6
Yanasancuna
1 Llapan warmicunapitapis mas cuyayllapaj warmi,
¿maypataj aywacusha cuyayniquega?
¿Maymantaj aywanman?
Ashej aywashun ari.
Warmin
2 Cuyaynëga aywasha wertanmanmi.
Payga aywasha cuyayllapaj alli asyaycaj wayta wertanmanmi.
Chaymanmi aywasha uyshancunata michicoj,
rösa waytacunata pallaj.
3 Nogaga cuyaynëpami cä, paypis nogallapami.
Payga uywancunata michin liryu waytacuna cashanchömi.
Pichga caj cantana
Runan
4 Cuyaynë, gamga canqui Tirsa siudänöpis fiyupa cuyayllapämi,
Jerusalén siudänöpis maysi cuyacuyllami;
pipis mana ichipashan pillyaman aywaycaj suldärucunanömi.
5 Amana ricapämaynachu ari.
Ricapämashpayquega pengacachimanquimi.
Ajchayquicunapis cabra-mallwacuna
Galaad jircacunapa pañar purejnörämi caycan.
6 Quiruyquicunapis llapan cuyayllapaj yurajllami carcaycan.
Chayga carcaycan bäñashanpita
uyshacuna fïlayllanpa chayraj llojshirisha caycajno
millwanta rutunanpaj alli caycajnömi.
7 Granadata pullanpa partirishanömi
shucutayqui rurincho cärayquega caycan.
8 Sojta chuncami (60) caycan raypa warmincunaga.
Pusaj chuncami (80) caycan chïnancunaga.
Raypa donsëlla jipashnincunaga aycashi caranpis.
9 Chayno captinpis cuyashä palumäga jucnayllami.
Payllatami acrashcä.
Pay japallanmi caycan
maman gueshyacushpan mas cuyashan cäga.
Jipashcunapis ricashpan «alli goyay» nin.
Raypa warmincunapis, chïnancunapis paypäga allitami parlan.
Yanasancuna
10 ¿Pitaj chay watgarcamun
tutapa inti yagarcamojnöpis?
Quillanöpis cuyayllapämi,
intino achicyaycachaycaj,
pipis mana ichipashan pillyaman aywaycaj suldärucunanömi.
Warmin
11 Nuwal yöracunalla caycashan muntipa aywashcä.
Aywashcä yacu aywaj ragra cantun pampa berdiraycajta ricapaj.
Übas chichiycajta, granada waytaraycajta
ricayta munashpämi urashcä.
12 Chaypitaga manami musyashcänachu imano cashätapis.
Raynëpa ñaupanchöna cawallu garchashan carrëtacho ricacushcä.
Yanasancuna
13 ¡Cuticamuy, Sulamita, cuticamuy ari!
¡Gamta ricaytami munä! ¡Cuticamuy ari!
Warmin
¿Imano caycajtataj Sulamitataga ricayta munarcaycanqui?
Yanasancuna
¡Tolducunacho gachwajno gachwaycajtami ricayta munä!