3
Paulus naetuꞌ nan fee Timotius leo Tesalonika neu
1-2 Sadi emi bubuluꞌ, faiꞌ fo ami laꞌo ela emi, nana ta ami hihii-nanaum fa. Ami mahiiꞌ man seliꞌ meu dama emi tehuu ta bisa fa. Ami ta manenete soꞌ, huu ria na de ami maetuꞌ fo fee Timotius neti. Tehuu au oo Silas mahaniꞌ kota Atena. Timotius, nana ami toranoom ma ami nonoom, no ami eiꞌ esa sama-sama malalaꞌo Yesus Kristus Tutui Malole Na. Ami madenu ni neti nana ela nanori emi ma natetea dale mara, fo ela emi namahere mara boe-boe natea neuꞌ Manetualain. No ria na, maneniko emi hapu susa boe emi ta matakeko fa. Homu mahere emi namahere mara. Huu fo emi bubuluꞌ mae, lahenda fo ramahere neuꞌ Kristus, neuꞌ ko ara hapu susa leo naꞌ boe. Faiꞌ fo ami bei sama-sama mo emi a, ami fee nafarereneꞌ neuꞌ emi mae, lahenda fo ramahere neuꞌ Ramatua Yesus, neuꞌ ko hapu susa-lela rupaꞌ ara. Besaꞌ ia basan dadi leoꞌ na so, hete!
Huu fo, au susa an seli no emi natuu-napadei mara, de au fee Timotius leo Tesalonika neti, ela ami bisa bubuluꞌ mae, emi bei mamahere maroo neuꞌ Ramatuaꞌ a, do taꞌa. Huu fo au dale ka dodaꞌ, boso losa nitu ra malaka na neti fo fufudiꞌ nalaꞌ emi, boe ma masadea Ramatuaꞌ a. Maneniko dadi tao leoꞌ na, sona ami nonoi-tatao maꞌulu ma mana dadi taaꞌ!
Timotius fali so, de neni tutuiꞌ neme lahenda kamahereꞌ fo nai kota Tesalonika a mai
Besaꞌ ia Timotius fali nemeꞌ Tesalonika mai so, ana neni tutuiꞌ, de tao na ami mamahoꞌo. Ana tui nae, emi mamahere maroo neuꞌ Kristus, ma emi masue-malai ao maroo esa no esa. Boe ma ana nafada nae, emi dale mara mafarene maroo, de mahiiꞌ maneta mo ami sama leoꞌ ami boe mahiiꞌ maneta mo emi.
7-8 Toranoo kara emin! Leo mae ami nai ia, mameda man bera na seliꞌ nana huu hapu susa-lela ta baianaꞌ, tehuu Timotius tutuin na tao na ami mamahoꞌo. Huu fo besaꞌ ia ami bubuluꞌ, emi namahere ma natea naroo neuꞌ Ramatuaꞌ a.
Paulus hule-haradoi fee lahenda kamahereꞌ fo rai Tesalonika
De, ami hule makasi dodouꞌ neuꞌ Manetualain no dale namahoꞌo, nana huu emi tuka mahere Ni. 10 Hatu-leledon ami hule-haradoi laꞌo naroo, fo ela kalu bisa sona ami maneta moo emi bali. Ami nau manori-mafada emi ela matetea-mamemepe emi namahere ma neuꞌ Ramatuaꞌ a.
11 Ami boe hule neuꞌ Manetualain, ita Aman ma Yesus Kristus, ita Ramatua na, fo soi enoꞌ losaꞌ ami bisa meu maneta seluꞌ mo emi bali. 12 Ami hule neuꞌ Ramatuaꞌ a fo Ana tao na emi boe-boe esa sue-lai esa. Ma emi boe sue-lai neuꞌ basa lehenda ra, sama leoꞌ ami sue-lai emi. 13 No ria na, Ana natetea emi dale mara, fo masoda no roos ma malalao-malalafuꞌ, losaꞌ neuꞌ ko Ramatua Yesus natafali mai, no lahenda nara, sona emi mapadeiꞌ nai ita Aman Manetualain mata Na, ta no sala-sikoꞌ soꞌ.
3:4 Lahenda Nadedenuꞌ ara Tutuin 17:15 3:6 Lahenda Nadedenuꞌ ara Tutuin 18:5