2 Yohane
1
Yohaneŋo Kibi Atak Etke Qeke
1 Na doku tau tau magu eŋane ŋetneŋo ŋerep waom ge so gipon borasokopŋone doku tau tau magu ŋinane kibi iwa qemaile, na welekatneka wet maep okan ŋun okan maile. So weku noŋoka mida, don welekatne detmami, eŋe weneŋ koropŋo wet maep okanŋun okan mami.
2 Onokawane, Anutu wane don welekatne, yewaŋo ŋenane kotozo metmaike so, yale ŋenerop baŋ papatogon pa ariake.
3 Anutu Magak so Yesu Kristo, Magak wane Gipole, eto mosop, qom borik so peam maine ŋebonikeit, don welekatne so wet maep ŋo maine ŋenane okangeik.
Wetzeŋo Wet maep Okanikenane Don
4 Gipon borasokopŋone natne eŋe Magakŋo pidonine ŋedange yewa teweke more don welekatne maine malipka gemami, na kineŋine yale detpe paki wetne pesemaike.
5 Eso ea wane ŋerep waom, na yale golatmaile, ŋene kimakopze korop wet maep okan onikene. Iwamo pidon musele mi qe ŋibon maile, iwa pidon sogine, ŋene mo qei kieke ma ge sarikone yewaka qe ŋibonmaile.
6 Na wet maep iwa wane ramaile, yemo kine iwayale: Ŋene Anutu wane pidon teweke more ea wane rokopko gekene. Ŋine koropŋo pidon qei kino detkoi, yemo iwa ŋine korop wet maep korop gekei.
Ŋene Kristo Wane Don Togogole Magekene
7 Isisi ŋei loutne wakongoi, kepe baŋem rokopke ge arimami, eŋe iwayale ra okanmami, Yesu Kristo eŋe ŋei okane mi wakonge, yale rau paki bisopke okanmami, ŋei yaline eŋe isisi ŋei so Kristo wane Ŋabakoune.
8 Ŋine kine kine wele maratkaikei wane urataine mamami, ea wane weleine siuke ŋiboniakane diam togogole maikei, paki baŋ ge mage ea wane turuŋine wele zok manerop wat watko maratkaikei.
9 Ŋei mane eŋe Kristo wane don togogole malipkaki paki yewarop mi geake, eŋe yuanka don mane wano ariake, eŋe Anutu ŋadekkayake. Ŋo mane eŋe Kristo wane don togole malipkaki paki yewarop geake, eŋe Magak so Gipole ere weneŋ eretnarek eŋerop gekei.
10 Ŋo ŋei mane sari ŋinano lotkeake, eŋe don yewa mi ma sariake, yemo ŋine misuk don awoka more mat ŋino rau wayake. Pakiso “Peamŋo gerop payake”, yale misuk raikei.
11 Mane eŋe ŋei yaline kima okankaki paki, peamŋo eŋerop payakane olasiake, eŋe gege mageine qotkoine yewa qesiŋkaki eŋane kimaine okan maike.
Don Qoiqoine
12 Na don loutne qe ŋibonikalane detmaile, Ŋo siluŋ don iwa papiao peada so tideŋo mi qe ŋibonikalane wetkemaile. Ea wane turuŋine yemo noŋom ŋunbe ŋinerop don aukene, paki na so ŋine wet pesek suaine desikene.
13 Qa maep ŋonane gipon borasokoune eŋe geŋane “kaiwe maine” ra more motpi geŋane umaike.