11
Ita muste tamahere taroo Manetualain, sama leoꞌ lahenda fai uluꞌ ara
1 Maneniko ita tamahere Manetualain, ria sosoa na nae, ita tamahere taroo Ni. Maneniko Ana helu nau tao hata esa, sona ita bubuluꞌ tae, tantu Ana tao tuka heheluꞌ ria. Leo mae ita bei ta sipo hata-hata esa boeꞌ, tehuu ita tamahere taroo.
2 Tebe ita bei-baꞌin ruma ramahere leoꞌ na. Huu ria na, Manetualain sipoꞌ asa no malole boe.
3 Dae-bafoꞌ a no lalai fo tita si besaꞌ ia a, ita tamahere tae, Manetualain riꞌ adu basa ia ra. Tehuu Ana ta adu pake hata fo hapu ni so, de lahenda dae-bafoꞌ a bisa ritan. Basa-basan fo hapu si a, dadi nana huu pake noi Ria Dedea-nafadan.
Habel
4 Habel namahere Manetualain. Huu ria na, ana neni neneni-fefeeꞌ malole lena aꞌan Kaen. Manetualain sipoꞌ no malole neuꞌ Habel ma neneni-fefeen, nana huu ria dale na roos. De, leo mae mate ni dooꞌ a so, tehuu ita bei bisa tanori nemeꞌ ana mai, nana huu ria namahere na.
Henok
5 Henok boe namahere Manetualain. Huu ria na de, Ramatuaꞌ a nahene-naaeꞌ ana leo nusatetu-ikutemaꞌ a neu, ela bosoꞌ mate ni. Lahenda rasakaꞌ ana, tehuu ta raneta roo ni fa, nana huu Ramatuaꞌ a naaeꞌ ana so. Ramatuaꞌ a sipoꞌ ana no malole, huu fo Ramatuaꞌ a nae, “Henok nana, lahenda fo tao na Au dale Ka namahoꞌo.”
6 De leo iaꞌ, toranoo kara! Tea na, nana Manetualain ta sipoꞌ no malole neuꞌ lahenda, fo ta namahere Ni. Lahenda fo nau leo Manetualain neu, ana muste namahere nae, memaꞌ Ramatuaꞌ a nai basa mamana. Ma ana muste namahere nae, Ramatuaꞌ a nau tulu-fali lahenda fo saka Ni a.
Noh
7 Noh boe namahere Manetualain. Huu ria na, Noh namahere Ramatuaꞌ a tepoꞌ fo Ana nafada memaꞌ nae, “Noh! Mafarereneꞌ! Neuꞌ ko Au tao alulutuꞌ dae-bafoꞌ ia pake faainaꞌ, fo lahenda bei ta parnaa rita fa.” Leo mae Noh boe bei ta parnaa nita rupa leo naꞌ a, ana namania-namanene neuꞌ Manetualain, ma tao ofaꞌ fo ela uma isi nara hapu sodaꞌ. Huu no ria namahere na, de Ramatuaꞌ a tao ni neuꞌ lahenda dale roos. Tehuu basa lahenda fo ta ramahere fa, Ramatuaꞌ a fee si huhuku mabera.
Baꞌi Abraham foa ela ria koro-tadun
8 Baꞌi Abraham boe namahere Manetualain. Huu ria na, de Manetualain naloo ni nae, “Abraham! Foa ela o koro-tadum fo leo mamanaꞌ esa muu, neuꞌ ko Au atudun neuꞌ o. Neuꞌ ko dae ria dadi neuꞌ o tititi-nonosi mara posakan.” Namanene leoꞌ na, boe ma ana tao tuka Ramatuaꞌ a hihii-nanaun, leo mae ana ta bubuluꞌ nae leo beaꞌ neu fa.
9 Tepoꞌ fo ana losa nai dae ria, boe ma nafoa mamana leleo na, de ana leo sama leoꞌ lahenda manamai nai dae fo Ramatuaꞌ a helu basa, nau fee ni a. Basa de ana ni Isak, ma upun Yakob boe leo reuꞌ na, huu fo Ramatuaꞌ a helu basa nau fee dae ria ela dadi neuꞌ sira posakan.
10 Ana namahehenaꞌ neuꞌ ko nasoda nai kota esa kahereꞌ nan seli. Manetualain riꞌ tao gambar fo nafoa kota ria.
Mama Sara
11 Sara, baꞌi Abraham sao na, boe namahere Manetualain. Leo mae ana bei ta parnaa boki fa, ma namalasi kokoo so, tehuu Ramatuaꞌ a tataon, de ana bisa dadi neuꞌ lahenda nusa bauinaꞌ esa bei-baꞌin. Ana namahere nae, tantu Manetualain tao tuka hata fo Ana helu so a.
12 Huu ria na, de leo mae namalasi kokoo boe, ana bei bisa boki na tititi-nonosiꞌ dodouꞌ, losaꞌ ta hapu lahenda reke rala si. Huu fo sira dedesi na sama leoꞌ ruuꞌ nai lalai, ma soroaeꞌ nai tasiꞌ a suu na.
Baꞌi kamahere ara ma ramahena nusa-namo esa
13 Ita bei-baꞌin, baꞌi Abraham, baꞌi Isak, ma baꞌi Yakob boe ramahere raroo Manetualain losaꞌ ara mate. Tehuu ara bei ta sipo nusa-namo fo Ramatuaꞌ a helu so a. Leo mae leoꞌ na boe, ara ramahena raroo no dale namahoꞌo, nana huu ara rai dooꞌ a tehuu rita dae ria so. Ara manaku rae, sira nana noi lahenda manamai, fo leo lalai nai dae-bafoꞌ ia.
14 Sekona te, tea na nana lahenda fo dedea rupa leo naꞌ, ara rahiiꞌ ran seli hapu mamanaꞌ esa ela dadi neuꞌ sira dae posakan.
15 Maneniko nusa-namo fo ita bei-baꞌi nara rahiiꞌ ran seli a, riꞌ baꞌi Abraham dae fua-funin, sona tantu hapu lelaꞌ dodouꞌ fo fali leo naꞌ reu.
16 Tehuu nusa-namo fo ara rahiiꞌ ran seli a, riꞌ nusa-namo kahereꞌ nan seli nai nusatetu-ikutemaꞌ a.
Huu ria na, Manetualain sipoꞌ asa no malole, de ara dadi reuꞌ Ria lahendan.
Huu fo Ana sadia memaꞌ kota esa soaneuꞌ asa nai nusatetu-ikutemaꞌ a.
Baꞌi Abraham fee heni anan Isak
17-18 Baꞌi Abraham boe namahere tebe-tebe neuꞌ Manetualain, tepoꞌ fo Ramatuaꞌ a nau fefei-fofora ria namahere na. Huu ria na, ana tao tuka Ramatuaꞌ a pareta na, de fee heni anan Isak dadi neuꞌ tutunu-hohotuꞌ. Sekona te, fai a ulu na Ramatuaꞌ a helu laꞌeneuꞌ anaꞌ ria nae, “Neme o anam ia mai, neuꞌ ko o hapu tititi-nonosiꞌ dodouꞌ, losaꞌ ara dadi lahenda nusa kahereꞌ.”
19 Tehuu baꞌi Abraham afi nae, Manetualain nanuu kuasa, fo fee lahenda mana mateꞌ ara rasoda selu. Tebe ria, nana huu tepoꞌ ria sama leoꞌ ana hapu faliꞌ anan fo dadi neuꞌ tutunu-hohotuꞌ so a.
Baꞌi Isak
20 Baꞌi Isak boe namahere Manetualain. Huu ria na de, ana hule fo ela Ramatuaꞌ a fee ua-naleꞌ neuꞌ ria anan Yakob no Esau.
Baꞌi Yakob
21 Baꞌi Yakob boe namahere Manetualain. Huu ria na, tepoꞌ fo ana sakaꞌ mate, ana napadeiꞌ ruꞌu-ruꞌu ma teleꞌ-tele homu teteꞌe na, fo doꞌo-tabe Ramatuaꞌ a. Boe ma ana hule Ramatuaꞌ a fee ua-naleꞌ neuꞌ upun fo reme anan Yusuf mai.
Baꞌi Yusuf
22 Baꞌi Yusuf boe namahere Manetualain. Tepoꞌ fo ana sakaꞌ mate, namahere nae, neuꞌ ko Manetualain napipipi-nalalaꞌo noo Ria lahenda Israel nara kalua reme dae Masir mai. Huu ria na, de ana helu si, fo maneniko ara laꞌo ela dae Masir, sona ara muste reni faliꞌ ria dui-aalun.
Baꞌi Musa ina-ama nara
23 Baꞌi Musa ina-ama nara boe ramahere Manetualain. Tepo fo mama na boki ni, boe ma ara rafunin losa bulaꞌ telu, nana huu ara rita ao na tibuꞌ-tibu. Ma ara ta biiꞌ mane nusa Masir a, leo mae ana pareta ria lahenda nara nae, “Maisa memaꞌ ana touꞌ fo boki si reme lahenda Ibarani ra mai!”
Baꞌi Musa
24 Tepoꞌ fo baꞌi Musa nambau-ina, ana namahere Manetualain boe. Fai a ulu na mane Masir a anafeto na soꞌu nan, dadi neuꞌ ria anan. Leo mae leoꞌ na, tehuu ana ta nau lahenda tao ria neuꞌ mane Masir a kileobobokin.
25 Ana afi nae, malole lenaꞌ nasoda nai susa sama-sama noo Ramatuaꞌ a lahenda nara, lena neme nasoda no amahoꞌo nai tadaluꞌ fo adaꞌ noi hatemataꞌ.
26 Ana nataaꞌ lahenda radadae ni, nana huu namahena neuꞌ Kristus, Lahenda fo riꞌ Manetualain helu nau fee Ni mai a. Ana nanenete leoꞌ na, nana huu bubuluꞌ nae neuꞌ ko Ramatuaꞌ a balas ana neniꞌ sesebaꞌ fo malole lena neme basa hata-heto nai dae Masir.
27 Baꞌi Musa boe namahere Manetualain, tepoꞌ fo ana hule lelaꞌ neuꞌ mane Masir a, fo noo ita bei-baꞌi nara kalua reme ria dae na mai. Leo mae maneꞌ a namanasa nan seli, tehuu baꞌi Musa ta bii ni fa. Baꞌi Musa namahere naroo Manetualain fo riꞌ ta nananitaꞌ, sama leoꞌ ana nita mataꞌ Ana.
28 Baꞌi Musa boe namahere Ramatuaꞌ a, tepoꞌ fo ara rahehere ao nara sakaꞌ laꞌo ela dae Masir. Ana tao tuka Ramatuaꞌ a pareta Na, ma nadenu ita bei-baꞌi nara tao Paska masososaꞌ, ma pau bibi-lopo fo dadi banda tutunu-hohotuꞌ. Basa de hai ra bibi-lopo ria daa na, fo tao tanda neuꞌ uma nara. Hatun ria, Ramatuaꞌ a eilaꞌo-limalopen neme nusatetu-ikutemaꞌ a mai naisa katemaꞌ ana uluꞌ fo rai dae Masir. Tehuu ana ta masoꞌ neu naisa nai ita bei-baꞌin uma nara, nana huu ana nita daa ria nai sira uma nara faratanan.
Ita bei-baꞌi nara
29 Tepoꞌ fo ita bei-baꞌi nara kalua reme dae Masir mai, sira boe ramahere Manetualain. Huu no sira namaheren ria, boe ma Ramatuaꞌ a tada bati oe fo nai Tasi Pilas a, de ara laꞌo no sodaꞌ nai dae tuuꞌ a. Tehuu soldadu Masir fo usi si a, bolo reuꞌ naa de mate basa si.
Mama Rahab
30 Tepoꞌ fo ita bei-baꞌi nara masoꞌ rai dae Kanaan, sira boe ramahere Manetualain. Ara tuka pareta Na, ma laꞌo rule-feo kota Yeriko tembok na deaꞌ, losa faiꞌ hitu. Boe ma, tembok ria hea neu tutiꞌ a.
31 Fai a ulu na Rahab fo riꞌ dadi ina manasosoa-piao nai kota ria. Huu no ana namahere Manetualain, de ana sipoꞌ no malole lahenda Israel ara manalalafa nara, ma nafuni si rai uma na. Basa de Ramatuaꞌ a tao nalulutuꞌ basa lahenda Yeriko ra, nana huu ara ta nau ramanene Ni. Tehuu Ramatuaꞌ a fee sodaꞌ neuꞌ Rahab, nana huu ria namahere na.
Lahenda fekeꞌ dodouꞌ ramahere Manetualain boe
32 Au bei bisa dedea loa-naruꞌ bali, laꞌeneuꞌ lahenda fekeꞌ fo riꞌ ramahere Manetualain. Tehuu au ta hapu ledo-fai fo tui alulutuꞌ laꞌeneuꞌ Gideon, Barak, Simson, Yefta, Daud, Samuel, ma Manetualain mana nesimata feke nara.
33 Basa si ramahere Manetualain. Huu ria na, ruma ratati raseki maneꞌ ara. Ruma homu pareta no dale roos, de rasalaꞌe lahenda fo ta nanuu salaꞌ fa, ma huku lahenda masalaꞌ ara. Ruma sipo hata fo Ramatuaꞌ a helu so a. Ma ruma raseki singa.
34 Ruma ramate aipilaꞌ maroropeꞌ a. Ruma Ramatuaꞌ a poꞌi-tata naa si reme lahenda fo nau raisas pake tafaꞌ. Ruma baraꞌaiꞌ taꞌa, tehuu Manetualain tao naa si baraꞌaiꞌ. Ruma Ramatuaꞌ a tao si dadi reuꞌ mana musu kahereꞌ, losaꞌ ara seti heni soladadu reme mamana fekeꞌ mai.
35 Hapu inaꞌ boe, ara sipo faliꞌ sira kileobobokin, fo Ramatuaꞌ a fee si rasoda selu so a.
Tehuu ruma hapu eese-rurumuꞌ, nana huu ara ramahere Manetualain. Ara rahiiꞌ mate, fo ela sira bosoꞌ hiru rasadea Ramatuaꞌ a. Sira ta etu tututi-nanato nara roo Ni. De, ara ramahehenaꞌ rae, neuꞌ ko Ramatuaꞌ a soꞌu naa si, ela hapu sodaꞌ fo malole na seli nai nusatetu-ikutemaꞌ a.
36 Ruma hapu namumulu-namamaeꞌ, ma liliꞌu-fefepaꞌ. Hapu fekeꞌ ara bali lake ei nara reni ailake nai bui daleꞌ.
37 Ruma mate, nana huu pia si reniꞌ batu. Ruma mate, nana huu lahenda ra roi horoꞌ ao-ina nara. Ruma mate, nana huu raisa si pake tafaꞌ. Ruma rasoda toꞌa-taa ma pake papakeꞌ nemeꞌ adaꞌ noi banda rouꞌ a mai, nana huu lahenda ese-rumu ma tao rasususaꞌ asa, losaꞌ usi heni si,
38 de ara ralai reu leo rai mamana lino-nees, rai leteꞌ ara, rai leaꞌ ara, ma rai boloꞌ fo nai dae daleꞌ. Lahenda ta hika-hadaꞌ neuꞌ lahenda ia ra, ma usi heni si, reu leo rai mamana ta malole. Sekona te, sira namahere na kahereꞌ nan seli, losaꞌ lehenda fo nai dae-bafoꞌ ia ta naraa leo sama-sama roo lahenda ia ra.
39 Ramatuaꞌ a io basa si, nana huu ara ramahere Ni. Tehuu losaꞌ sira mate boe, ara bei ta sipo hata fo riꞌ Ramatuaꞌ a helu so a.
40 Ana nau tao tuka hehelu Na, pake enoꞌ fo malole lena. Nana huu Ana nau, ita fo riꞌ besaꞌ ia talelaꞌ Kristus, ma sira fo riꞌ fai a ulu na mate si so a, ita basa bisa tasoda taroo sama-sama too Ni.