2
Esẽya' ãjasame's Jesus nuykatxhini
(Mt 9.1-8; Lk 5.17-26)
1 Maz en skhẽwniijũ' Jesusa' ki'kin pa'kh Kapernaum çxhabte. Aça' nasa jiyutx Jesusa' pa'jçxa teeçx yatte ũsa' jĩni's.
2 Txãasatx naa dudte nasa wala pkhaakheçxa yat vxitxte jxuka uta, aça' Jesusa' Dxus yuwe's pta'sxku.
3 Naapkaçxha' pahz piçthẽ'jsa teeçx ẽsẽya' ãjãsameea's yakhçxatx Jesus tasxte nuypa'j.
4 Nawa nasaa ksxavxyte Jesus tasxte kuutxa'jya' ãjãmeeçxa', yat kajkweju phaadeçxatx Jesus ũsnikhẽ nuykĩh aadasga khikhçxa.
5 Txajũ' ãçã'sa's nuypa'jsawe'sxa' Jesusa' nuykatxhiyujuna sũhni's jiyuçxa', txãa ãçã'sa's we'wek Jesusa':
—Iidx pkala' peltunãyni yã'jtx neeyũu jĩte',
6 Dxus leya's kaapiya'jsawe'sx wẽsẽ'jna u'psa maaíi yu' na'wẽtx yajkx:
7 —¿Ma'wẽçxaga naa piçthẽ'ja' txã'wẽ we'we'? Dxus yuuçxáa pkaltxi peltunãyya' ãjawa'jsa', aça' jweeju yu' ¿kimçxá' peltunãyya' ãjãma'k? Aça' Dxusa's iiweeçx we'wena ũsa' sũjũ'tx.
8 Nawa Jesusa' txãawe'sx yaakxni's jiyuçxa na'jĩk:
—¿Kĩh yuutekwe txã'wẽ yaaki'?
9 ¿Maa thẽymeesakx? Iidx pkala' peltunãyni yã'jtx neeyũu ¿jĩniá'? Meeçxa': Kiiteçxa iidx deeni's tu'sçxa me'j ¿jĩniá'?
10 Makwe thẽysatewa Dxus Nçxi'k Nasa Yuusa' naa kiwete pkaltxi peltunãyya' ãjãwa'jsa' naa pa'ga kaajiyu'jya'wath ãçxha'. Txajũ' ãçã'sa's na'jĩk:
11 Idxa'sthu we'we': Kiiteçxa iidx deeni's tu'sçxa yatna me'j jĩçpkaçxha',
12 ãçã'sa' dudtey kiitena'wa txajx deeni's tu'sçxa u'kh, nasa thegna ũsiyna.
Txajũ' jxukaysa wala kuh yajkxna Dxusna weçxana na'jĩ'tx:
—Bagaçx yuhwa na'wẽ yũuni yu's iiuymeetha'w jĩ'tx.
Mateo's Jesus pa'yani
(Mt 9.9-13; Lk 5.27-32)
13 Txãa e'su' Jesusa' ki' u'kh ĩkh wala pukan. Aça' txajx tasxte nasa wala pkhaakhete', Dxus yuwe's kaapiya'kh.
14 Txãajũ ki' u'jçxa', Alfxeo nçxi'k Levxia'sku uy, gobierno jĩi vxyu pkhakhna u'pte. Sa':
—Adx yakh myuh jĩna pa'yaçpkaçxha', Levxia' kiitena' Jesus yakh u'kh.
15 Txajũ' Jesusa' txãa yakh u'jusawe'sx yakh Levxi yatte ũ'ya' u'kate', gobierno jĩi vxyu pkhakhsawe'sx vxite' pkalsawe'sxwa wala kuhsa pkhaakheçxa' Jesus yakh mesate ũ'ya' kaçxtxi.
16 Aça' Dxus leya's kaapiya'jsawe'sx vxite' fxariseowe'sxa' Jesusa' nasa txã'wẽsa ksxavxyte u'pte uyçxa', pẽjxtxi Jesus yakh u'jusawe'sxtxi:
—I'kwe'sxtxi kaapiya'jsa ¿ma'wẽçxaga gobierno jĩi vxyu pkhakhsawe'sx vxite' pkalsawe'sx yakh ũ'wé'? jĩte',
17 txã'wẽ pẽyiçte Jesus wẽsẽ'jçxa' na'jĩk:
—Yu'çe'jsa's jxpeejxmeeta' aka ji'phmée wẽt ũssa', naasáa ãçã'sa yuuçxáa yu'çe'jsa's jxpeejxta'. Adxa' naa kiwete nasa ewsatx pakweya' kĩhmeeth, pkalsatx pakweya'çxáath kĩh jĩk.
Yũunani's Jesusa's pẽyni
(Mt 9.14-17; Lk 5.33-39)
18 Teeçx ente', Juan yakh u'jusa vxite' fxariseowe'sx yakh u'jusa txã'wẽ yũunaana ũste', nasa' paapẽjxtxi Jesusa's:
—¿Juan yakh u'jusa vxite' fxariseowe'sx yakh u'jusawe'sxa' yũuna'tx, aça' idx yakh u'jusawe'sx yu' ¿kĩh yuuçxata yũuna'çmée? jĩte',
19 Jesusa' na'wẽk kaaja'da'jna pas:
—¿Novxiowe'sx kaba ente pi'kxnisa' yũunaaya' ãjãma'tx? novxio txãawe'sx yakh nee ũsiite'. Kabani fxiesta pçumeyte', yũunaaya' ãjãmeetxna.
20 Nawa novxio' txãawe'sx tasxu txuteewa'j en pa'jana, txãjũ isa yũunaatxna.
21 Ropa ĩisx suteniite, tela u'sesa yakh ya'pã'khe'çme'. Txã'wẽme', tela u'sesa' jweeíiçxáak sude' ĩisxsa's.
22 Txã'wẽy beka u'se aahnisa's slun ĩisxsate ya'awu'çme'. Txã'wẽme', beka u'sesa' slun ĩisxsa's sude'k, aça' beka yakh slun yakh e'zíi vxitu'tx. Txãa pa'ga beka u'sesa's slun u'sesate awwa'ja' jĩk.
Jxkaase entewa skuutxhtxi çxuktedeçxa ũ'ni
(Mt 12.1-8; Lk 6.1-5)
23 Teeçx sapatu jxkaase ente', Jesusa' skuutxh ehsuk skhẽw. Aça' txãa yakh u'jusawe'sxa' skuutxhtxi çxuktedeçxa ũ'tx.
24 Aça' fxariseowe'sxa' na'wẽtx pẽjx:
—¿Uyu'gá' idx yakh u'jusawe'sxa' ma'wẽçxata mjĩi en meetewa txã'wẽ yũ'? jĩte',
25 Jesusa' na'wẽk pas:
—I'kwe'sxa' Dxus librute iilẽeymeewá'kwe Davxida' ¿kĩhga yuu? txãa yakh pi'kxna u'jusawe'sx yakh teeçx ente' wẽeçxa'.
26 Sacerdote npiiçthẽ'j Abiatar ente' dxuus yatte u'kaçxa, kxtee pantxi ũ'k, sa' txãa yakh u'jusatxwa ũsu'sku. Txãa pana' naasáa sacerdotewe'sxçxáa ũ'wa'the jiiçxawa txã'wẽk yũu.
27 I'kwe'sxa' mjiyuwe: Jxkaase ena' nasatx selpiwa'jsa íiçxá', nawa suwwa'jsa yu' me'.
28 Txãa pa'ga Dxus Nçxi'k Nasa Yuusa' jxkaahwa'j ji'pha' makwe sapatu jxkaase entewa jĩk.