23
Jesusta Pilatoman apancu
1 Tucuynincu sayarispa, Jesusta Pilatoman aparkancu.
2 Pilatopaj ñaupakenpi juchachayta kallarerkancu nispa:
—Cay runata taripaycu nacionniycupi runacunata pituchcajta. Manataj munanchu impuestota gobiernoman paganata. Pay quiquintaj ‘Cristo Rey cani’ nin.
3 Pilato taporkan:
—¿Kanchu judiocunapaj Reynin canqui?
Jesustaj nerkan:
—Arí, kan ninqui —nispa.
4 Pilatotaj sacerdotecunapaj jefencunaman runacunamanpiwan nerkan:
—Mana ima juchatapas tarinichu cay runapi.
5 Paycunataj astawan atipacorkancu nispa:
—Yachachiynincunawan tucuy runacunata pituchin, Galileamanta kallarispa tucuy Judeacama.
Jesusta Herodesman apachincu
6 Cayta uyarispa, Pilato taporkan Galileamantachus caskanta.
7 “Arí, Galileamanta” nejtincutaj, Herodespajman cacharkan. Chay Galilea gobernaj chay p'unchaycuna Jerusalenpi cachcarkan.
8 Jesusta ricuspa, Herodes cusicorkan. Achqha tiempoña ricuyta munarkan, Jesús milagro ruwaskancunamanta uyariskanraycu. Paypas milagro ruwachcajta ricuyta munarkan.
9 Tucuy imata tapojtin, Jesús mana imatapas contestarkanchu.
10 Chayllapitaj sacerdotecunapaj jefencuna leymanta yachachejcunapiwan cachcarkancu sinchita juchachaspapuni.
11 Chhicari Herodes soldadoncunawan millarpayarkancu. Reyta jina allin fino p'achata churaycuspa, burlacorkancu. Chaymantataj Pilatoman cutichiporkan.
12 Chay p'unchay Pilato Herodeswan amigo caporkancu. Ñaupajtaj enemigontin carkancu.
Jesusta juchachancu wañunanpaj
13 Pilato sacerdotecunapaj jefencunata, autoridadcunata, llajtayojcunatawan tantaycorkan.
14 Nerkantaj:
—Kancuna cay runata apamuwanquichis, ‘Runacunata pituchcan’ nispa. Nokataj kancunapaj ñaupakeyquichispi tapuspa, ni ima juchata tarinichu juchachaskayquichismanta.
15 Nillataj Herodespas juchata tarinchu; chayraycu cutichimpuwan. Ña ricunquichisña, mana ni imatapas ruwanchu wañuchinapaj jinaka.
16 Jasut'isaj, chaymantataj cacharipusaj.
17 Sapa Pascuapi Pilato uj presota cacharej, runacunata agradanapaj.
18 Chayraycu, tucuynincu wajach'acuyta kallarerkancu:
—¡Ama chaytaka cachariychu! ¡Barrabasta cacharipuy! —nispa.
19 Barrabastataj presochaskacu chay llajtapi pitucuskanmanta, uj runata wañuchiskanmantapiwan.
20 Pilato Jesusta cacharipuyta munaspapuni, ujtawan runacunaman parlarkan.
21 Paycunataj astawan wajach'acorkancu nispa:
—¡Chacataska cachun, chacataska cachun!
22 Quimsa cuticama Pilato paycunata nerkan:
—¿Imatapunitaj mana allinta ruwanri? Mana ni imata tarinichu wañuchinapaj jinaka. Jasut'ispa, cacharipusaj.
23 Paycunataj wajach'acuchcallarkancupuni chacatachinancupaj. Sinchita wajach'acuskancuwan munaskancuta uyarichicorkancu.
24 Pilato mandarkan mañaskancuman jina.
25 Ajinaka ajllaskancu Barrabasta cachariporkan, Jesustataj entregaporkan chacataska cananpaj. Barrabastaj runacunata pituskanraycu runata wañuchiskanraycu carcelpi cachcarkan.
Jesusta chacatancu
26 Jesusta chacatanancupaj apachcaspataj, Cirenemanta Simón sutiyoj runata jap'erkancu campomanta jamuchcajtin; paywan cruzta apacherkancu Jesuspaj khepanta.
27 Achqha runa achqha warmicunapiwan katerkancu wakaspa, llaquicuymanta kaparispa Jesusmanta.
28 Jesustaj khawarispa, nerkan:
—Jerusalén warmicuna, ama nokamanta wakaychischu; manachayri kancuna quiquiyquichismanta wawayquichiscunamantawan wakaychis.
29 Jamonka p'unchaycunaka, chaypi nenkacu: ‘Cusicuyniyoj mana wawayoj cay atejcuna, mana onkojyajcuna, mana ñuñuchejcunapas.’
30 Chhica runacunaka orkocunata nenkacu: ‘¡Nokaycu pataman urmaycamuwaycu!’ Lomacunatataj nenkacu: ‘¡Pacaycuwaycu!’ nispa.
31 ¡Causachcaj sach'awan cay tucuy imata ruwaspaka, imatarajchá ruwankacu ch'aqui wañuska sach'awanka!
32 Apallarkancutaj iscay mana allin ruwajcunata Jesustawan chacatanancupaj.
33 Calavera sutiyoj lugarman chayaspa, Jesusta chacatarkancu iscay mana allin ruwajcunatawan, ujta pañannejpi ujtataj llok'ennejpi.
34 Jesús nerkan:
—Tatáy, juchancuta perdonapuy; mana yachancuchu imatachus ruwaskancuta.
Soldadocunataj paypaj p'achanta partinacunancupaj sorteachcarkancu.
35 Runacunataj khawachcarkancu. Autoridadcunantin Jesusmanta burlacuspa, nerkancu:
—Wajcunata salvarkan; cunanka pay quiquin salvacuchun, Diospaj ajllaskan Cristo caspaka.
36 Soldadocunapas burlacorkancu, c'allcu vinota ujyachispa.
37 Nerkancutaj:
—¡Judiocunapaj Reynin canqui chayka, salvacuy kan quiquiyqui!
38 Cruz puntapi uj escribiskata churarkancu. Chaypi nerkan: “Cayka Judiocunapaj Reynin” nispa.
39 Ujnin mana allin ruwaj chacataska insultarkan:
—¡Kan Cristo canqui chayka, salvacuy, nokaycutapas salvallawaycutaj! —nispa.
40 Ujnintaj payta c'amerkan:
—¿Manachu Diosta manchacunqui, kanpas quiquin castigopi cachcaspa?
41 Nokanchiska tucuy razonwan ñac'arichcanchis; jucha ruwaskanchismanta justo castigota pagachcanchis. Caycajri ni ima juchata ruwarkanchu.
42 Nillarkantaj:
—Jesús, gobernayta kallarispa, yuyaricuway nokamanta.
43 Jesustaj contestarkan:
—Segurayqui, cunanpacha nokawan paraisopi canqui.
Jesús wañupun
44 Chaupi p'unchaymanta quimsa hora tardecama, tucuy cay pacha Tutayaycorkan.
45 Intipas tutayaycorkan. Templopi athun cortina iscayman lliq'icorkan, janajmanta urayman.
46 Jesús alto vozwan wajach'acorkan nispa:
—¡Tatáy, kanman espirituyta koyqui!
Chayta nispataj, wañuporkan.
47 Capitantaj caycunata ricuspa Diosta alabarkan:
—Ciertopuni, cay runaka mana juchayoj.
48 Tucuy chaypi caj runacuna chayta ricuspa, puriporkancu, llaquicuymanta pechoncuta tacacuspa.
49 Jesuspaj amigoncuna Galileamantapacha purej warmicunapiwan chaypi cachcarkancu, carumanta chay pasaskancunata khawaspa.
Jesusta p'ampancu
50 Uj allin justo runa carkan, José sutiyoj, Judeapi caj Arimatea llajtamanta. Judiocunapaj Athun Asambleanmanta ujnin carkan.
51 Cay Joseka Diospaj gobiernonta suyachcarkan. Mana payman allinchu yuyacorkan Athun Asambleapaj ruwaskancuna.
52 Pilatopajman purispa, Jesuspaj cuerponta mañarkan.
53 Cruzmanta apakaspa, fino sabanawan p'istuycuspa, kakapi jutc'uska sepulturaman churaycorkan, manaraj aya churaska sepulturaman.
54 Pascua waquichina niska p'unchay carkan, samana p'unchay kallaricuchcarkanña.
55 Galileamanta Jesuswan purej warmicuna purispa sepulturata ricorkancu, imaynatachus Jesuspaj cuerponta churaskancutawan.
56 Wasincuman cutipuspa, sumaj k'apayniyoj perfumecunata jawinacunatawan waquicherkancu. Samana p'unchaypi warmicunaka samararkancu leyman jina.