3
Jon oh Jisas ohe aprin mandap ma amanhetip ohe meng oh
(Matyu 3:1-12; Mak 1:2-8; Jon 1:19-28)
1 Rom ire gapman oh Taibirias Sisa oh duuptei kakhan hat patin krismas rumhei ama birhitip oh. Gahan ihat patina ohe hrep oh Pontias Pairat oh Judia mong ohe duuptei gapman ham patesuhmur. Herot oh Gariri mong ohe duuptei gapman ham patesuhmur. Herot ohe nap Pirip oh Ituria mongsi Trakonaitis mongsi among yot ohe duuptei gapman ham patesuhmur. Raisenias oh Abirini mong ohe duuptei gapman ham patesuhmur.
2 Ihat patin Anassi; Kaiapas ihithe hanat bok han ire duuptei han hat pateshemur. Ama ire ihat pateshe dik oh Sekaraia ohe mon Jon oh irat timbas hanip timbas dusnong oh sus patesuhmur. Sus patin Got oh orhe meng oh Jon ohe da mutuhnong ama matip oh.
3 Imtiporhan oh susa Jodan but mong aptei aptei oh sus Kuuhan ihirnong Gure er hat sapti pe oh Got oh er yan naham gure boknong napripramur ma dahat pat yan oh it yansi na naham hanhan mar ha mandatinoha daham da tamburketinmuro. Da tamburkera kuuhan ihir Gin er danong kom asar mandaya ma hapat ha dahengwe rim tom wayonmuro pot ama pisasuh oh.
4 Pot ma pisasuh oh rih Got ohe meng ritporhan propet Aisaia ohe brak matip mengru mat pisasuhmur. Ritporhan Aisaia ohe ma brak matip meng oh mamarumur.
Irat timbas hanip timbas dusdapat han tit aprisa We. Hanipyah ohe aprin mandap oh duutinwi mar amanhem amamen matinmuro.
5 Ma amamen matipri oh tom but mong ma gonsi pat mong oh mongsi teip matiprimuro. Teip mara yei monghe gatong pora tap kat tit tanwi matiprimuro. Mandaphe tathosi mandap oh duutin mandapwi matiprimuro. Runo wano mandaphe tap kat yahnap tan titwi matiprimuro.
6 Imtiperhan kuuhan gonsi ihir Got ohe namburpat da oh wamar am hatiprimuro por uarpatmur.
ritporhan Aisaia oh brak matipmur.
7 Amaru hat orhor Jon oh Aisaia ohe ma brak matipru hat patin kuuhan kat gon ruumsan ihir ohe patnong ama apdapa oh. Apriperhan Jon oh Gur ina teimdapat yah hat pati hatin hat pati orhora; damdapat inapawam bap hatin hat pati han bap gurmuro. Gurnong nih Gur tomwi wayahanoh gure er hat saperhan Got oh heisup naham er yan napinmat kakduup mamen mat ma nat pat oh dat namdatiprohmur nih naporit gur tomwi wapero daham apripti.
8 Gur tomwi wapero daham apripti gur guragure er hat sapti da oh mandatperhan ihir wanaham Ire er hat saptingweri da oh gin mandata ma hapat. Gin yah hatwi sapti ma hapat dahatin da oh ihirnong pinggit pisaptidapat apris tom wayonmur. Gur Nuhur Epraham ohe puh nuhur ohoh ihan Got oh batbet yan oh na napriprawa ma dahapti da oh dahapri. Gur Nuhurwi Epraham ohe puh ohoh ihan er dasi hat patin orhor nambutiprawa dahapri. Basra. Wan kweinong mohhe Got oh Epraham ohe puh matin hatinmur.
9 Gin orhor Got oh sen marima irat gwe moh dam na timahanoh kakersi gatmar mandatinmat mamen tahat patmur. Ihat mamen tahat pat ohoh ihan yah hat son ohe da oh dam na timahan ama dam na tima han gurnong irat ohe tan sen ohsi kakersi gat nahama irat teinong nahatipramuro ama giporisuh oh.
10 Giporpatin ihir Ihan nuhur yah hat indinmat kinhatper por ama dahamtipa oh.
11 Por dahamtiperhan oh Gur watah yot hat patihanoh tit watah timbas hat ma pati han ihirnong aprishenmur. Denhe timbas hat pati han ihirnong ti aprishenmur ama potip oh.
12 Potporhan takis yan ma daripti han ihirhe aprisa Jon ohnong Tisa. Nuhur yah hat indinmat oh kinhatper por ama dahamtipa oh.
13 Por dahamtiperhan Jon oh Gur gapman ohe takis yan ma daripti oh iraire ma naporiya kis orhorwi darinmur. Titsi napin por wan ohsi adaripri ama potip oh.
14 Potporhan Rom ire dupsi han bap ami ihirhe aprisa Gin nuhuroh yah hat indinmat oh kinhatiprohe por ama dahamtipa oh. Por dahamtiperhan oh Gur ire mani adatinmathe guragure kasip haya ohe pe oh net por adaripri. Tit oh ire mani oh adatinmat Noh gonong Oh ihat er hat patgwer hanmur potiprohmur pora dasuh kas meng por ire mani oh behe adaripri. Guragure tamreim mani ma dariptihe Titsi napriyaneng dahapri. Guragure kis ma napriya oh Yahwa dahat patenmur ama potip oh.
15 Jon oh ama ihtin meng oh kuuhan ihirnong porpatin ihir amrama Gin Got oh ihirnong amburin han tit adarhetipramur rim ma kis matip han Krais oh gin aprin kakduup hah ma hapat ama dahatpa oh. Dahat pati tei ohoh ihan Mama han moh Krais orhorda da Krais oh kom apripra ihat daham ama apetpa oh.
16 Ihat daham apetperhan Jon oh Es. Noh oh basmur. Noh tomwi napatirpatmur. Kasipnap han oh kom apripramur. Ma apripra han oh kasip isipsi han oh apripramur. Nohe kasip oh ohe kasip hrepdapat hat patepramur. Oh kasip yahnapsi han ohoh ihan noh bisei han hatin hat pat ohoh ihan noh orhe tongap nangnong noh na arpitin inasi hat patmur. Ihtin kasipnap han tit aprisa gurnong Got ohe Yahsup ohsi; gure danong nahirmatin ohe irat has hatin ohsi nohe tom ma napatirpatru nahat gure mutuhnong namtipramur.
17 Ohe ma apripra oh wit gwe pomtin ohe sapor ohsi marim apripramur. Aprisa ama sapor ohsi aim orhe dam orhe matinmat saksak matipramur. Saksak mara wit dam oh orhe saripti apnong matipramura; aim oh ruprup mara hirmar irat teinong matipramur. Irat teinong ma matipra irat oh na tikimapat irat teinong matipramur ama potip oh.
18 Jon oh amaru mat orhor kuuhan ihirnong Got ohe yah meng oh sawa mengtei ama porisuh oh.
Kamoheim Herot oh Jon ohnong karapus matip ohe meng oh
19 Jon oh sawa meng imat porpatdapat gahan Gariri mong ohe gapman hat pat han Herot ohnong Go arwan ohe inap Herodias uhnong adaro gorhe ti er da ti er da hat uso ma ihat sapat oh go er hat sapat hanmuro ama potip oh.
20 Potporhan Herot ohe er hat ma sasuh da oh gahan tit ma er hatip oh Jon ohnong ambura karapus ama matip oh.
Jon oh Jisas ohnong tom patitip ohe meng oh
(Matyu 3:13-17; Mak 1:9-11)
21 Jon oh na karapus hat patina kuuhan ihir apriperhan tom patirisuhmur. Tom patirpatdapat gahan kom Jisas oh apriporhan tom ama patitip oh. Patitporhan oh maras kot tei oh Got ohsi mengripatin gahan aw tan mahat tanpura
22 Got ohe Yahsup oh ner kurwam hatin hat wandasa ohe bas oh tongnongopri. Tongnotporhan aw tei mahatdapat meng tit Jisas ohnong Go norhe bopor nahat napapat brermuro. Gwe ma ihat sapat oh norhor da yah ham amam nahat patmuro gipor hangopri.
Jisas ohe han ropir ire win oh
(Matyu 1:1-17)
23 Jisas orhe krismas oh 30 birhitporhan Gin tamreinpora daham orhe tamreindin oh duup mar ama tamreindip oh. Duup mara tamrein sapatin kuuhan ihir Han moh Josep ohe mon ma hapat ama dahashe oh. Josep oh Hirai ohe monmur.
24 Hirai oh Matat ohe monmur. Matat oh Ripai ohe monmur. Ripai oh Merkai ohe monmur. Merkai oh Janai ohe monmur. Janai oh Josep ohe monmur.
25 Josep oh Matataias ohe monmur. Matataias oh Emos ohe monmur. Emos oh Neam ohe monmur. Neam oh Esrai ohe monmur. Esrai oh Nagai ohe monmur.
26 Nagai oh Meat ohe monmur. Meat oh Matataias ohe monmur. Matataias oh Semen ohe monmur. Semen oh Josek ohe monmur. Josek oh Joda ohe monmur.
27 Joda oh Joanan ohe monmur. Joanan oh Resa ohe monmur. Resa oh Serababer ohe monmur. Serababer oh Siartier ohe monmur. Siartier oh Nerai ohe monmur.
28 Nerai oh Merkai ohe monmur. Merkai oh Edai ohe monmur. Edai oh Kosam ohe monmur. Kosam oh Ermadam ohe monmur. Ermadam oh Er ohe monmur.
29 Er oh Josua ohe monmur. Josua oh Eriesa ohe monmur. Eriesa oh Jorim ohe monmur. Jorim oh Matat ohe monmur. Matat oh Ripai ohe monmur.
30 Ripai oh Simion ohe monmur. Simion oh Juda ohe monmur. Juda oh Josep ohe monmur. Josep oh Jonam ohe monmur. Jonam oh Eraiakim ohe monmur.
31 Eraiakim oh Meria ohe monmur. Meria oh Mena ohe monmur. Mena oh Matata ohe monmur. Matata oh Natan ohe monmur. Natan oh Depit ohe monmur.
32 Depit oh Jesi ohe monmur. Jesi oh Obet ohe monmur. Obet oh Boas ohe monmur. Boas oh Sarmon ohe monmur. Sarmon oh Nason ohe monmur.
33 Nason oh Aminadap ohe monmur. Aminadap oh Atmin ohe monmur. Atmin oh Anai ohe monmur. Anai oh Hesron ohe monmur. Hesron oh Peres ohe monmur. Peres oh Juda ohe monmur.
34 Juda oh Jekop ohe monmur. Jekop oh Aisak ohe monmur. Aisak oh Epraham ohe monmur. Epraham oh Tira ohe monmur. Tira oh Neho ohe monmur.
35 Neho oh Serak ohe monmur. Serak oh Reu ohe monmur. Reu oh Perek ohe monmur. Perek oh Eber ohe monmur. Eber oh Sera ohe monmur.
36 Sera oh Kenan ohe monmur. Kenan oh Apaksat ohe monmur. Apaksat oh Siem ohe monmur. Siem oh Noa ohe monmur. Noa oh Ramek ohe monmur.
37 Ramek oh Metusara ohe monmur. Metusara oh Inok ohe monmur. Inok oh Jaret ohe monmur. Jaret oh Mahararer ohe monmur. Mahararer oh Kenan ohe monmur.
38 Kenan oh Inos ohe monmur. Inos oh Set ohe monmur. Set oh Adam ohe monmur. Adam oh Got ohe monmur.