26
Jesus Gipetunyapu Ahegbetepye Ginetnikis Adahan Giwmasepten Jesus
Mk 14.1; Lk 22.2; Jo 11.47
1 Pisenwa gawnhan inakni, ig Kiyapwiye Jesus awna ta wothu gikannuhnipwi akiw. Giwn:
2 ―Yis hiyakni ku pineme hawkri msekwe adahan upetrawiy adahan wixwiy hiyeg judeyenepwi axne muttuhyan arih. Wixwiy axni adahan kiyene ku samah minikwak Uhokri umahkise muttuhyan gidukwenaprikkis amekenegben adahan ig giwiwhkiswitnikis giwakutakkis gipetunyapukis. Ayge abet ini fet nah ku pariye wageswe awayg amadgaya inin nah kamaxwikanek adahan nah deddehpika aminat ah.
3 Apimwata ini ku samah ig Kiyapwiye Jesus awnempiye inakni yuwit, nerras muwpeg kiyatyepwi gikakkis nerras judeyenepwi giwewkistenkis igkis pahadguhwa gipinekut ner muwpegpiyene gikiparakis kewye Kayfás.
4 Ayge igkis ahegbetepye ginetnikis igkiswonas. Igkis awna:
―Amawka ku wixwiy umahkise Jesus. Uyay kamaykiswig ku aysaw ig ka wahapnima.
5 Henneme igkis awna:
―Ka ik adahan wixwiy kamaykiswig abet fet. Nawenétke hiyeg fetyapu hahhayruke ukakwiynek gipatra.
Pahapu Tino Imiha Jesus
Mk 14.3; Jo 12.1
6 Igme Kiyapwiye Jesus msekwe ay nipit paytwempu Betâniya ayge gipineku kiyapwiye Simawh. Igme kiyapwiye Simawh minikwak ig axpusakare apit busukne.
7 Ayteke nikwe pahapu tino danuh atere git. Eg ayta akak imihgi agiku pahá atiy kehka tip seyno. Ini imihgi kanitiwnisima. Eg tino danukwa kennesa git Kiyapwiye Jesus ku samah ig aynete axne. Ayteke eg dimuke ini imihgi gitewhait.
8 Usuhme gikannuhnipwi hiyapni henne, usuh dagawne. Usuh awna:
―Mmahki ini imihgi he sarayhkanen waditnepyenen henne?
9 Waké in ka sarayhkama henne, ikkam adahan in piyukwika adahan kaayhsima karukri. Ikkam adahan akakurapig ibekhepka gipuriwkis madiptapye.
10 Igme Kiyapwiye Jesus hiyapni henne, ig awna wothu:
―Mmah yis mbayha no tino gutew henne? Ka ba yis hiyá eg kehno kaayhsima kabayka nukakhu?
11 Hiyawa apanenekwa yis keh kabayka gidahankis madiptapye. Henneme nahme ka msakwa yibet apanenekwatma adahan yis kehne kabayka nukakhu.
12 Eg imihepun adahan nahegbetepten adahan nah apuhpiki.
13 Aysawnemenek hiyeg ekkene kibeyne inetit numinhu muwwapu amadga inin. Amun ini ginetnikis ignes kinetihwanek amin inin kabayka ku pariye eg keh nukakhu. In gukehni msakwa akiwka akiwkanek. Ihanabay inakni nuwnhu. Hennewatbaki in.
Judas Iskariyotis Ahegbetepye Ginetni Adahan Kamaykis Jesus
Mk 14.10; Lk 22.3
14 Igme pahapwi waytakhu usuh giwatnipwi, ig Judas Iskariyotismin, ig timapni henne, ig awna ginaktin:
―Kuri nah kamaykiswigte.
Ig tipik ta gimkanitkis nerras muwpeg kiyatyepwi.
15 Ig danuh atere, ig awna gitkis:
―Aysamuk yis katiwnihun adahan nah ikepri ta yiwakuit?
Igkis timapni henne, igkis katiwnihpig mpanamku madikwa (30) karukri wahano seyno.
16 Ayteke ariwnteke ini ig gihapu Kiyapwiye Jesus adahan ig hiyá ku aysaw gihawkan danuh kabayhtiwa adahan ig kamaykiswig.
Iwetrit Ahegbet Adahan Jesus Fetya Gikakkis Giwatnipwi
Mk 14.12; Lk 22.7
17 Ayteke ariwnteke ini pitatye hawkri danuh adahan ini fet adahan hiyeg axne muttuhyan arih akak bugut miyegbiye adahan kiyene ku samah minikwak Uhokri umahkis muttuhyan gidukwenaprikkis gihiyegapu. Ayge nikwe gaytakkis Kiyapwiye Jesus gikannuhnipwi danuh ta git. Igkis ayapri:
―Kiyapwiye, kineypa pimawkan adahan usuh ahegbeta pahapwi muttuhyan adahan waxniwiy abet upetrawiy?
18 Igme kaytwa giwnkis:
―Ataknay ta paytwempuit Jerusalém. Ayge yis patiptak gikak pahapwi awaygnek. Awnanay ta git ku yikannuhten awna: “Nuhawkanaprik me danuhmet. Nupewkan nah axne muttuhyan arih ay pipinneku payak gikakkis nukannuhnipwi.”
19 Igkisme gikannuhnipwi timapni henne, igkis ihe giwn. Ayge nikwe igkis tipik ahegbete madikte adahan usuh fetya axne muttuhyan arih. Pisenwa igkis diyuhe ta git Kiyapwiye Jesus.
Jesus Akki Ku Pariye Gikamaykiswitni
Mk 14.17; Lk 22.21; Jo 13.21
20 Aygete usuh atere fetya. Usuh danuh atere, ig Kiyapwiye Jesus bat aranwa axtet ukakhu usuh giwatnipwi madikawkunene ukebyi gikakkis piyana wawna (12).
21 Ku samah usuh aynete axne, ig Kiyapwiye Jesus awna wothu:
―Pahapwi yaytak ay iggi kamaykiswennek ta gitkis nupetunyapu. Ihanabay inakni nuwnhu. Hennewatbaki in.
22 Usuhme giwatnipwi timapni henne, usuh wakaymnibdi kaayhsima. Usuh awnebdi pahapwimpi:
―Kiyapwiye, ku ka nawhnama kamaykiswep?
23 Igme Kiyapwiye Jesus kaytwa wownhu:
―Ner ku pariye mehbetene bugut nukakhu amadga paheknene miruk ignewatbaki nukamay kiswitni.
24 Nah ku pariye wageswe awayg amadgaya inin nah umahkiswenek ku samah Uhokri gannasan minikweknene kinetihwa numinhu. Amawka ku nah miyá henneme ner ku pariye nuwmasepten nah ku pariye wareswe awayg amadgaya inin iggi hiyá mbeyne kaayhsimanek nupatra. Ka kiskama ner awayg humaw amadga wayk.
25 Ayteke ig Judas Iskariyotismin ner kamaykistinene Kiyapwiye Jesus ig awna ta git:
―Kiyapwiye, ku ka nawhnama kamaykiswep?
Igme Kiyapwiye Jesus kaytwa giwn:
―Hennewa ku samah pis awna.
Jesus Kiyekiswa Gitkis Giwatnipwi
Mk 14.22; Lk 22.15; 1 Kor 11.23
26 Ku samah usuh axnenete ayge, ig Kiyapwiye Jesus iwé pahak bugut. Ig kabayha Uhokri. Ig sigkebdih ini bugut, ig ibekhepni upuriw usuh giwatnipwi. Ig awna wothu:
―Ahah. Inin bugut inin nihhu yidahan. Amapanay inin bugut, axnay niwntak.
27 Pisenwa gibakhan ini bugut, ig iwé pohow goblé. Ig kabayha Uhokri. Ig ikepni upuriw. Ig awna wothu:
―Higapnay niwntak, yis madikte.
28 Mmanawa inin win in numighu yidahan. Ig Uhokri ahegbete ginetni nukunewa akiw gikakkis hiyeg adahan ku samah ignes humaw gihiyegapu. Nahme pahapwiwa nah sukase numighunek gidahankis kaayhsima hiyeg kahadbe ini gahegbetawni in humaw kahadbe Uhokri bayahminigkis ariw gitaraksankis.
29 Kuri nah ka takunima higá win ay amadga inin akiw. Awetupye nah higá win juktah ayhté gimun Wigwiy gikumadukan nah higá nukunewa win yikak akiw. Ihanabay inakni nuwnhu. Hennewatbaki in.
30 Ayteke pisenwa uhigpan usuh pak apat. Ayteke usuh peswiye ta apitit ini waxri imuhgipitnene kewye Olipegpit.
Jesus Akki Git Pedru Ku Igme Wihwepye Giw
Mk 14.27; Lk 22.31; Jo 13.36
31 Ayge ig Kiyapwiye Jesus awna ta wothu:
―Ku apim inin tiyegim yis madikte ikiswennek awaku ini mbayka ku pariye me danuhmet nuthu. Mmanawa Uhokri gannasan minikweknene kinetihwa henne. In awna:
“Nah umahkis ner muttuhputne. Ayge nikwe gipigpu muttuh madikte ibekhewbet.”
32 Apim ini nah umehpikanek henneme nah kannikaw akiwnek. Ayteke ariwnteke nukankawni nah tipik pitati yapit ta apitit Galiléyamnaw.
33 Igme kiyapwiye Pedru timapni henne, ig awna git:
―Hiyawa madikte hiyeg ikiswep awaku ini mbayka ku pariye me danuhmet pit, nawhme ka ikispiti.
34 Igme Kiyapwiye Jesus kaytwa giwn:
―Ku apim inin mtipka pis wihwe nuwhunek. Apit tarakak awna pahaywowa gawnhan pisme ayipa wihwe nuwhunek mpamaput. Ihanaba inakni nuwnhu. Hennewatbaki in.
35 Igme kiyapwiye Pedru kaytwa giwn:
―Hiyawa nah umahkiswe payak pikak henneme nah ka wihwa piw.
Usuhme gikannuhnipwi usuh madikte awnenekwiye hennep.
Jesus Piriyepkaw Ayge Jetsêmani
Mk 14.32; Lk 22.40
36 Ayteke ig Kiyapwiye Jesus tipik ta apitit pahá iwetrit kewye Jetsêmani. Usuh gikannuhnipwi tipike gihapti. Usuh danuh atere, ig awna wothu:
―Batnay ay in. Nahme tahhan piriyepkewne.
37 Ig iwé kiyapwiye Pedru gikakkis kiyapwiye Zebedew gikamkayupwi piyananene gikebyikis igkis atak gihapti. Igkisme wewkiswe ataresa, ayge igme kapusa wakaymni. Ig kayah apititak giyakni. Ig ka daykiswekere arit ini patahwaki ku pariye me danuhmet git.
38 Ig awna gitkis:
―Nah wakaymni mpiynepepye apit nuyakni. Ini nupewkan umehpen pahayewpi. Nah tahhan piriyepkawte. Yisme msakwa aynewa. Msakwanay apuriw adahan yis piriyepkaw payak nukakhu.
39 Ayteke ig wewkiswe ataresa aynessa. Ig mabukwa ta waygboit. Ig piriyepkaw ta git Uhokri. Ig awna:
―Nighu, ba hiyá pisma mpitha ini mbeyne danuh nuthu? Ku pis mpithekere, uyá amnihun mpithin ndahan. Henneme ku in pimawkanwa in danuh nuthu, ka sam in danuh nuthu. Nah ka kehkere ndahan nubetki. Henneme nah kehkere pidahanwa pibetki.
40 Ayteke pisenwa gipigyepkawni ig diyuhe ta gitkis gikannuhnipwi. Ig uteprikis himekweke. Ig hiyapni henne, ig awna ta git kiyapwiye Pedru:
―Mmah yis ka hiyá yisma msakwa apuriw nukakhu aynesnima?
41 Apuriwnabay piriyepkawnabay marihwa yis ka isaksaw arit mbayka. Yitip ka isaksawkere arit mbayka henneme yipit amadgaya inin ik adahan isaksaw arit mbayka mmanawa yis yuma yawaygyisima nitiput.
42 Pisenwa gawnhan inakni, ig diyuhe aterewata akiw. Ig piriyepkaw ta git Uhokri akiw. Ig awna:
―Nighu, ku pis ka mpitha ini mbeyne ndahan, ku in pimawkanwa in danuh nuthu, ka sam. Hiyawa pis keh ku samah pibetki nukakhu.
43 Pisenwa ig diyuhe akiw. Ig uté gikannuhnipwi himekweke mmanawa igkis isepwe kaayhsima.
44 Ayteke ig diyuhe aterewata akiw. Ig piriyepkaw amamnaput akiw. Ig piriyepkaw inwata piriyepkawka.
45 Pisenwa ig diyuhe akiw ta gitkis gikannuhnipwi. Ig awna gitkis:
―Mmahkay yis he himeknenenwa? Mmahkay yis he mayeknenenwa? Sarayhnay yipegyi atere. Kuwis danuh nuhawkanaprik. Kuri nah ku pariye wageswe awayg amadgaya inin nah me ikepkamet giwakuitkis hiyeg taraksapye.
46 Kannikawnay. Uyay patiptakigkis. Ipegnay atere. Ig nukamaykiswitni nemnik.
Jesus Kamaxwika
Mk 14.43; Lk 22.47; Jo 18.3
47 Ku samah ig awnempiye inakni yuwit, igme Judas Iskariyotismin danuh atere. Ig pahapwi waytak usuh giwatnipwi. Ig danuh atere akak pahabunad hiyeg. Igkisme danuh atere akak giponyagakis akak gasugakis. Igkis iwatit gidahankis nerras muwpeg kiyatyepwi gikakkis nerras judeyenepwi giwewkistenkis.
48 Ig Judas Iskariyotismin ku pariye kamaykistinene Kiyapwiye Jesus, ig ayipa ahegbet ginetni gikakkis adahan ku samah ig ekkepye Kiyapwiye Jesus ta gitkis. Ig awna gitkis:
―Ku yis hiyá nah aympoka pahapwi, ignewatbaki Jesus. Kamaxnig.
49 Ayteke nikwe ig Judas Iskariyotismin tipik wadé gimkat Kiyapwiye Jesus. Ig danuh atere, ig awna git:
―Uhokri gabay pikaknek, Kiyapwiye.
Akak ini ig aympokig.
50 Igme Kiyapwiye Jesus kaytwa giwn:
―Nukagmada, hiyawa pis keh ku pariye pis kehkere nukakhu.
Nerras pahabunene hiyeg igkis hiyapni henne, igkis sigise gimin, igkis kamaxwig, igkis sumuhpig.
Pedru Ihuk Pahapwi Awayg Gitaybi
Mk 14.47; Lk 22.50; Jo 18.10
51 Aynewa pahapwi waytak usuh ku pariye aygnenepwi gikak Kiyapwiye Jesus ig kehe giponyaga. Ig huwipwihe pahapwi ibukti gidahan ner muwpegpiyene gikiparakis. Ig ihuke gitaybi.
52 Ig Kiyapwiye Jesus hiyapni henne, ig awna git:
―Paris piponyaga ta pibutikminat. Mmanawa madikte hiyeg ku pariye umeheke akak ponya, akakwata ponya ignes umehpika.
53 Ka ba pis hiyaknima ku ik adahan nah ayá ahj git Nighu adahan numaptenten igme awahkis numkanit kibentenwa kaayhsima ahj?
54 Henneme waké nah keh hennebe, nikwekam madikte ka kahayak apigkutaprikma ku samah Uhokri gannasan minikweknene kinetihwa numinhu.
55 Ayteke ig Kiyapwiye Jesus awna ta gitkis nerras pahabunene hiyeg. Ig awna:
―Mmahkay yis ayta akak madikte yiponyaga akak madikte yasuga? Mmahkay yis ayta nukamaxwitni ayamaw ke wotbe nah amepyebe? Takunipti nah bat ayge yikak yikannuhten agiku Uhokri Gipin. Henneme yis ka kibowka kamaxun ayge.
56 Ka sam. Madikte ini danuh henne kahadbe in kahayak apigkutaprik ku samah Uhokri gawnepepu pitatyepwi kinetihwa amadga Uhokri gannasan.
Usuh gikannuhnipwi timapni henne, usuh madikte tipikbet giw. Usuh ikiswig pahapo.
Jesus Ay Gipetun Muwpegpiyene Gikiparakis
Mk 14.55; Lk 22.66; Jo 18.12
57 Ayteke nikwe nerras ku pariye gikamaxwitnipwi Kiyapwiye Jesus igkis waxwig ta gipinekut amekene Kayfás ku pariye muwpegpiyene gikiparakis. Ayge nerras kannuhekeputnepwi amin amekene Moís gikumadukan gikakkis nerras judeyenepwi giwewkistenkis ignes kuwis pahadgupu ayge.
58 Ig kiyapwiye Pedru hiyapni henne ku samah ig iwepka atere, ig makeke gihapu butte henneme ig piyawakte giw aynessa. Ig danuh ta arimkanit muwpegpiyene gikiparakis gipinbukut. Ig pareke atere, ig batahkiswe payak gikakkis nerras apuriwnepwi Uhokri Gipin. Ig hiyepkerepye ku pariye danuh ta git Kiyapwiye Jesus.
59 Apimwata ini nerras muwpeg kiyatyepwi igkis pahadgupu gikakkis madikte judeyenepwi gikiparakis ku samah igkis kehnes gipandukawnikis. Igkis aharitnes ba igkis utí Kiyapwiye Jesus gikehni mbaynama ku pariye ik adahan igkis giwmasepten. Inneki keh igkis aharitnes ba igkis utí hiyeg ku pariye gikamyehpitnipwi he wasaymkanen. Amawka igkis utí gikamyehpitnipwi ku pariye giwnkis tuguh hehpekwiye.
60 Henneme igkis ka utí. Hiyawa kaayhsima hiyeg kamiyhepri akak gikehbetankisnen henneme giwnkis ka tuguh hehpekwiyema. Ayteke piyana gikebyikis kannikaw adahan kamiyepri akiw.
61 Igkis awna:
―Ner awayg awna: “Ik adahan nah mehbete ini leglis Uhokri Gipin. Ayteke amamnam hawkri nah kannikasin akiw.”
62 Igme muwpegpiyene gikiparakis ig timapni henne, ig kannikaw. Ig awna git Kiyapwiye Jesus:
―Mmahki pis ka kaytwa giwnkis? Mmah hennewatma ku samah igkis awna pimin?
63 Igme Kiyapwiye Jesus tinwo. Igme muwpegpiyene gikiparakis ig awna git akiw. Giwn:
―Giwaprik Uhokri dehetniye nah ayá pit. Ku pis Cristo, ku pis Uhokri gikanyan adahan ukumaduketni, ku pis Uhokri gikamkayh, asá akkaw wothu.
64 Igme kaytwa giwn:
―Nahnewa ku samah pis awna. Kuri yis betnene ayge adahan yis hiyekne nukakhu. Henneme aysawnemenek yis hiyapunnek, nah ku pariye wageswe awayg amadgaya inin, yis hiyapun nah bat ayge gihumwa Uhokri detye ay amun ini iwetrit ku pariye kanenikiythanisima kihehaptak. Yis hiyapunnek nah muhuk abetimpi ukuhne inugiktak. Apim ini nahme hiyekne yikak nikwe. Hennewatbaki nah.
65 Ig muwpegpiyene gikiparakis timapni henne, ig sigke gisimsa adahan arekhetni gidagonyi apatra ku samah Kiyapwiye Jesus awna gitkis inakni yuwit. Ig awna:
―Ig ikewne ke wotbe ig Uhokri gikamkayhbe. Ig makuksene Uhokri. Pariyeki umawkanwiy akiw? Wixwiy ka muwaka hiyeg akki wotwiy ariknawnama Jesus gitaraksan akiw. Kuwis ig makukse Uhokri ay wotrikwiy. Yis kuwis timapni akakwa yitaybi.
66 Uyay katiwnise ini gitaraksan git. Mmani yit?
Igkisme kaytwa giwn:
―Pugamawka ig umehpika.
67 Ayge nikwe igkis tupestepri. Igkis biptepri. Gaytakkisme biyuhpokepri. Igkis awna git:
68 ―Aa, pis Uhokri gikanyanad adahan ukumaduketni, ku pis Uhokri gawnepe, asá akki wot ku pariye pibiyuhatepten.
Pedru Wihwa Giw Jesus
Mk 14.66; Lk 22.55; Jo 18.15
69 Apimwata ini ig kiyapwiye Pedru bat ayge paytbuhku. Ayteke pahapu tino bukitwiyo danuh atere git. Eg awna git:
―Pis hawwata wew gikak Jesus galiléyene.
70 Igme wihwe giw giwtrikneswa madikte hiyeg. Ig awna gut:
―Nah ka hiyakwa inakni yuwit ku kamin pis awna.
71 Ayteke ig pes ta anumekut pesket. Ayge pahapuwa tino bukitwiyo hiyapri akiw. Eg hiyapni henne, eg awna ta gitkis hiyeg ku pariye ay kennesa guhumwa. Eg awna:
―Nernewa wew gikak Jesus nazaréyene.
72 Igme wihwe giw akiw. Ig awna:
―Uhokri timá nuwnhu. Nah kawa hiyakriwa ner awayg.
73 Ayteke ariwnteke ini ayiptenesa akiw, nerras hiyeg ku pariye ayge kennesa guhumwa igkis danukwa atere gimkat kiyapwiye Pedru. Igkis awna git:
―Hennewa. Pisnewa pahapwi gaytakkis Jesus gikannuhnipwi mmanawa pis awna ke nerras galiléyenepwibe. Pikupimna akki wothu.
74 Igme timapni henne, ig awna akak gihawna. Giwn:
―Ku nah ka awna inyerwatma yuwit, hiyawa Uhokri hiyapkis mbeyne nuthu. Nah ka hiyakriwa ner awayg.
Nikwenéwa pahapwi takarak awna.
75 Igme kiyapwiye Pedru timapni henne, ig kiyé inakni ku pariye Kiyapwiye Jesus giwn kuhwekwa ta git amin “Apit takarak awna pahaywowa gawnhan, pisme ayipa wihwe nuwhunek mpamaput.” Ig kiyé inakni giwn nikwe, ig pese. Ig kiyemna gitaraksan mpiynepepye. Ig biyuk gikan. Ig tihene ayge.