4
Chuscu caj llaquicuy
Álef
1 Imanöshi Templucho caj aläjacuna intëru isquïnacho mashtarpaycan.
Goripis chegrayacäcushami.
Bet
2 Sión runacuna unayga caran alli rispitashami.
Fiyupa cuestaj goripitapis mas alli ricashami caran.
Cananga pï-maypis rican mana yachaj runa allpa mancata rurashantanöllana.
Guímel
3 Asta atojcunapis wawantaga chuchunmi.
Täpayllapami uywanpis.
Marcächo tiyaj warmicunami ichanga wamrancunapaj rabyacurcusha.
Chunyajcho tiyaj avestruz äbi wawanpaj fiyu cashannömi ricacusha.
Dálet
4 Chuchuycaj wamracunaga fiyupami yacunaycan.
Yacunaywan shimin chaquiycaptillannami gallunpis palacarninman lagacäcun.
Wamracunaga micuyta mañacun.
Ichanga manami pipis canchu paycunata imallatapis yawaycachinanpaj.
He
5 Ñaupata achca micuyniyoj cajcuna
cananga yargaypita cällicunacho wañurcaycan.
Alli wasicho wiñajcuna
cananga ganracuna goturaycashanchömi tiyarcaycan.
Vav
6 Marca-masëcuna tiyarcaycashan Jerusalencho juchata
rurashanga caycan Sodomacuna juchata rurashanpita mas piyurmi.
Sodomaga illajpitami illgaran pipis mana juchuycächiptillan.
Zayin
7 Mandaj runacunaga caran rashtapita, lëchipitapis mas yurajrämi.
Cuerpuncunapis pucaypa-pucaycaran.
Cäranpis gueshpi ruminörämi caran.
Jet
8 Cananga mancapa siquinno pasaypa yanayashami caycan.
Cällichöpis manami pipis rejsinmannachu.
Yantano pasaypa chaquisha garan tullullannami caycan.
Tet
9 Pillyacho wañojcunaga allipämi wañucuran canan yargaywan wañunanpitaga.
Yargaywanga micuy mana wayuptin cuyapaypaj ñacar-rämi wañusha.
Yod
10 Marca-masëcuna tiyashan siudäta illgächiptenga quiquinpa wamrancunami micuyninpis casha.
Cuyapäcoj alli warmicunami wamrancunata yanucarcärisha.
Caf
11 Tayta Diosga fiyupa rabyasha caycashantami pascacächisha.
Fiyupa rabyasha cashpanmi castigasha.
Siontaga ninata sindipaycuran.
Chauraga simintuntinta rupar ushacurcuran.
Lámed
12 Cay pachacho caycaj raycuna,
ni pï runapis cay munduchöga manami imaypis riguinmanchu caran
chiquimajcuna Jerusalenta charicurcunantaga.
Mem
13 Chaynöga llapanpis casha profëtacuna juchata rurashanpitami, cüracuna fiyupa mana allita rurashanpitami.
Paycunaga jinan siudächömi alli runacunata wañuchishpan yawarninta mashtaran.
Nun
14 Chaypitami cällicunapapis puriycan gaprano, mayman chayaytapis mana musyashpan.
Yawarpita mana cawaj captinmi pipis mana yatayllapis yataycuyta munanchu.
Sámej
15 «¡Witicuy-llapa! ¡Chaycunaga ganra runacunami caycan!» nir gayarpan.
«Guella puricachaj runacunami.
Amana caychöga tiyachunnachu» ninmi Diosta mana rispitajcunaga.
Pe
16 Tayta Dios rabyacurcushpanmi wacpa caypa mashtacächisha.
Nircur mananami imaypis ricärishanachu.
Chaymi runacunaga cüracunata mana rispitashanachu.
Auquincunatapis manami cuyapashanachu.
Ayin
17 Yanapämänanchïpaj yarpashpanchïmi shuyaraycanchi mana salbamänanchïpaj caj nasyunta.
Shuyarar ricchacuycashallanami ñawinchïpis uticasha.
Tsade
18 Chiquimajcunaga ricaparcaycämanmi.
Manami cällicunaman llojshiyllatapis puydëcunachu.
Ushacänanchïpäpis wallcanami pishin.
Ushacänanchïpaj caj öra chayaycämunnami.
Qof
19 Nogacunata gaticachämajcunaga
ancacunapitapis mas fiyupa aywajmi.
Jircacunapami gaticacharcaycäman.
Chunyaj chaqui jircachöpis shuyarpaycämanmi.
Resh
20 Tayta Dios acrashan raytapis prësumi charisha.
Paymi noganchïtaga cawaycächimaranchi.
Chay raypämi nogacuna nej cä:
«Paypa munayninchömi tiyashun nasyuncunapa chaupincho» nir.
Shin
21 Uz particho caj Edom nasyun runacuna mä cushicuy ari.
Gamcuna cajmanpis castïgu chayamongapämi.
Chauraga macharcur garapächulla cashannömi pengaypaj ricacunquipaj.
Tav
22 Sión, castïguyqui cumplishanami.
Tayta Diosga mananami imaypis jitarishunquipänachu.
Edom runacuna, gamcunatami ichanga mana allita rurashayquipita castigashunquipaj.
Nircur juchayquicunata pï-maytapis musyachengami.