38
Gueshyaycashanpita ray Ezequías allchacashan
(2Rey. 20.1–11; 2Crón. 32.24–26)
1 Chay wichan ray Ezequiasga pasaypa gueshyaycaran. Chaymi Amozpa wamran profëta Isaiasga watucoj aywaran. Chayaycur niran:
«Tayta Diosga nin: ‹Gamga mananami allchacanquipänachu. Incargacuyna, tistamintutana rurachicuy› nir.»
2 Chaura Ezequiasga tapyaman ticracurcur Tayta Diosta mañacur niran:
3 «Nogaga gamta amatarmi ruwacö Tayta Dios, llapan shongöwan gam munashayquino rurashäta yarpärinayquipaj.» Chayno nir llaquicushpan fiyupa wagaran.
4 Chaypita Isaiasta Tayta Dios niran:
5 «Cutircur Ezequiasta willay. Unay awilun David sirbishan Tayta Diosmi mañacamashanta wiyashcä. Ricashcämi wagashantapis. Chaymi allchacächishaj. Chunca pichgan (15) watarämi cawanga.
6 Jerusalén siudätawan paytaga salbashäpämi Asiriapa rayninpita. Nogami cay siudätaga chapäshaj.
7 Chaynöpis aunishäta cumlinäpaj cashanta musyananpaj juc milagrutami rurashaj.
8 Intiwan Acaz örata musyacunancho intipa llantuynin chunca escaluncama guepapa cutinanpämi camacächishaj.» Chaura rasunpa intipa llantuynenga chunca escalunta guepaman cutiran.
9 Judäpa raynin Ezequías gueshyashanpita allchacarcur cay alabansata isquirbiran:
10 «Nogaga nirä: ‹Cananga mösu caycällarchari wañucushaj. Timpöchu caycällarchari wañojcuna caycashanman aywacushaj› nir.
11 Nogaga nirä: ‹Cay pachachöga mananachari imaypis Tayta Diosta ricashänachu.
Cay pachacho cawaycajcunataga mananachari pitapis ricärishänachu› nir.
12 Puñunä wasitapis guechumashpan uyshërucunapa chucllantanömi ushajpaj pascarcaycan.
Noga cawashäga casha tilarcho awa pituraycajta awaj runa capturishannömi.
Illajpitami usharamashcanqui.
13 Tullöcunata liyun capchur-ushaptinnörämi waray-waray nanaywan gaparaycä.
Illajpitami usharamashcanqui.
14 Äbicuna wagajnömi nanächicuycä.
Palumanöllami nanaywanpis ataycä.
Ñawëpis uticannami syëluman ricarayllawan.
Tayta Dios fiyupami ñacaycä.
Nogapa faburnë jatarcuy ari.
15 «Ichanga ¿imataraj noga nëman?
Quiquiquimi willachimashcanqui.
Nircorga chayno rurashcanqui.
Fiyupa llaquicur goyashäpitami umildillana goyäcushaj.
16 Tayta Dios, gammi llapan runacunata alli cawachinqui.
Nogatapis gammi cawachimashcanqui.
Gammi allchacächimashcanqui.
Cawaycänäpäpis camacächishcanqui.
17 Rasunpaga quiquëpitami ñacaycunachöpis goyashcä.
Gamga wañur illganäpitami salbamashcanqui.
Gamga llapan juchäpitapis perdunamashcanquimi.
18 Pantiyuncho pamparaycajcunaga mananami pipis alabashunquinachu.
Pampacojcunaga manami ricannachu aunishayquita cumliptiquipis.
19 Cawajcunami ichanga alabashunqui canan noga alabaycashäno.
Papänincunanami wamrancunata willapan nishayquita cumlej cashayquita.
20 Caychömi Tayta Diosga caycan salbamänanpaj.
Tayta Diospa Wasinchöga waran-waran imaycamapis cawashanchïyäga
arpanchïcunata tucashpanchi cantar alabaycäshun.»
21 Isaiasga ïgusta agachiran chaywan raypa guerinta lajtapänanpaj. Chaura rayga allchacaran.
22 Manaraj chayno captin Ezequiasga Isaiasta tapusha caran: «¿Imanöpataj musyashaj Tayta Diospa Templunman aywanäpaj cashanta?» nir.