2
Tayta Diosnintsita manacunantsipag tantyatsicuy
1 Timoteo, waugui-panicunata shacyätsinqui Tayta Diosnintsita agradëcicur lapan runacunapag imaypis manacunanpag.
2 Tsaynogpis Tayta Diosnintsita manacäritsun nación mandag reycuna y waquin autoridäcunapis ali mandananpag. Ali mandananpag Tayta Diosnintsi yanapaptinmi nogantsipis tranquïlo cawar Tayta Diosnintsi munashgannog cawashunpag.
3 Lapan runacunapag Tayta Diosta manacorga pay munashgannogmi manacuycantsi.
4 Payga munan lapan runacuna, ali wilacuyninta chasquicur, salvashga canantami.
5 Paypa wilacuynenga caynogmi niycan:
Pï-maypagpis juclaylami Tayta Diosnintsega.
Tsaynogpis Tayta Dioswan ali cawanantsipag juc runalami salvamagnintsi.
Tsay salvamagnintsi runaga Jesucristumi caycan.
6 Paymi wanushga lapan runacunata Tayta Diosnintsi perdonar salvananpag.
Tsaynog salvacog cashgantaga may-tsaychöpis wilacurcaycanmi.
7 Tsay wilacuyta wilacunäpagmi Tayta Diosnintsi churamashga. Tsaymi apostolnin car may-tsaychöpis mana Israel runacunata ali wilacuyninta yachaycätsë.
8 May-tsaychöpis juntacashgancho Tayta Diosta manacunanpäga wauguicuna manami piwanpis rimanacushgatsu canman ni pitapis nanaparaycanmantsu.
9 Warmicunapis pengacuypäga ama jaticäritsuntsu. Tsaynogpis ama yarpachacäritsuntsu agtsanta aläpa altsacärinanpag ni aläpa adornacärinanpagpis.
10 Fïnu röpalapag yarpachacärinanpa trucanga Dios munashgannog alicunata rurar cawananpag yarpachacäritsun.
11 Iglesiacho yachatsipäcushganta warmicuna upälala chasquicutsun.
12-14 Musyashgantsinogpis Adanta camarcurragmi Evata Tayta Diosnintsi camargan. Tsaynogpis manami Adantatsu Satanás engañargan Tayta Diosnintsi mandashgancunata mana cäsucunanpag, sinöga Evatami. Tsaymi juntacashgancho warmicuna olgucunata mana yachatsinmantsu ni mandanmanpistsu.
15 Tsaynog cananpa trucanga warmicuna wawancunata shumag ashmapäcutsun. Nircur Tayta Diosnintsiman yäracur pï-maywanpis cuyanacur cawatsun. Tsaynog cawarga salvacärengami.