LA CARTA A LOS
HEBREOS
1
Dios niskanta willawanchej Cristonejta
1 Ñaupa tiempospi Dios niskanta unay tatasninchejman willarka. Ashqha cutista imaymanaspitaj niskanta unay willajcunannejta parlarka.
2 Cunan cay khepa p'unchaycunapirí Dios nokanchejman niskanta willawarkanchej Wawan Cristonejta. Paytataj wiñaypaj churarka tucuy ima paypata cananpaj. Yuyaskanmanjinataj Dioska paynejta tucuy pachacuna cajta ruwarka.
3 Chay tucuy atiyniyoj Diosmanta mana khawarinapajjina c'anchay llojsimun. Wawanka chaywan c'anchan cheka Diospa cayninta ricuchispa, payka Diosllataj caskanraycu. Chaywanpis Wawanka atiyniyoj niskanwan tucuy ruwaskan cajta purichin. Paytaj wañorka juchasninchejta khechunawanchejpaj. Chayta ruwaspañataj Dioswan cusca camachinanpaj janaj pachapi tiyaycucorka wiñay jatunchaska cananpaj.
Cristoka may aswan sumajmin ruwaskanpi atiyninpipis
4 Cristoka may aswan sumajmin tucuy imapi. Chaymanjinataj paytaka aswan sumaj sutiwan Dios jatuncharka angelesmanta niskaka. Chayraycu payka angelesmanta astawan curajpaj khawaskamin.
5 Yachanchej: Ni jayc'aj mayken angelmanpis Dios nerkachu:
Waway canqui.
Cunan p'unchay kanta noka jatunchayqui, nispaka.
Chaytaka Wawan Jesusllaman nerka. Astawanpis Dios cay pachaman payta cachamushaspa nerka:
Noka Tatayqui casaj.
Kantaj Waway canqui, nispa.
6 Ujtawan cay pachaman c'ata Wawanta cachamuspataj nenka:
Diospa tucuy angelesnin Cristota yupaychachuncu, nispa.
[Chaywan ricuchenka curaj caskanta.]
7 Palabranpi ricuchin angeleska janaj pachapi Diospa camachisnin caskancuta:
Angelesninri wayrajina uskhayta rincu.
Camachisnintaj ninajina callpawan munayninta ruwancu, nispa.
8 Wawanmanrí cayta Dios nin:
Kanka Dios canqui.
Wiñaypa wiñayninpaj tucuyta camachinqui.
Tucuy camachiskayqueka chekanpuni.
9 Cay pachaman jamuspa chekan caj ruwaskasta munacoj canqui.
Sajra caj ruwaskastataj chejnicoj canqui.
Chayraycu noka, Diosniyqueka, may sumaj cusiywan Camachej canayquipaj churarkayqui.
Causaj-masisniyquimanta astawan curajpaj churarkayqui, nispa.
10 Wawanman nillantaj:
Kanka Señor canqui. Manaraj ni ima cashajtin kallariypi cay pachata sayacherkanqui.
Janaj pachapis kanpa ruwaskayqui.
11 Cay pachapis janaj pachapis tucuconkancu. Kanrí wiñaypaj canqui.
Tucuy chay ruwaskaka p'achajinalla mauc'acaponka.
12 P'achatajinataj mauc'acapojtenka wajwan cambianqui.
Kanrí wiñaypaj quiquillanpuni canqui.
Causayniyquitaj ni jayc'aj tucuconkachu.
13 Ni jayc'aj mayken angelmanpis Dioska nerkachu:
Nokawan cusca tiyaycucuy camachinayquipaj, nispaka.
Manachayrí Wawan Cristollaman nerka:
Nokawan cusca tiyaycuy camachinayquipaj enemigosniyquita k'alata atipanaycama, nispa.
14 Angeleska tucuynincu espirituslla cancu, Diospa camachisnillan. Paycunaka wiñay causayta jap'ejcunata yanapanancupaj cachamuskas cancu.