51
Tata Diosta roygaypachi perdonawananchikunapa.
1 A, Tata Dios,
kuyawashpayki llakichiway.
Llakichiwashpayki uchallikushkaynimanta perdonaway.
2 Kuyawashpayki mana alli rurashkaynimanta perdonawashpa mayllaway.
Tukuy uchaynikunamanta pichaway.
3 Allita yachani kanta mana kasunayashpayni uchallikushkaynita.
Uchallikushkaynita mana atipanichu kunkayta.
4 A, Tata Dios,
uchallikushpayni mana allikunata rurashpayni
kanta mana kasunayashkaykichu.
Chashna mana kasunayashpayni rabyachishkayki.
Uchallikushkaynirayku kastigawanayki tiyan.
Kan kastigawashpayki
allininpi kastigawanki.
5 Nasishkaynimantapacha
mana alli rurakmi kani.
Mamaynipa wiksan ukumantapacha uchasapami kani.
6 A, Tata Dios, kanka alli shunkuyuk runata kuyanki.
Shunkuynipi allita yachachiwashkanki.
7 Uchaynikunamanta pichaway
ñawpaknikipi chuya chuya rikurinaynipa.
Mana alli rurashkaynimanta mayllaway.
Chashna mayllawaptiki yurak puyushina kiparisha
allita rurashpa kawsanaynipa.
8 A, Tata Dios, kushichiway.
Kastigawashkaykimanta kashkan kushichiway.
9 Amana uchaynita yuyaynachu.
Mana alli rurashkaynita kunkay.
10 A, Tata Dios,
uchasapa yuyayninita pichay.
Yanapaway kanta kuyashpa
allita rurashpa kawsanaynipa.
11 A, Tata Dios,
ama ñawpaknikimanta karkuwaychu.
Ama Espirituykita kichuwaychu.
12 Perdonawashpa kashkan kushichiway.
Chashna kushichiwashpayki yanapaway allita rurashpa kawsanaynipa.
13 Chashna yanapawaptiki
mana kasushunayak runakunata rimanaykita yachachisha
munanaykita rurashpa kawsanankunapa.
Chashna yachachikuptini
uchasapa runakuna uchankunata wanashpa kasushushpa kawsankasapa.