Jon lus kere lulwepe menmen wuso Ma Ili kosawo pepe
1
1 Yousi pepei pe pirpei pire menmen wuso Ma Ili watowo Jisas Krais piti ma kosape mete piti pesio towa lite Ma Ili lepe, kosape lire menmen fei pepe piti wem kurauye pe ma fale. Krais laisi riri lele lau kosawo Jon, metine piti lesio towa lite Krais, kosawo lire menmen fei pepei,
2 le Jon nampli lirpei lire menmen yeflipiye wuso lus kere lulwepe pepe. Jon laptei il pepei lirpei lire il pite Ma Ili, le il punkom wuso Jisas Krais leptalo pepe.
3 Metine piti lungunape il paitei yousi pepei, le ma onom teingine, le minemple piti pingitepe re pingiepe il pite Ma Ili wuso paitei yousi pepei, pe re ma enke teingipe, wusoli wem olo lire malfemye piti menmen fei pepei ma fale.
Jon leisipe nimoure mete pite Ma Ili pele wuso pratei uf pire eti plen poungo te twinges
4 Ki Jon, ki kaptei il pepei pe ise nimoure mete pite Ma Ili pele wuso ratei uf pire eti plen poungo te twinges pato tef lite Esia.
Ma Ili miso laileleise re luntolise le ise ma ratei yire enke malye. Le Ma Ili liti sungoitei liye ratei le le fei ratei, le le ma ratei lolpepe lingi wem wem, le liripe ririm pele pire eti plen poungo te twinges, pe piti pesio towa lele le pe pilowo malfem pire flenge pele piti lifei,
5 le Jisas Krais, le metine piti leptalo il punkom pite Ma Ili. Le ninge oru lite Ma Ili lele wuso la wolo Ma Ili nou leila linu. Le metine piti luntoluwepe mete lipi re men nange pite tef lepei.
Le onom puwouku, le le kanouku wem le la le teluwi pele noro kaptetei il olpe pouku,
6 le le kanouku fale mire mete teingipe pele piti kanowo mesio towa lite Ma Ili, le yaitei lele. Ku meila nange lite Jisas Krais, nange ili re singe pite le pele loteteiye wem oli oli. Punkomtei.
7 Ise yingitei, le ma luwowo nopom yuwei lau. Mete yeflipiye pite tef ma puluwo, le pe potei piti petesi la lepe re, pe ma puluwo. Mete yeflipiye piti tef ma poutuwo olpetei wusoli pe turwepe pasio. Punkomtei.
8 Ili, le Ma Ili Singetei, le lirpei lolpepei, “Ki liti kinu le ki liti kingi. Sungoitei liye ki kratei, le fei ki kratei, le ki ma kratei kolpepe kingi wem wem.”
Jon lus kere luluwo metine watafei Krais
9 Ki Jon line winke leise, piti kulpowo Krais le ki kila moingi watafei ise. Ku yeflipiye mratei mungario Krais piti ma nou lau luntoluku le ku yeflipiye ma mapiri enke pouku wem ku mila moingi louku. Pe topiki pilaiki pe peiteiki ratei tef kumpu pinawo Patmos, luwo peryai nimin. Pe peiteiki ratei lepe wusoli ki keptalo il pite Ma Ili le ki kirpei nomnaipe kire Jisas Krais, le ninge lite Ma Ili, le le metine liti kanouku.
10 Epli wem nele, le wem ili piti ku rautuwo Ma Ili, Riri lite Ma Ili lele leipoiki keteiki le ki kingitepe il lipi nemple minu pireiripe wata pirpolo putupa wengle lepe, le il pepe pirpei faleiki tounga.
11 Il pepe pirpei polpepei, “Aptei menmen wuso ulwepe pepe le ye aptei yousi pepei pe nimoure mete pite Ma Ili pele wuso pratei uf piti pire eti plen poungo te twinges, uf nange pelpe: Efesus, Smerna, Pergamum, Taiataira, Sardis, Filadelfia, le Laodisia.”
12 Ki kile weitei kuntoli tounga piti kuluwo minele so lile lirpeiki lepe. Ki kile weitei le ki kulwepe pepe pelpe piti pepletei weli watafei sakulou pepe wolo pepei pelpe pire gol pesiepe. Pe pire eti plen poungo te twinges pile.
13 Le nimin lite pepe pelpe piti pepletei weli pepe, ki kuluwo wata pirpolo metine nele lile, le lalfo olol ulel le noro ire yepe tef le le lari foiyou gol lifei neinowo onom popo.
14 Oru lele fiyutei watafei sipsip oru lo watafei nopom fiyutei lepe, le lutepe pele pini wata pirpolo weli loli ratei.
15 Ire yepe pele re pini wata pirpolo ye kali ila tomiyo altei weli so linitei lepe, le il fale nemi lele olo iplitei wata pirpolo etingi ili lifei konkongo ingelem.
16 Le lire eti tilpi lele lesiepe tauri pire eti plen poungo te twinges, le werau olo neltei, nel linge plen plen, fale loli nemi lele. Mi mati lele kuna linitei watafei epli lini lirkilau lepe.
17 Wem ki kuluwo, ki kuwalo ratei ire yepe pele, olo ka kire pulouye. Le leltalo eti tilpi lele luwoiki le le lirpei lolpepei, “Ye turiye kolo, ki piti kinu le ki piti kingi.
18 Ki metine piti namin kratei kolpepe. Ki ka fei wolo ye untoli, ki wala namin ratei wem oli oli. Ki kuntoluwepe wingi piti mete pa le pe noro pe pratei uf lite towa pratei, le ki singe piti nou kesipe kau kaptei yawi le ki watepe nempi liti nampir pratei.
19 Aptei menmen wuso ulwepe pepe, menmen piti ma fale wem fei lepei le menmen piti ma fale wem lingi.
20 Il pal pite tauri piti pire eti plen poungo te twinges wuso ulwepe kesiepe eti tilpi pepe, le pepe wuso pire gol pesiepe piti pepletei weli, pe re pire eti plen poungo te twinges, il pal pelpe pato polpepei, tauri wuso pire eti plen poungo te twinges pepe, pe pilepe ririm pire eti plen poungo te twinges le pe niliyeye niliyeye puntoluwepe nimoure mete pite Ma Ili wuso pratei uf piti pire eti plen poungo te twinges. Le pepe wuso pire gol pesiepe piti pepletei weli le pe pire eti plen poungo te twinges pepe, pe pilepe uf piti pire eti plen poungo te twinges wuso nimoure mete pite Ma Ili pele pratei pepe.”