelo mālohi 'oku ina fanongonongo le'o lahi 'o pehē, “Ko ai 'oku taau ke folahi 'ia te tohí, mo vete tono 'ū silá?”
3 Pea ne'e kailoa he taha 'i hēvani, pē 'i māmani, pē 'i lolofanua, ne'e mafai ke folahi 'ia te tohí, pē ke sio ki ai.
4 Pea u tangi lahi, kote'uhí ne'e kailoa 'ilo'i he taha 'oku taau ke folahi 'ia te tohí, pe sio ki ai.
5 Pea lea mai he toko taha 'o te kau mātu'á, “'Aua ke tangi, vakai, ko te Laione mei te matakali 'o Siutá, ko te Huli 'o Tēvitá, kua ikuna Ia, ko Ia ia 'e lava ke vete 'ia te tohí mo tono 'ū silá.”
6 Pea u vakai, tā 'oku tu'u 'i lotomālie 'i te taloní, mo te me'a ma'uli 'e fā, mo te mātu'a 'e uangofulu mā faá, he Lami, 'oku Ina tu'u pē kae hangē kua tāmate'í, 'oku me'atui 'e fitu mo te mata 'e fitu, 'a ia ko te Laumālie 'e fitu 'o te 'Atuá, 'a ia ne fekau atu ki māmani kotoa pē.
7 Pea 'alu atu Ia, 'o to'o te tohí mei te nima to'omata'u 'o Ia ne'e 'afio 'i te taloní.
8 Pea 'i Tana to'o 'ia te tohí, pea tō ki lalo 'i te 'ao 'o te Lamí 'ia te me'a ma'uli 'e faá, mo te mātu'a 'e uangofulu mā faá, 'oku notou to'o taki taha he ha'ape, pea mo te 'ū ipu koula kua fonu 'inisēnisi, 'a ia ko te 'ū hū ia 'a te kakai lotú.
9 Pea ne'e notou hiva 'aki he hiva fo'ou, 'o pehē,
“Taau pē 'ia Koe ke to'o 'ia te tohí,
mo vete tono 'ū silá.
He ne'e mate tāmate'i 'ia Koe,
pea ne'e huhu'i kakai 'e Koe mo'o te 'Atuá 'aki Tou ta'ata'á,
mei te matakali mo te lea,
mo te fa'ahinga mo te pule'anga kotoa pē.
10 Pea ne'e ngaahi 'ia nātou 'e Koe
ko te pule'anga mo te kau taula'aliki,
pea 'e notou hau 'i māmani.”
11 Pea u vakai, pea tā ne'e ongo mai te le'o 'o he kau 'āngelo tokolahi, ne'e takatakai ki te taloní mo te 'ū me'a ma'ulí mo te mātu'á, pea ko te notou laú ko te 'ū mano laui mano, mo te afe laui afe;
12 pea 'oku notou kalanga le'o lahi, 'o pehē,
“'Oku taau pē 'ia te Lami ne mate tāmate'í
ke lau kiā Ia 'ia te mafai, mo te koloa,
mo te poto, mo te mālohi,
mo te faka'apa'apa, mo te kolōlia, mo te fakafeta'i.”
13 Pea ne au fanongo ki te me'a ma'uli kotoa pē ne'e 'i hēvani, mo māmani, mo lolofanua, mo te taí, mo te 'ū me'a kotoa pē 'oku 'i aí, 'oku notou pehē,
“Ko Ia 'oku 'afio 'i te taloní pea mo te Lamí,
ke 'o Nāua 'ia te fakafeta'í, mo te faka'apa'apá,
mo te kolōliá, mo te mālohí,
'o lauikuonga pea ta'engata.”
14 Pea ne'e pehē 'e te me'a ma'uli 'e faá, “'Ēmeni.” Pea ne'e tō ki lalo 'e te kau mātu'á 'o hū.