2
Matsh g Paul am i ha chehgim g Jerusalem t am hahaꞌichu
1 Am him k am d i wehst-mahm aꞌahidag, nt am hih Jerusalem wui wehmaj g Barnabas. Tt am hema i bei g gawul mahs oꞌodham. K id hab chehgig Titus.
2 Jiosh o wa ab ni-chehgid mant am wo him k wo ha nei hegam mo am d ha wanimeddam g Jesus ihmdam. Kutt am ha wehm t-nam. Ni am ha ahgid mani haschu i ahgachug am ha-shahgid g gawul mahs hemajkam nani pi s-gihug matp hems haꞌi wo padch g ni-chikpan.
3-5 K am haꞌi haꞌichug hegam mo chum s-em-wupulshpamk ahpim gawul mahs hemajkam hab em-elidch mant hemho wa am hab wo junihid g heki hu t-himdag ahchim Tutuligo. Idam o pi woho wohochud g Jiosh haꞌichu ahga ab amjed g Jesus ch wabsh am dadhak ch chum mamche machs haschukaj pi am hu oidch hab junihim hegai heki hu t-himdag. Am o t-wehmaj g Titus. K idam ab si t-ahgid matt hemho wo wa pahl hikuch. Kuch wabshaba ab ha wui gegok. K hegam mo am d ha wanimeddam t-wepo hab elid. Neh, bach wa masma s-ap nuhkud ihda s-kehg haꞌichu ahgaj g Jiosh mach am em-wui ahgachug.
6 Do wabsh ni-wehm wohochuddam hegam mo am d ha wanimeddam ch pi haꞌichu wechij ab hu ni-ahgid. Pi ani si has ha elid. Wehsijj ach t-wepo d hahaꞌichu am Jiosh tahgio.
7-8 K hegam hab kaij matki g Jiosh am hab waꞌap i ni-kei hab masma mat am i kei g Peter. Heg o d kehshaj ch am ahgachug g s-kehg haꞌichu ahgaj ha wui g Tutuligo. Ni ahni hab waꞌap d kehshaj ch am ahgachug ha wui g gawul mahs hemajkam. K g Jiosh wepo ab t-mahkch g gewkdag.
9 Bamki ha elid hegam James ch Peter ch John mo d ha wanimeddam. T idam am wohokamch mat g Jiosh ab ni-mah ihda chikpan k t-nowi-bebhe. Kutt am i t-apꞌech ab t-wui mat hegam am wo ahgachugad g Jiosh haꞌichu ahga Tutuligo hemajkam ha wui. Nt ahni hi g Barnabas wehm gawul mahs hemajkam ha wui wo ahgachugad.
10 K hegam hab t-ahg matt wo i ha wehmajk hegam mo d shoꞌigkam am ha shahgid. Am ani wa heki hu hab junihim ch hekaj si chikpan.
Matsh wa g Peter am shohbi g Peter
11-12 Am ani wa kih Antiok kihhim t am ch am ha ahgid g Jiosh haꞌichu ahga. T am jiwia g Peter k am ha wehm oimmed hegam goꞌol hemajkam mat ab i s-wohoch g s-kehg haꞌichu ahgaj g Jiosh. T am hahawa haꞌi t-wui dada g Tutuligo ab amjed g James. K heg i dahm g Peter pi an hu ha wehm oimmed g goꞌol hemajkam ch pi ha wehm e gegosid no pi s-ehbid mat has wo chei hegam Tutuligo.
13 K hegam ehp mo hab waꞌap d Tutuligo hab waꞌap e wua mo g Peter, chum wa hems g Barnabas.
14 Ni am ha neid mo pi am hu shaꞌi ap hab junihim g e-wohochudadag ch hab kaij ab wui g Peter am ha kaichudch, “Neh, Peter, dap Tuhligo ch wabshaba hahawa pi am hu hab junihim hegai t-himdag mo wa g Jiosh ab t-chehani. Pegih, p haschu ahgch hab e elid mapt pi wo ha hajunimak g goꞌol hemajkam, t hoꞌip am hab i junihi g t-chehanig?”
Tutuligo ch goꞌol hemajkam at heg waꞌi hekaj wo e doꞌibia e-wohochudadag
15 Ahchim Tutuligo ach wa hab chum t-elid mach pi hab masma pi apꞌe mo g goꞌol hemajkam.
16 T wabshaba am i t-chehgi g Jiosh mat pi hedai wo e nako mas am tahgio hejel wo i e apꞌech am hab junihidch g chehanig. Bo d elidaj matt ab wo i s-wohoch g haꞌichu ahgaj k ab wo i hiwigi g Jesus Christ. T heg am tahgio wo i t-apꞌech. Pegih, tt heg am hab waꞌi juh k am i t-apꞌech.
17 Am att i s-mai mach d pi ap chuꞌijkam am i s-mahchk ab amjed g Christ. Pi at heg hab t-juh machs d pi ap chuꞌijkam
18 k wabshaba am i t-apꞌech Jiosh tahgio. Kutt d wo pi ap chuꞌijkamk mattp wo chum s-t-apchudam g chehanigkaj.
19 Chehanig o s-hasig. Kutt pi wo t-nako machs am oidk hab wo t-junihid ch am wo i t-apꞌech. Nt heg hekaj am i ni-dagito Jiosh wui mat am wo i ni-apꞌech k am hahawa d wo doakamk wehhejed.
20 Jiosh alidag o ab si pihk e elid t-hekaj ch ab nako g s-koꞌok muhkig ab kots t ab am t-wehhejed mat heg hekaj ab wo i t-mah g wechij doakag. Kuch heg hekaj ab hiwig ch d dodakam am nenaj ed ch am wehhejed.
21 T wabsh wo e nahnkogi g Christ muhkig matp g oꞌodham wo e nako mas wo s-apꞌek am Jiosh nena ed heg wabsh hekaj mo hab junihim g chehanigaj. K wabshaba pi hab chuꞌig. Ab o t-wui him g Jiosh hoꞌigeꞌidadag heg hekaj Christ muhkig. Kutt pi wo dagito g hoꞌigeꞌidadaj ab hiwigch g Christ.