18
Pê krãhtare te Jeju pro
1 Ne Jeju te Hũm mã ihcakôc to hajỹr jirô pê mã rima me ipê ihkôt me ipa catêjê to mõ, Kỳhti jõcaprũm jĩkjê wỳr. Mã curi pĩxô jõ pjê ata, wa cumã me ixàr.
2 Pê Juta pê Jeju kên mã mẽn catê ataramã pjê ata jahkre pej. Ampo na? Pê Jeju ramã curi me ito ipa to hàhtôa na pê.
3 Mã ma me iwỳr Juta ata krãhtare kwỳ to mõ, mã hanea ne mehkôt Pahpãm jũrkwajamãr catêjê kwỳ me mõ. Ne pê Pĩxô jõ pjê atawỳr me mõ atajê pê, me cumã Pahpãm mã mehcajrẽncatêjê jõ pahhi kwỳ me, Parixêw catêjê kwỳ me, me ajpẽn pa, na pê me harkwa kôt me iwỳr me hàprê xà me, ihpôc xà me, cuhy pàr kwỳ me, me to mõ.
4 Pê ramã Jeju ampo te to hajỹr xà atajê cuneajahkre pej. Cwỳrjapê ri me cuna mã mõ, ne cute mehcukij to:
— Jũm mã ca ame hapê? — hajỹr.
5 Mã me cumã:
— Naxare jõ krĩ pĩn Jeju cator ata wa amehapê — hane. Mã hanea ne Juta pê Jeju kên mã mẽn catê ata me cahê na xa. Mã Jeju me cumã:
— He pa wa! — hane.
6 Mã Jeju te me cumã amji jarẽn to: “He pa wa” hajỹr, me ajkaam mã hũpate Juta kôt me ipa catêjê cunea, hacpỹ mã pjê kam me hõ to ame ipihur.
7 Mã hipêr Jeju te mehcukij to:
— Jũm mã ca ame hapê? — hajỹr. Mã me cumã:
— Naxare jõ krĩ pĩn Jeju cator ata wa ame hapê — hane. Mã me cumã amji jarẽn to:
8 — Wa ite ramã me amã amji jarẽn, he pa wa. Ne ca ha ate ame pamãn japên na, ca ha nee ame ikwỳ caxun nare, quêt taa ame pra — hane.
9 Ampo na ri cute ita ton? Nee mã ampo na nare. He pêramã taa me ahna Hũm mã amji jarẽn to: “Ijõ Inxũ Cati, ate imã me hõr itajê, ite nee amji pê mehnõ to ipictor xà nare” hane.
Pê Petrô jũm ita japac jakep
10 Mã Ximãw Petrô te wapo xwahhihti caxàr, ne tohũmre nõ japrỳ te Marco ita jaxôp, ne awpôcrũm to hapac jakep. Ne pê hũmre ata pê Pahpãm mã mehcajrẽn catêjê jõ pahhi mã hàpên catê.
11 Mã Jeju te Petrô mã harkwa to:
— Ajõ wapo xwahhihti ita xi, nee ca apu to me cupêipytàr prãm nare. He ite amji pupun xà kêanre xà ita caxuw ri Inxũ te ajpên iwỳr mehkujahêc. Xà wa ha ajkĩ nee cumã ixàr nare? Wa ha itỳj cumã axà — hajỹr.
Jeju Anati cuna mã xa
12 Mã krãhtare me, to ihhimpej catê me, Pahpãm jũrkwa jamãr catêjê jõ pahhi kwỳ me, cute me Jejupro, ne hũntỳj na mehcajpre.
13 Ne pê Cajpa pê caku ata kam, me cupê Pahpãm mã cute mehcajrẽn catêjê jõ pahhi. Ne ma Cajpa ata jũprequêt pê Anati ata jũrkwa wỳr me to mõ.
14 Ne Cajpa pê pahhi ata pê ramã me hapackre to hane he: “Quê ha jũm xũmre pyxit peaj ne ty, cu ha nee me pahcunea me pahtyc nare” hane.
Pê Petrô cute nee Jeju pupun nare na, amji jarẽ
15 Wa ma Ximãw Petrô me, Jeju kôt me mõ. Pê ramãPahpãm mã cute mehcajrẽn catêjê jõ pahhiti ata ipupun pejtu. Cwỳrjapê wa ma Jeju kôt ixàr, pahhi jũrkwajarkwa mã carã intête kwỳc ata wỳr. Mã cormã curia, põ pê Petrô xa.
16 Wa ite harkwa jamãr catê cahãj nõ ata mã icakôc, ikwỳ nõ Petrô te ikôt hàr xà caxuw. Mã ihtỳj cute hàr na hamãr, mã hàr.
17 Mã cahãjre te hõmpun ne cumã harkwa to:
— Xà apê, por cute me jũm pro ata kôt apa catêjê nõamã ca? — hajỹr. Mã cumã:
— Quê! — hane.
18 Ne ampeaj kam kry, cwỳrjapê ri pahhi mã mehàpên catêjê me, krãhtare te me cuhôn, ne mehkrã neahna me xa, ne ame amji cro. Mã hanea ne me cahê na Petrô xa ne amji cro.
Pê Jeju cute Pahpãm mã mehcajrẽn catêjê jõ pahhiti cuna mã xa
19 Mã Pahpãm mã mehcajrẽn catêjê jõ pahhiti te Jeju cukij ne cumã:
— Jũmjê pê mã akôt me ipa catêjê? Ne ampo to mã caamehcunea mã hahkre to apa? — hajỹr.
20-21 Mã Jeju te cumã amji jarẽn to:
— He wa ijõtpê mehcunea kam mare mã icakôc to ipa. Neramã cute Pahpãm to me amji kam hapac xà jũrkwa me, cute me cuprõn xà jũrkwa atajê kam, ite me cumã ampo to hahkre to amji pyràc tu. Ne rỳ jũ caxuw ite ampo to ipimxur pêa mã apu harẽn to imõr nare, nõ na mã ca ajte apu icukij xà ita to icukij? Ne cute me ipar catêjê ca mehcukij, wa ite ampo jarẽn xà atajê na, cute me ipar to kênre nare. Na ca ha mehcukij — hajỹr.
22 Jeju te ihcakôc to hajỹr. Mã cahi na krãhtare xaata te cakwĩn, ne cumã harkwa to:
— Xà ajkĩ Pahpãm mã mehcajrẽn catêjê jõ pahhimã me pahcakôc xà te hajỹr? — hajỹr. Mã Jeju cumã:
23 — Wa ihhêaj to ampo jarẽn xà kaj na harẽ, ca ha mẽr imã harẽ, wa hahkre pej. Nãmri wa ha ite ampeaj kam ijũjarẽn na, ca ha nee icakwĩn nare. Ne mẽr ampo na mã ate icakwĩn? — hane.
24 Jirô pê mã ri Anati pê amji jahkre kêatre, mã cute Jeju cajprea na Cajpa, pê cute Pahpãm mã mehcajrẽncatêjê jõ pahhi ata mã ihkujahêc.
Pê hipêr Petrô cute nee Jeju pupun nare na amji jarẽ
25 Mã curia cormã cuhy na Petrô xa, ne amji cro. Mã cute mehcukij to:
— Xà apê cute me jũm pro ata kôt me apa catêjê nõa mã ca? — hajỹr. Mã me cumã amji jarẽn to:
— Quê, he nee ipê mehnõ nare — hane.
26 Mã pahhi mã hàpên catêjê nõ pê, por Petrô te jũm japac jakep ata jũkjê nõata, te Petrô jarẽn to:
— Mãr wa ite Pĩxô jõ pjê kam ihkôt apupunta? — hajỹr.
27 Mã hipêr Petrô cumã:
— Quê — hane, me ajkaam mã hôxãhxãc kàr.
Pê Jeju Roman catêjê jõ pahhi pê Pirat cuna mã xa
28 Jirô pê mã ri Roman catêjê nõ pê krĩ jõ pahhijũrkwati ata wỳr Jeju to me mõ, ramã apẽ intuwti kam. Mã nee ikre ata mã Juta catêjê nõ xàrnare. Ampo na? Cute me amji to me amji kam hapac xàa na pême hane. Quê ha ramã amji kĩn ata na ahtêp, quê ha nee Juta catêjê me, mehcahkrit catêjê atajê pê Juta catêjê nareatajê jũrkwa mã amencjêjnare. Ampo na? Cute amji kĩn ata japy ame amji to kêncupate. Na pê nee ikre ata mã Juta catêjê nõ hàrnare, cute ihtỳj me Hakren xà jõ atajê kur prãmte.
29 Mã Pirat pê Roman catêjê nõ pê krĩ jõ pahhi ata cator, põ mã, cute mehcajpar prãmte. Ne cute mehcajpar ne me cumã:
— Hũmre ita jarẽn kên jũ to mã, ca ha ame imãharẽ? — hajỹr.
30 Mã me cumã harẽn to:
— Quê ihkên nare na mã, wa ha nee mehpro ne awỳr me toimõr nare — hane.
31 Mã Pirat me cumã:
— Ca ha caa quêt, ate me amji kam me gapac xàa kôt, me ate me amji ton xàa kôt, mehcukij ne ihkên mã meamẽ — hane. Mã Juta catêjê me cumã:
— Pom hũmre ita te ihkên xà ton xà ita ihtỳj ihcuran na awjahkre. Cakrô wa nee amjia kôt ite mehcuran xà nare, ne apêa ri pahhi, cwỳrjapê ca ha caa amji kampa, ne ihcuran na me imẽ, wa ha cormã mehcura — hane.
32 Ne pê ramã Jeju kỳj pê, pĩ na ajêt ne ihtyc to mõr na amji jarẽa na pê, Juta catêjê cakôc xà ata ramã cute amji jarẽnxà ata na to ipipẽ to mõ.
33 Mã hacpỹa mã Pirat xàr, hũrkwa mã, ne cute Jejumã hàkjêr ne ihcukij to:
— Xà apê Juta catêjê jõ Pahhi? — hajỹr.
34 Mã Jeju cumã:
— Xà amjia kôt ate icukij xà ita to hajỹr? Nare jũmjête amã ijarẽn xà kôt mã ca ate icukij ita to hajỹr? — hane.
35 Mã Pirat cumã:
— Côt mã ca atỳj ipê Juta catêjê nõ na apuicãmjĩ? He me akwỳa kwỳ me, me hõ pahhi catêjê te riimã me gõr. Ne mẽr ampo to mã ate jũ mãn? — hane.
36 Mã Jeju cumã:
— He ihimpej xà ita pê nee pjê ita tekjê nare, ne quêt côjkwa kam ri ihimpej xà. Wa ha ipê pjê ita kam pahhi xà na mã, quê ha ramã ikôt me ipa catêjê ihtỳj itête me ajpu, Juta catêjê mã cute me ijõr to hajỹr cupate. Nenee pjê ita kam ipê pahhi xà nare — hane.
37 Mã Pirat cumã:
— Xà mẽr apê pahhi? — hane. Mã Jeju cumã:
— Pom ca atea ita na ijarẽn ita? Ampeaj kam ri ipêPahhi, ne ite catyt kam amji kam ijapac xà jarẽn to ipaxà caxuw, wa pjê ita wỳr icator, ne caxuaw pêwa ipỳm, ne pjê ita wỳr ajpên mõ. Ne por quê ha jũmampeaj kam ite catyt kam amji kam ijapac xà ata na itoamji mã ihhimpej ata, quê ha ihtỳj ikôat amji to — hane.
38 Mã Pirat cumã:
— Ne mẽr ampo pê mã “...ampeaj kam...” me “...catyt kam...” ita? — hane.
Pê Pirat Parapa mã hikra Jirô pê mã ri hipêr
Juta catêjê wỳr cator, cute mecumã ihcakôc prãmte, ne me cumã:
— Wa nee ite hũmre ita curan xà caxuw kam ampo kên nõ mã icator nare.
39 Ne me Hakren xà jõ amji kĩn ita cunea kam wahãn ne itỳj me amã me hacjên catêjê pyxit ne hapôj. Xà wa ha ajkĩ Juta catêjê jõ Pahhi ita mã hikra? — hajỹr.
40 Mã mehcunea ame caràr to:
— Quê, nee ca cumã hikran nare, Parapa mã, ca hahikra — hane. Ne por Parapa ata pê ri hàprêa kam mecupê ampo to pôj catê.