11
Reꞌ chiho̱j riban i Dios chi reꞌ take
cꞌacharel nacaꞌnam chi ritinami̱t
1 Ha̱ꞌ, ruꞌum chi xnikꞌor chi wilic take kich ra̱ꞌ riꞌsil cho maꞌ Israhel maꞌ nquicꞌuꞌlej ta na i kꞌoro̱j ruꞌum i Dios, wilic take equikꞌoric chi reꞌ hin xa jeꞌ na nak nchel cꞌahchiꞌ nikꞌorom yuꞌna chi cuꞌum queh take reꞌ, chiꞌnchel i hoj ra̱ꞌ riꞌsil cho maꞌ Israhel maꞌ hoj ta chic cꞌulu̱j ruꞌum i Dios chi hoj ritinami̱t? Maꞌxta! Maꞌ jeꞌ ta reꞌ i cꞌahchiꞌ nikꞌorom. Jeꞌ woꞌ chic, maꞌ eta riban chi enikꞌor chi jeꞌ reꞌ chiqui̱j chiꞌnchel take ra̱ꞌ riꞌsil cho maꞌ Israhel maj reꞌ hin, hin woꞌ ra̱ꞌ riꞌsil cho maꞌ Israhel. Jeꞌ ricab chi reꞌ take reꞌ til manlic rijaꞌquil cho maꞌ Awraham take, til hin jeꞌ woꞌ reꞌ i hin. Maꞌ xa reꞌ ta reꞌ, reꞌ take nitu̱t waja̱w wilque̱b laꞌ woꞌ chi quixilac take jeꞌ ru̱cꞌ ra̱ꞌ riꞌsil take cho i chopol na̱ tinamit maꞌ Wenjamin ribihnal.
2 Jeꞌ reꞌ nok ruꞌum chi reꞌ Dios xa nok woꞌ cho pan pe̱t xojrichih cho hoj ra̱ꞌ riꞌsil cho maꞌ Israhel chi xojwihꞌic chi ritinami̱t, maꞌ riban ta chi nkꞌormojic chi reꞌ hin cꞌahchiꞌ nikꞌorom chi chiꞌnchel ta nak take chiho̱j cho chi ritinami̱t i Dios maꞌ cꞌulu̱j ta chic take chi ritinami̱t yuꞌna. Wi wilic jenoꞌ ricapaj chi jeꞌ reꞌ i cꞌahchiꞌ nikꞌorom, xa reꞌ cꞌolok cho pa ricꞌux i ribiral i Eli̱yas wilic chipam i Lokꞌ laj Hu̱j reꞌ tzꞌihmbimaj wi̱ꞌ i kꞌoro̱j ruꞌum i Dios. Chipam i Hu̱j reꞌreꞌ rikꞌor chi reꞌ Eli̱yas junpech jeꞌ wili xikꞌor reh Dios pa riti̱j naxiyew chiwach quimahc take rich ra̱ꞌ riꞌsil cho i maꞌ Israhel:
3 “Ajabe̱s Dios, reꞌ wili bano̱j caꞌnam take cꞌacharel reꞌreꞌ: Xquibok take i lokꞌ laj yeꞌa̱b cꞌatbal si̱ reꞌ ncamanic keh chi lokꞌonbal wi̱ꞌ awach.
Jeꞌ woꞌ chic, reꞌ take reꞌ xquicansaj chic take chiꞌnchel i wichꞌi̱l jeꞌ ru̱cꞌ takꞌamaj take cho awuꞌum chi aj kꞌorol reh acꞌuhbal.
Ruꞌum reꞌ xa chic reꞌ hin xincahnic chi wutquel chi awaj kꞌoro̱l xa reꞌ laꞌ ruꞌ, reꞌ take reꞌ nca̱j woꞌ quinquicansam i hin, nqui Eli̱yas.
4 Raj i Dios, chaj bih cꞌuꞌlunic xiban reh Eli̱yas? Reꞌreꞌ jeꞌ wili xikꞌor reh:
“Reh chi cu naquiwihꞌic take cꞌacharel jeꞌ ru̱cꞌ naquikꞌorbic reh niCꞌuhbal,
reꞌ hin xniban chi cu xicahnic wuklaj ikꞌob lajcꞌahl (7,000) chi winak reꞌ maꞌ xquixucꞌa̱ꞌ ta qui̱b chiwach i tiyo̱x Wahal ribihnal, nqui i Dios.
5 Jeꞌ reꞌ kꞌuruꞌ jeꞌ ricab xcꞌuluric pa rikꞌijil cho Eli̱yas cu̱cꞌ take ra̱ꞌ riꞌsil cho maꞌ Israhel jeꞌ ru̱cꞌ maꞌ xquixucꞌa̱ꞌ ta qui̱b chiwach i tiyo̱x Wahal, yuꞌna chi kaxilac i hoj ra̱ꞌ riꞌsil cho maꞌ Israhel, reꞌ Dios xiban woꞌ chi xcahnic juntuhm chic keh hoj cꞌacharel jeꞌ ru̱cꞌ nkacꞌul i kꞌoro̱j ruꞌum. Jeꞌ reꞌ xiban ruꞌum reh ricꞌaxbal reꞌ xicꞌuhtaj woꞌ cho chi kana̱ naxojrichih cho chi hoj ritinami̱t.
6 Jeꞌ reꞌ nikꞌor maj til coric chi maꞌ ruꞌum ta reh kaholohic laj bano̱j nkaꞌn i hoj cꞌacharel xojrichih i Dios chi hoj ritinami̱t. Wi ta nak ruꞌum reh kaholohic laj bano̱j chi jeꞌ reꞌ xiban i Dios ku̱cꞌ, maꞌ riban ta nak chi enikꞌor chi ruꞌum reh ricꞌaxbal naxiban i Dios chi jeꞌ reꞌ. Jeꞌ reꞌ nok junpech woꞌ chic enikꞌor aweh tak, wi ta nak ruꞌum reh holohic laj bano̱j nkaꞌn reꞌ Dios xojrichih chi hoj ritinami̱t, reꞌ kꞌoric nkꞌormojic chi xa ruꞌum reh ricꞌaxbal i Dios kojchihiric, maꞌ eta nak riban chi coric wach. Jeꞌ reꞌ nikꞌor ruꞌum wi nkꞌormojic chi jeꞌ reꞌ, ra̱j rikꞌorom chi maꞌ ruꞌum ta reh kabano̱j kojchihiric ruꞌum i Dios.
Reꞌ take maꞌ reꞌ ta ra̱ꞌ riꞌsil cho maꞌ Israhel xquirak woꞌ quicoꞌlbal cuꞌum queh take ra̱ꞌ riꞌsil cho maꞌ Israhel
7 Reꞌ riwi̱ꞌ kachihiric riban i Dios, reꞌ aj reꞌ nbanic chi nanikꞌorom woꞌ i wili: To̱b ta reꞌ hoj ra̱ꞌ riꞌsil cho maꞌ Israhel xkakꞌahsaj ki̱b chi risiqꞌuiric nicꞌ wach nakojcꞌacharok chi coric wach kacꞌux, maꞌ xkarak ta cꞌacharic jeꞌ reꞌ riwi̱ꞌ. Reꞌ cok ruꞌ maꞌ chiki̱j ta chiꞌnchel i hoj cꞌacharel cꞌahchiꞌ nikꞌorom chi jeꞌ reꞌ xkacꞌul maj reꞌ juntuhm keh hoj cꞌacharel jeꞌ ru̱cꞌ nkacꞌul i kꞌoro̱j ruꞌum i Dios, til xkarak riwi̱ꞌ nicꞌ wach nakojcꞌacharok chi coric wach kacꞌux. Reꞌ cꞌahchiꞌ nikꞌorom chiqui̱j take toco̱m chic wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j ruꞌum i Dios, cꞌahchiꞌ nikꞌorom maj cu̱cꞌ take reꞌ, reꞌ Dios xiban chi xcowjic quicapew-bal reh chi maꞌ xquirak ta chiri̱j i kꞌoro̱j ruꞌum.
8 Chiqui̱j aj take cꞌacharel reꞌreꞌ jenaj aj kꞌorol riCꞌuhbal i Dios xitzꞌihmbaj cho i wili ar chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios:
“Jeꞌ ricab ncꞌuluric ru̱cꞌ jenoꞌ xohcꞌrel wiric riban maꞌ ribiraj ta on maꞌ rilow ta i chaj bih cꞌahchiꞌ ricꞌuluric cok chi riche̱l,
jeꞌ woꞌ reꞌ xiban i Dios chi xcꞌuluric cu̱cꞌ take cꞌacharel wili.
Ruꞌum reꞌreꞌ cu yuꞌna chi kꞌi̱j, reꞌ nquilow on reꞌ nquibiraj maꞌ nquirak ta chiri̱j, nqui xitzꞌihmbaj cho.
9 Jeꞌ woꞌ reꞌ, chipam i hu̱j tzꞌihmbimaj ruꞌum i aj najtir kꞌatal kꞌoric maꞌ Tawiy wilic i ti̱j bano̱j wili chiqui̱j take cꞌacharel reꞌreꞌ:
“Ajabe̱s Dios, nipahkaj johtok aweh chi jeꞌ ricab i tiꞌcꞌaxic nchalic china̱ i chicop reꞌ nariyahkꞌaj pa̱m ricꞌahamil i yaꞌl reꞌ cojo̱j chi rixirab ncahnic chipam,
kꞌe̱ꞌ ok woꞌ nimal i tiꞌcꞌaxic kajok chi quina̱ take cꞌacharel reꞌ cu yuꞌna chi kꞌi̱j cꞌahchiꞌ quisuksam qui̱b ru̱cꞌ acuseꞌsbal.
10 Jeꞌ woꞌ, nipahkaj woꞌ johtok aweh chi cahnok chi moylic wach quicapew-bal take cꞌacharel reꞌreꞌ reh chi maꞌ eta chic nquirak chiri̱j i ricorquilal akꞌorbal.
Maꞌ xa reꞌ ta reꞌ nipahkaj aweh, jeꞌ laꞌ woꞌ xa pan tiꞌquilal ok woꞌ quicꞌacharok, nqui maꞌ Tawiy.
11 Chi nikꞌorom chic lok chi pan mahc xikꞌehbic take cꞌacharel reꞌreꞌ, yuꞌna reꞌ wili i birinic ripahba̱ꞌ ri̱b chi niwach: Coric na chi reꞌ take wich ra̱ꞌ riꞌsil cho maꞌ Israhel reꞌ jeꞌ reꞌ quibanic, quicahnic ta woꞌ ti chi junpech chi maꞌ nquicꞌuꞌlej ta chic na̱ i kꞌoro̱j ruꞌum i Dios? Maꞌxta, reꞌ take reꞌ maꞌ eta quicahnic chi jeꞌ reꞌ chi junpech. Reꞌ cok ruꞌ wilic riwi̱ꞌ naxikꞌehbic pan mahc eh reꞌ wili riwi̱ꞌ: Reꞌ take reꞌ xikꞌehbic reh chi reꞌ take maꞌ reꞌ ta ra̱ꞌ riꞌsil cho maꞌ Israhel ewoꞌ quicoꞌljic. Jeꞌ woꞌ chic, wilic woꞌ riwi̱ꞌ chi coꞌlomaj take maꞌ reꞌ ta ra̱ꞌ riꞌsil cho maꞌ Israhel eh reꞌ wili riwi̱ꞌ: Chi reꞌ take wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j ruꞌum i Dios, naquilow chi reꞌ take maꞌ reꞌ ta ra̱ꞌ riꞌsil cho maꞌ Israhel quicoꞌljic woꞌ, reꞌ aj woꞌ reꞌ encamanic queh chi ewoꞌ nca̱j quibiram haj wilic xiban i Dios chiqui̱j take maꞌ reꞌ ta take ra̱ꞌ riꞌsil cho maꞌ Israhel.
12 Jeꞌ reꞌ kꞌuruꞌ reꞌ cꞌahchiꞌ nikꞌorom i hin reꞌ i wili: Cu wilic toco̱m chic kich ra̱ꞌ riꞌsil cho maꞌ Israhel jeꞌ ru̱cꞌ naquichꞌica̱b quicꞌux chiri̱j i Jesus. Kꞌe̱ꞌ rinimal wach cuseꞌsbal naribanjic nok jeꞌ reꞌ encꞌuluric cu̱cꞌ! Nikꞌor chi jeꞌ reꞌ ruꞌum i wili: Kuꞌum aj keh hoj ra̱ꞌ riꞌsil cho maꞌ Israhel xchalic jenaj atoꞌbil chi quina̱ take cꞌacharel maꞌ reꞌ ta ra̱ꞌ riꞌsil cho maꞌ Israhel maj naxojkꞌehbic pan mahc i hoj, reꞌreꞌ xcamanic chi qꞌuihal take cꞌacharel xquichꞌica̱ꞌ quicꞌux chiri̱j i Jesus. Wi jeꞌ reꞌ xcꞌuluric cu̱cꞌ take cꞌacharel naxojmahcanic, ticapewenok woꞌ tak chiri̱j nicꞌ nak qꞌuihal take maꞌ reꞌ ta ra̱ꞌ riꞌsil cho maꞌ Israhel enquichꞌica̱ꞌ quicꞌux chiri̱j i Jesus, wi chiꞌnchel i hoj ra̱ꞌ riꞌsil cho maꞌ Israhel eta nak nkachꞌica̱ꞌ kacꞌux chiri̱j ruꞌ? Til pan coric, kꞌe̱ꞌ woꞌ nak chic qꞌuihal take, majeꞌ?
Kꞌe̱ꞌ nak holonquilal chi chiꞌnchel ta
nak take ra̱ꞌ riꞌsil cho maꞌ Israhel
enquichꞌica̱ꞌ quicꞌux chiri̱j i Jesus
13 Yuꞌna hat-tak maꞌ reꞌ ta ra̱ꞌ riꞌsil cho maꞌ Israhel chabiraj tak chi coric take kꞌoric nwa̱j nikꞌorom wili: Reꞌ Dios xiripahba̱ꞌ chi raj kꞌoro̱l eh xiritakꞌa̱ꞌ cho awu̱cꞌ tak. Chi reꞌ Dios xyeꞌbic chi nina̱ i ihk reꞌreꞌ, reꞌ hin cow niyew nicꞌux chi rinimjic reꞌreꞌ
14 eh nok niban chi jeꞌ reꞌ, reꞌ wili nichꞌica̱ꞌ wi̱ꞌ nicꞌux i hin: Chi naquilow take wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j ruꞌum i Dios chi reꞌreꞌ ricoꞌlej woꞌ take cꞌacharel jeꞌ ru̱cꞌ maꞌ reꞌ ta ra̱ꞌ riꞌsil cho maꞌ Israhel take, reꞌ ok reꞌ camanok queh wich ra̱ꞌ riꞌsil cho maꞌ Israhel reꞌreꞌ chi enchꞌuk i ca̱mna chi enca̱j woꞌ riyeꞌeric quicꞌux chi rinimjic i Jesus reh chi ru̱cꞌ chi jeꞌ reꞌ ewoꞌ quicoꞌljic ruꞌum i Dios.
15 Chiri̱j aj reꞌ nichꞌica̱ꞌ nicꞌux i hin eh ruꞌum reꞌ til niyew nicꞌux chi rinimjic ihk wilic chi nina̱ maj reꞌ hin quincapewenic woꞌ chiri̱j i wili: Wi reꞌ take maꞌ reꞌ ta ra̱ꞌ riꞌsil cho maꞌ Israhel xcꞌulmujic ruꞌum i Dios chi ritinami̱t eh chi jeꞌ reꞌ, reꞌ take wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j ruꞌum i Dios xicahnic chi maꞌ reꞌ ta chic ritinami̱t take, ra̱j rikꞌorom chi kꞌe̱ꞌ woꞌ chic holonquilal i naricꞌuluric wi reꞌ take wich ra̱ꞌ riꞌsil cho maꞌ Israhel equiꞌoquic woꞌ chic chi ritinami̱t i Dios. Reꞌ naricꞌuluric reꞌreꞌ jeꞌ na ricab nok reꞌ take camnak quiꞌuctic cho chi naquicꞌacharic woꞌ chic, majeꞌ?
Maꞌ riban ta chi enbanjic qꞌuihsinic
i̱b chiri̱j i coꞌlonic riban i Dios
16 Chiri̱j chi nikꞌorom chic aweh tak chi wilic take ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j ruꞌum i Dios, yuꞌna reꞌ chic i wili nwa̱j woꞌ nikꞌorom chiqui̱j ruꞌ: Reꞌ take cꞌacharel reꞌreꞌ xa cu ilo̱j woꞌ take cho ruꞌum i Dios chi lo̱kꞌ take xa kuꞌum keh hoj ra̱ꞌ riꞌsil cho maꞌ Israhel jeꞌ ru̱cꞌ kanimem chic i Jesus. Reꞌ quilmijic cho chi jeꞌ reꞌ ruꞌum i Dios jenaj wach ncꞌutunic ru̱cꞌ jeꞌ ricab nkꞌormojic chiri̱j jenoꞌ caxlan wiꞌc: Wi tare̱t cho rikꞌoril tikꞌimaj wi̱ꞌ chi pe̱t, chiꞌnchel woꞌ i caxlan wiꞌc reꞌreꞌ ta woꞌ re̱t. Jeꞌ ricab i kꞌoric reꞌreꞌ, jeꞌ woꞌ reꞌ nkꞌormojic chiri̱j jenoꞌ che̱ꞌ: Wi holohic cho riraꞌil, jeꞌ woꞌ reꞌ take kꞌab i che̱ꞌ reꞌreꞌ holohic woꞌ take.
17 Ruꞌum chi jeꞌ reꞌ quilmijic nbanaric cho take cꞌacharel reꞌreꞌ, reꞌ hin nikꞌor woꞌ chic i wili: Reꞌ take ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j ruꞌum i Dios ncꞌuluric cu̱cꞌ jeꞌ ricab ncꞌuluric ru̱cꞌ take kꞌab jenoꞌ che̱ꞌ xa tico̱j Oli̱wo ribihnal chi reꞌ aj ticol reh riyocꞌ lok take kꞌab eh pan quijelow-bal take kꞌab reꞌreꞌ, reꞌ chic take kꞌab jenoꞌ che̱ꞌ Oli̱wo reꞌ xa maꞌ tico̱j ta, rikꞌolej cok chiwach. Jeꞌ woꞌ reꞌ i Dios xesaj lok take chiwach chi maꞌ reꞌ ta chic ritinami̱t take wich ra̱ꞌ riꞌsil cho maꞌ Israhel reꞌ maꞌ nquicꞌuꞌlej ta na̱ i kꞌoro̱j ruꞌum i Dios eh pan quijelow-bal reꞌ chic hat-tak maꞌ reꞌ ta ra̱ꞌ riꞌsil cho maꞌ Israhel reꞌ xanimej tak chic i Jesus xatricoj tak chi ritinami̱t. Ruꞌum reꞌreꞌ yuꞌna, reꞌ hat-tak cꞌahchiꞌ chic acꞌulum tak ricuseꞌsbal i Dios jeꞌ ricab nok reꞌ take kꞌab i che̱ꞌ Oli̱wo reꞌ maꞌ xa tico̱j ta, naquikꞌoljic cok chiwach i che̱ꞌ Oli̱wo reꞌ xa tico̱j, ar chic ru̱cꞌ riraꞌil i che̱ꞌ reꞌreꞌ ricꞌam cok rijaꞌquil reꞌ nyeꞌbic ricꞌacharic.
18 Chi coric aj chiꞌnchel i cꞌulu̱j lok reꞌreꞌ, chayohbalej awi̱b tak chi maꞌ eta enwihꞌic awu̱cꞌ tak i noꞌjbal chi qꞌuihsinic i̱b chi quiwach take ra̱ꞌ riꞌsil cho maꞌ Israhel jeꞌ ru̱cꞌ maꞌ nquicꞌuꞌlej ta na̱ i kꞌoro̱j cho ruꞌum i Dios. Wi wilic ok nchel awu̱cꞌ tak i noꞌjbal reꞌreꞌ, til cꞌolok pan acꞌux tak i wili: Jeꞌ ricab chi maꞌ ruꞌum ta take kꞌab i che̱ꞌ paꞌlic chi coric i richeꞌlal ruꞌum laꞌ reh ra̱ꞌ i che̱ꞌ reꞌreꞌ cow paꞌlic wach acꞌal, jeꞌ woꞌ reꞌ ncꞌuluric awu̱cꞌ tak chi maꞌ awuꞌum ta hat-tak maꞌ reꞌ ta ra̱ꞌ riꞌsil cho maꞌ Israhel wilco̱j i hoj ra̱ꞌ riꞌsil cho maꞌ Israhel chi ritinami̱t i Dios, kuꞌum laꞌ keh hoj xatcojoric tak chi hat-tak chic ritinami̱t i Dios.
19 Ru̱cꞌ xnikꞌor lok reꞌreꞌ kꞌi̱j woꞌ wilic jenoꞌ aweh hat-tak erikꞌor chi jeꞌ wili:
«Reꞌ riwi̱ꞌ chi reꞌ aj tico̱l reh che̱ꞌ Oli̱wo riyocꞌ lok take kꞌab reh chi pan quijelow-bal take kꞌab reꞌreꞌ toco̱m chic take kꞌab erikꞌolej cok chiwach reh chi jeꞌ reꞌ kꞌe̱ꞌ chic holohic wachanic naribanam i che̱ꞌ reꞌreꞌ. Nicꞌ paꞌ wach ncꞌuluric ru̱cꞌ take kꞌab i che̱ꞌ Oli̱wo reꞌ xa maꞌ tico̱j ta, jeꞌ woꞌ reꞌ riwi̱ꞌ xiban i Dios chi xojricꞌul chi hoj chic ritinami̱t, nqui ok erikꞌor.
20 Wi jeꞌ ta nak reꞌ erikꞌor jenoꞌ hab wach, ricorquilal woꞌ cꞌahchiꞌ rikꞌorom maj jeꞌ ricab chi reꞌ jenoꞌ aj ehcham che̱ꞌ riwi̱ꞌ chi reh chi eriyocꞌ lok take kꞌab i riche̱ꞌ, jeꞌ woꞌ reꞌ i Dios riwi̱ꞌ woꞌ chi reh chi reꞌ hat-tak maꞌ reꞌ ta ra̱ꞌ riꞌsil cho maꞌ Israhel xatricoj tak yuꞌna chi ritinami̱t chic xa ruꞌum reh richꞌiquinjic acꞌux xaꞌn tak chiri̱j i Jesus. Jeꞌ woꞌ chic, riwi̱ꞌ woꞌ chi reh Dios chi xiban chi wilic take wich ra̱ꞌ riꞌsil cho maꞌ Israhel xicahnic lok chi maꞌ reꞌ ta chic ritinami̱t take xa ruꞌum chi maꞌ xquichꞌica̱ꞌ ta quicꞌux chiri̱j i Jesus. Wi riwi̱ꞌ chi reh i Dios chi jeꞌ reꞌ xiban cu̱cꞌ take reꞌ, sakbih chaweh tak chi chayohbalej awi̱b tak chi ma̱nimsaj awi̱b tak ruꞌum reh xiban i Dios awu̱cꞌ tak.
21 Jeꞌ reꞌ nikꞌor maj reꞌ Dios maꞌ eta ricuy awu̱cꞌ tak wi reꞌ hat-tak nanimsaj awi̱b tak, jeꞌ ricab nok reꞌ aj ehcham che̱ꞌ Oli̱wo maꞌ ricuy ta chi xa chacꞌa̱cꞌ cho wach richeꞌlal take kꞌab maꞌ quicamanic ta chic.
22 Jeꞌ reꞌ ajic reh aj chi maꞌ eta nacꞌul aweh tak reꞌreꞌ, nipahkaj aweh tak chi maꞌ niqꞌuic pan acꞌux tak i nikꞌorom lok wili: Coric ruꞌ chi reꞌ Dios kꞌe̱ꞌ woꞌ chic chakꞌlam cho chi kana̱ xa reꞌ laꞌ nok reꞌreꞌ riyew woꞌ cho jenoꞌ tiꞌcꞌaxic china̱ jenoꞌ cꞌacharel til woꞌ cow wach nariyew cho. Jeꞌ reꞌ ncꞌuhtunic lok ru̱cꞌ ricorquilal wili: Cu̱cꞌ take wich ra̱ꞌ riꞌsil cho maꞌ Israhel jeꞌ ru̱cꞌ quikꞌehbic pan mahc, reꞌ Dios ribanam chi kꞌe̱ꞌ cow i tiꞌcꞌaxic nchalic chi quina̱, raj laꞌ awu̱cꞌ hat-tak xiban chi kꞌe̱ꞌ woꞌ chic rinimal richakꞌlamil xiyew cho. Reꞌ richakꞌlamil i Dios reꞌreꞌ, nikꞌor aweh tak chi xa ewoꞌ nwihꞌic chana̱ tak xa reꞌ laꞌ wi reꞌ hat-tak enatik tak juꞌ richꞌiquinjic acꞌux tak chiri̱j i Jesus. Eta nak ncꞌuluric chi maꞌ eta chic nachꞌica̱ꞌ acꞌux tak, reꞌ Dios eriban chi maꞌ reꞌ ta chic hat-tak ritinami̱t, jeꞌ ricab ncꞌuluric ru̱cꞌ take kꞌab che̱ꞌ naquiyocꞌoric lok chiwach richeꞌlal.
23 Reꞌ cꞌahchiꞌ nikꞌorom aweh tak wili til woꞌ coric maj reꞌ Dios til wilic rajawric chi naribanam chi jeꞌ reꞌ. Ruꞌum aj chi reꞌ Dios wilic rajawric, reꞌreꞌ xa cu riyew woꞌ cho queh take wich ra̱ꞌ riꞌsil cho maꞌ Israhel reꞌ maꞌ nquichꞌica̱ꞌ ta quicꞌux chiri̱j i Jesus chi nacaꞌnam woꞌ chic chi ritinami̱t take. Jeꞌ reꞌ nok wi xquicana̱ꞌ i quinoꞌjbal chi maꞌ nquichꞌica̱ꞌ ta quicꞌux chiri̱j i Jesus, reꞌ take reꞌ til naquicꞌulmujic woꞌ chic chi ritinami̱t i Dios jeꞌ ricab nok reꞌ take kꞌab i tico̱j laj che̱ꞌ Oli̱wo reꞌ esemaj lok chiwach richeꞌlal nkꞌoljic woꞌ chic cok.
24 Chi reh Dios maꞌ cꞌaxic ta ribanaric reꞌreꞌ eh reꞌ wili ncꞌutunic wi̱ꞌ chi jeꞌ reꞌ: Wi maꞌ cꞌaxic ta chi reh chi reꞌ take kꞌab i maꞌ tico̱j ta laj che̱ꞌ Oli̱wo xiyocꞌ take lok eh xikꞌolej cok chiwach richeꞌlal i tico̱j laj che̱ꞌ Oli̱wo, maꞌ cꞌaxic ta woꞌ chi reh chi reꞌ take kꞌab i tico̱j laj che̱ꞌ Oli̱wo reꞌ yocꞌo̱j nak chic take lok ewoꞌ chic quikꞌoljic cok chiwach richeꞌlal. Jeꞌ reꞌ ajic wi maꞌ cꞌaxic ta chi reh Dios ribanaric reꞌreꞌ eh wi maꞌ cꞌaxic ta woꞌ chi reh i xiban chawi̱j hat-tak chi xatricoj tak chi hat-tak chic ritinami̱t, to̱b ta reꞌ take cho ama̱m awatiꞌt tak maꞌ cꞌulu̱j ta take cho chi pe̱t ruꞌum i Dios chi ritinami̱t, maꞌ cꞌaxic ta chi reh chi ewoꞌ chic ricꞌul chi ritinami̱t take cꞌacharel reꞌ xa pan pe̱t woꞌ ricojom take cho quima̱m catiꞌt chi ritinami̱t.
Reꞌ take ra̱ꞌ riꞌsil cho maꞌ Israhel
reꞌ maꞌ jaꞌ nquichꞌica̱ꞌ ta quicꞌux
chiri̱j i Jesus, cu wilic cuyuꞌnbal
chi naquichꞌica̱b quicꞌux chiri̱j
25 Hat-tak cꞌacharel maꞌ reꞌ ta ra̱ꞌ riꞌsil cho maꞌ Israhel reꞌ wilca̱t tak chic yuꞌna chi wich aj niminel reh Jesus, yuꞌna nanikꞌoric chiri̱j i noꞌjbal jeꞌ ru̱cꞌ maꞌ yeꞌo̱j ta nak cho aweh tak rehtꞌaljic cho pa̱m najtir kꞌi̱j. Jeꞌ reꞌ nanibanam reh chi echic narak tak chiri̱j maꞌ riwi̱ꞌ ta chaweh tak chi enanimsaj awi̱b tak chi quiwach take wich ra̱ꞌ riꞌsil cho maꞌ Israhel. Reꞌ aj wili i noꞌjbal reꞌreꞌ: Coric ruꞌ, cu rehtal nmanlajic wach aqꞌuihal hat-tak juntuhm chi cꞌacharel maꞌ reꞌ ta ra̱ꞌ riꞌsil cho maꞌ Israhel jeꞌ ru̱cꞌ cꞌahchiꞌ chic animem tak i Jesus, xa wilic woꞌ juntuhm keh hoj cꞌacharel ra̱ꞌ riꞌsil cho maꞌ Israhel jeꞌ ru̱cꞌ naquicowsam i ca̱mna chi maꞌ eta nquinimej i Jesus, xa reꞌ laꞌ to̱b ta woꞌ jeꞌ reꞌ naricꞌuluric,
26 chi kawach johtok cu wilic rikꞌijil nok reꞌ coꞌlbal i̱b riyew i Dios narichalic chi kana̱ chiꞌnchel i hoj ra̱ꞌ riꞌsil cho maꞌ Israhel. Reꞌ ricꞌuluric i wili xa nok woꞌ tzꞌihmbimaj cho chipam i lok laj Hu̱j reꞌ wilic wi̱ꞌ riCꞌuhbal i Dios. Chipam aj i hu̱j reꞌreꞌ jeꞌ wili kꞌoro̱j cho:
“Naribanam chi naructic cho jenaj aj coꞌlonel eh ar narichalic riraꞌil chi quixilac take ra̱ꞌ riꞌsil cho maꞌ Israhel.
Reꞌ aj coꞌlonel reꞌreꞌ naribanam chi maꞌxta chic caꞌnam i cꞌahbilal ncaꞌn take ra̱ꞌ riꞌsil cho maꞌ Jacow reꞌ ribihnej woꞌ chi Israhel.
27 Nok bano̱j chic reꞌreꞌ, ar aj ruꞌ narimanlajic wach i nikꞌorbal hin Dios reꞌ niyeb cho najtir kꞌi̱j
chi nanicuyum quimahc take ra̱ꞌ riꞌsil cho maꞌ Israhel, nqui kꞌoro̱j cho.
28 Jeꞌ reꞌ ajic maꞌ riwi̱ꞌ ta chi reꞌ hat-tak enanimsaj awi̱b tak chi quiwach take wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquinimej ta kAja̱w Jesus. Coric ruꞌ, yuꞌna reꞌ chic hat-tak cꞌahchiꞌ acꞌulu̱j tak reh ratoꞌbil i Dios maj reꞌ take reꞌ maꞌ nquicꞌul ta i Cꞌuhbal nyeꞌbic sukquil cꞌuxlis queh take quicꞌulbic reh cꞌuhbal reꞌreꞌ. Ru̱cꞌ reꞌreꞌ xcaꞌn chi reꞌ rijoskꞌil i Dios xchalic chi quina̱, xa reꞌ laꞌ ruꞌ reꞌ Dios xiban woꞌ cho jenaj tikꞌinic najtir kꞌi̱j cu̱cꞌ take kama̱m katiꞌt eh ruꞌum chi xichih take cho chi pe̱t cꞌacharel chi nacaꞌnam chi ritinami̱t, reꞌ take wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquinimej i Jesus xa cu wilic woꞌ ricꞌaxbal i Dios chi quina̱.
29 Ruꞌum nok reꞌ Dios xichih quiwach take kama̱m katiꞌt, reꞌreꞌ xikꞌor woꞌ queh chi xa naquiwihꞌic woꞌ chi ritinami̱t take eh chi reꞌ ricꞌaxbal xa nariwihꞌic woꞌ chi kana̱ chiꞌnchel i hoj ra̱ꞌ riꞌsil cho maꞌ Israhel. Reꞌ xikꞌor reꞌreꞌ maꞌ jaruj ta rijalam i Dios.
30 Jeꞌ reꞌ kꞌuruꞌ chaweh hat-tak maꞌ reꞌ ta raꞌril cho maꞌ Israhel eh jeꞌ woꞌ chi keh hoj ra̱ꞌ riꞌsil cho maꞌ Israhel maꞌxta jenoꞌ riwi̱ꞌ chi enkanimsaj ki̱b ruꞌum nok xa jenaj wach cꞌulu̱j ku̱cꞌ chiꞌnchel i hoj. Jeꞌ reꞌ nikꞌor maj chana̱ hat-tak xwihꞌic jenaj rikꞌijil chi xatcꞌacharic tak chi maꞌ cꞌahchiꞌ ta animem tak i Dios. Chipam rikꞌijil reꞌreꞌ, reꞌ ricꞌaxbal i Dios maꞌ xwihꞌic ta nak chana̱ tak ra̱j yuꞌna cuꞌum queh riqꞌuihal cꞌacharel wich ra̱ꞌ riꞌsil cho maꞌ Israhel jeꞌ ru̱cꞌ maꞌ nquinimej ta i Dios, reꞌ hat-tak xchalic chana̱ tak ricꞌaxbal i Dios.
31 Jeꞌ ricab nak riwi̱ꞌ i cꞌacharic xaꞌn tak cho, yuꞌna wilic woꞌ take cꞌacharel jeꞌ ru̱cꞌ wich ra̱ꞌ riꞌsil take cho maꞌ Israhel cꞌahchiꞌ quicꞌacharic chi maꞌ nquinimej ta i Dios. Ruꞌum reh ricꞌaxbal i Dios xicꞌuhtaj cho chana̱ hat-tak, narichalic woꞌ i rikꞌijil nok reꞌ cꞌaxbal reꞌreꞌ nariwihꞌic woꞌ chi quina̱ take cꞌacharel reꞌreꞌ.
32 Jeꞌ reꞌ kꞌuruꞌ ru̱cꞌ ncꞌuluric nak ku̱cꞌ chiꞌnchel i hoj cꞌacharel, nkarak chiri̱j i ribanam i Dios wili: Reꞌreꞌ xiyew kꞌab chi ricꞌuhtjic chi reꞌ hoj chiꞌnchel cꞌacharel jeꞌ hoj quicab take cꞌacharel tzꞌapalque̱b take pan che̱ꞌ. Jeꞌ reꞌ nikꞌor maj chi kunchelal i hoj ricꞌul nak chi keh chi nariyeꞌeric tiꞌcꞌaxic chi kana̱ ruꞌum chi maꞌ nkabiraj ta nak kꞌoric chiwach i Dios. Xa reꞌ laꞌ ruꞌ reꞌ Dios maꞌ jeꞌ ta reꞌ xiban keh eh jeꞌ reꞌ xiban reh chi ewoꞌ ncꞌuhtunic wach chi chiꞌnchel hoj cꞌacharel riquetelej aj woꞌ kawach.
33 Ruꞌum aj reh xiban lok reꞌreꞌ, reꞌ hin jeꞌ wili nikꞌor chiri̱j i Dios chi lokꞌonbal wach: Reꞌ Dios, kꞌe̱ꞌ nimal wach richakꞌlamil ricꞌuhtaj cho. Jeꞌ woꞌ, reꞌreꞌ kꞌe̱ꞌ rinimal wach rinoꞌjbal wilic. Ru̱cꞌ rinoꞌjbal reꞌreꞌ rinaꞌbej pa̱m chiꞌnchel xa reꞌ cok ruꞌ reꞌ noꞌjbal wilic cho pa ricapew-bal i Dios chi naribanam maꞌ hab ta chic jenoꞌ wach nehtꞌalanic reh eh maꞌ hab ta woꞌ wach ensakomonic wach.
34 Chipam i Lokꞌ laj Hu̱j reꞌ wilic wi̱ꞌ riCꞌuhbal i Dios jeꞌ woꞌ wili rikꞌor:
“Reꞌ Dios maꞌ hab ta wach nyeꞌbic rinoꞌjbal eh reꞌ wilic pa ricapew-bal maꞌ hab ta woꞌ wach nehtꞌalanic reh.
35 Reꞌ Dios maꞌxta ricꞌa̱s ru̱cꞌ jenoꞌ hab wach. Maꞌ jaruj ta encꞌulmujic chi hab ta nak wach u̱cꞌ eriban riquemel, nqui rikꞌor.
36 Jeꞌ reꞌ ajic reꞌ Dios nyeꞌbic reh chiꞌnchel eh reꞌ woꞌ reꞌ xtikꞌinic reh chiꞌnchel. Jeꞌ woꞌ chic, reꞌreꞌ tanlic chiri̱j chi narilokꞌonjic wach cuꞌum take chiꞌnchel ritikꞌinic. Ruꞌum aj reꞌ jeꞌ wili nikꞌor chi lokꞌonbal wach: Lokꞌomaj ok wach i Dios chi junelic kꞌi̱j sakom cuꞌum take chiꞌnchel cꞌacharel. Jeꞌ ta nak reꞌ banarok, nqui nikꞌor.