RI WUJ RI XTZꞌIBꞌAX CHIKE RI WINAQ HEBREOS
Majibꞌal re
Wuj ri xtaq chike ri winaq aꞌj Israel, man qas ta qꞌalaj jachin xtzꞌibꞌan we wuj riꞌ xuqujeꞌ jachin chike xtaq wi. Pune jeriꞌ we wuj riꞌ kuqꞌalajisaj jas ri tzꞌibꞌatal chupam xuqujeꞌ jas rumal xtzꞌibꞌaxik.
Ri kechꞌabꞌex chupam we wuj riꞌ are ri winaq aꞌj Israel ri e kojoninaq che ri Jesús xa kꞌu raj kakiya kanoq ri kikojobꞌal, kejunumataj kukꞌ ri winaq ri e kꞌo pa ri tinimit Italia, ri ajtzꞌibꞌ re we wuj riꞌ kuya kan rutzil kiwach ri aꞌj Italia kukꞌut chiqawach chi alaxik pa Cristo Jesús.
Ri karaj we wuj riꞌ kubꞌij are chi ri ukabꞌ chꞌekom tzij kꞌo na ubꞌanik cho ri nabꞌe, ri e sikꞌil taq re we wuj riꞌ ketaqchiꞌxik rech ko kekꞌojiꞌk pa ri kikojobꞌal rech ri kꞌakꞌ jastaq ri xuya ri Jesús chike.
We wuj riꞌ kuxol ukꞌutik taq ri jastaq, kuya ukꞌutik ri utzijoxik ri ukꞌaslemal ri tinimit Israel xuqujeꞌ ri qꞌijilaꞌnik ri kabꞌan pa ri Ja Templo Dios je xuqujeꞌ kutzijoj rij ri rajawaxik kabꞌanik.
Kꞌo kajibꞌ kꞌutuꞌn ri kutzijoj rij:
1. Ri Jesús xuqujeꞌ ri koltajem are sibꞌalaj nim na chikiwach ri angelibꞌ xuqujeꞌ ri koltajem ri xkitzijoj loq ojer. (Ri utaqanik ri Moisés)
2. Ri Jesús are ri achi ri xtaq loq chaqe uj (are waꞌ ri xutaq loq ri Dios chubꞌanik xa jun jastaq) xuqujeꞌ kujukꞌam bꞌik pa jun nimalaj uxlanem xuqujeꞌ pa jun jeꞌl laj ulew ri xekꞌam wi bꞌik ri tinimit Israel kumal ri Josué rachiꞌl ri Moisés.
3. Ri Jesús are nimalaj kꞌamal kibꞌe ri chꞌawenelabꞌ jeriꞌ kubꞌij ri utaqanik ri Moisés. Rumal kꞌu che ri Dios ubꞌanom ri ubꞌim loq pa ronojel ri qꞌotaj ri ikꞌowinaq rajawaxik chi kujkꞌojiꞌk pa ri tunal rumal uj kaqakꞌutwachij uwach ri Dios rumal are ukꞌaꞌninaq ronojel ri jastaq rukꞌ ri kwinel laj utzij.
4. Ri Jesús are xchꞌajtaj ronojel ri makaj rumal, xtꞌuyiꞌk pa ri uwiqiqꞌabꞌ ri Nim ubꞌanik pa ri kaj. Rumal riꞌ xux nim uqꞌij chikiwach ri angelibꞌ xuqujeꞌ ri ubꞌiꞌ kꞌo na chikiwach ri kibꞌiꞌ ri angelibꞌ.
1
Nim uqꞌij ri Kꞌojolaxel chikiwach ri angelibꞌ
1 Ojer uloq ri e qꞌalajisal taq tzij xkibꞌij ri utzij ri Dios chike ri e qatat qanan. Kꞌi mul xkitzijoj ri tzij xuqujeꞌ jaljoj xkibꞌan chubꞌixik.
2 Kamik kꞌut pa we kꞌisbꞌal qꞌij junabꞌ, ri Dios xujuchꞌabꞌej xa rumal ri Ukꞌojol. Rumal rech ri ukꞌojol xutik ronojel ri jastaq, xuqujeꞌ xubꞌan che ri ukꞌojol xux ajchoqꞌe rech ronojel ri jastaq.
3 Ri kꞌojolaxel Dios are utunal ri ujuluwem ri Tataxel Dios, xuqujeꞌ je kapetik jas ri Tataxel, are xuqujeꞌ ri kꞌojolaxel ukꞌaꞌninaq ronojel ri jastaq rukꞌ ri tzij rech ri ukwinem. Ri ukꞌojol ri Dios xkwinik xubꞌano chi ri Dios xukuy ronojel ri qamak, kꞌa te riꞌ xpaqiꞌ chikaj rech xeꞌtꞌuyul pa uwiqiqꞌabꞌ ri tꞌuyul wi ri Dios.
4 Ri ukꞌojol ri Dios xuxik nim uqꞌij chikiwach ri angelibꞌ, jeriꞌ rumal xya che rumal ri Dios jun bꞌiꞌaj nim cho ri ke aꞌreꞌ.
5 Rumal cher ri Dios man xubꞌij taj che jun ángel:At at nukꞌojol, kamik riꞌ kinux aTat. Xuqujeꞌ man xubꞌij ta che jun ángel: In kinux na uTat xuqujeꞌ Areꞌ kux na nukꞌojol.
6 Xuqujeꞌ are xutaq loq ri Dios ri ukꞌojol pa we uwachulew riꞌ, xubꞌij: Qꞌijilaꞌx ri ubꞌiꞌ kumal konojel ri angelibꞌ.
7 Xuqujeꞌ are katzijox kij ri angelibꞌ rumal ri Dios jewaꞌ kabꞌix chike: Kubꞌan rangelibꞌ che ri kyaqiqꞌ xuqujeꞌ kubꞌan patanil taq re che ri kayapaꞌ.
8 Are katzijon ri Dios chirij ri kꞌojolaxel, kubꞌij: Ri ajawarem la Dios jeqel chibꞌe qꞌij saq, kakoj ri kwinem la chubꞌanik ri sukꞌal.
9 Xloqꞌaj la ri sukꞌal xuqujeꞌ xetzelaj la ri etzelal; rumal riꞌ ri Dios, ri Dios la, xuqꞌij aceite rech kiꞌkotemal pa wiꞌ la, xuya qꞌij la chikiwach ri achiꞌl la.
10 Xuqujeꞌ kubꞌij:
Ajawxel, xtik la loq ri uwachulew pa ri majibꞌal rech ronojel xuqujeꞌ lal xbꞌanow la ri e kaj.
11 We jastaq riꞌ kasach na kiwach, are kꞌu ri lal jeqel la chibꞌe qꞌij saq. We jastaq riꞌ kejar na jetaq ri kakibꞌan ri atzꞌyaq.
12 Kebꞌus na la jetaq ri kabꞌan che jun manta, xuqujeꞌ kekꞌexen na jetaq ri atzꞌyaqibꞌal; ri lal kꞌut man kakꞌexen ta wi la, xuqujeꞌ ri junabꞌ la maj ukꞌisik.
13 Ri Dios man xubꞌij ta che jun ángel: Chattꞌuyul pa ri uwiqiqꞌabꞌ ri nutꞌuyulibꞌal kꞌa pa ri qꞌij ri keꞌnya na ri akꞌulel chuxeꞌ ri utakꞌalibꞌal ri awaqan.
14 Jeriꞌ rumal ri angelibꞌ uꞌxlabꞌal e patanil rech ri Dios, are ri Dios ketaqow loq ri angelibꞌ chikitoꞌik ri winaq ri kakikꞌamawaꞌj ri kolotajem.