3
Yohanis mana saraniꞌ a noi ria nonoi-tataon
(Mateos 3:1-12; Markus 1:1-8; Yohanis 1:19-28)
1-2 Tepoꞌ fo, Tiberius dadi keser, ana pareta teu kasanahulu lima na nai Roma, ria te Pontius Pilatus dadi gubernor nai propinsi Yudea. Herodes dadi gubernor nai propinsi Galilea. Herodes aꞌan Filipus dadi gubernor nai propinsi Iturea no Trakonitis. Ma Lisanias dadi gubernor nai propinsi Abilene.
Tepoꞌ ria boe Hanas no Kayafas dadi malaka agama bau-ina fee malaka agama Yahudi nai kota Yerusalem.
Tepoꞌ ria riꞌ Manetualain nalosaꞌ Hara-dasin neuꞌ Yohanis, Sakaria ana na nai mamana lino-nees.
3 Yohanis namanene nan, boe ma ana laꞌo leo basa koroꞌ fo raneneaꞌ ro lee Yarden, de nafada lahenda ra nae, “Emi muste saledale-tuꞌetei mara, ela Manetualain sae-safe heni emi sala-sikom. Basa nana emi muste sarani dei, fo dadi tanda nae, emi malole mo Manetualain so.”
4 Fai a ulu na, Manetualain mana nesi matan baꞌi Yesaya duiꞌ laꞌeneuꞌ Yohanis ia nae,
“Hapu lahenda nai mamana lino-nes de bobouꞌ nae,
‘Basa lahenda ra mahehere ao mara sadia enoꞌ, fo sipoꞌ Ramatuaꞌ a mamai na!
Enoꞌ pekoꞌ a taon dadi roos fo sipoꞌ Ana.
5 Bafaꞌ bea na pori matetun.
Leteꞌ bea na ali matetun.
Eno peko-pakiꞌ ara tao si dadi roos,
enoꞌ boboloꞌ ara pori matetuꞌ si.
6 Ela lahenda reme basa nusaꞌ ara mai
bisa bubuluꞌ rae, Manetualain nau soi-tefa lahenda
reme sala-siko nara mai.’ ”
7 Lahenda dodouꞌ reme basa mamanaꞌ ara mai hule Yohanis fo sarani si. Tehuu ana nasapaa si nae, “Ae! Maedi-mafuleꞌ emin! Emi sama leoꞌ meke maꞌaaꞌ! Mana saledale-tuꞌetei fufudiꞌ emin, boso mae emi lui meme Manetualain huhuku Na mai. Ta dooꞌ a soꞌ, te Manetualain huku lahenda fo ta saledale-tuꞌetein matetuꞌ fa.
8 Bosoꞌ emi afi mae, ‘emi nana baꞌi Abraham tititi-nonosin’. Duduꞌa-aafi sira ta bisa tulu-fali emi, nana huu ta bisa tao malalao-malalafuꞌ emi fa. Manetualain bisa adu na batu ia ra dadi reuꞌ baꞌi Abraham tititi-nonosin. Au afada emi! Matudu nai leleo-lalaꞌom mae, emi saledale-tuꞌetei mara de tuka Manetualain so.
9 Emi muste tao hihii-nanauꞌ malole. Taꞌa, sona Manetualain huku emi beraꞌ a, sama leoꞌ lahenda loꞌo heni ai huuꞌ a neme oka na mai, pake taꞌa. Ai huuꞌ fo ta neni buna-boa malole, sona sosoa-raraaꞌ taꞌa. De, malole lenaꞌ loꞌo henin fo tuꞌun leo ai-pilaꞌ daleꞌ neu.”
10 Boe ma, lahenda kadodou inaꞌ sira ratane Yohanis rae, “De, ami muste tao ubeaꞌ?”
11 Ana nataa nae, “Maneniko o manuu badu dua, sona fee esa leo lahenda fo ta nanuu badu fa. Maneniko o hapu nanaaꞌ, sona bati fee lahenda fo ta nanuu nanaaꞌ fa.”
12 Basa de, mana susu bea ra mai boe, fo hule Yohanis sarani si. Ara ratane rae, “Papa mesen! Ami muste tao ubea?”
13 Ana nataa nae, “Kalu mana pareta raetuꞌ ra raun ara doi bea na hida, sona ara bae tuka ria.”
14 Hapu soldadu hida rai na boe. Ara ratane Yohanis rae, “Kalu ami, leo beaꞌ? Ami muste tao ubeaꞌ?”
Ana nataa nae, “Bosoꞌ masalaꞌo kokose lahenda doi-talin tuka emi hihii mara. Ma bosoꞌ mafararaꞌu kolaaꞌ lahenda. Emi muste hule makasi ma sipo noi kadi mara, ria dai so.”
15 Ramanene dedean sira, boe ma lahenda ra mulai esa dukuꞌ esa rae, “Ae! Bate Yohanis ia nana, Kristus, fo neme uluꞌ mai Manetualain helu nae fee Ni mai a!”
16 Tehuu Yohanis nasaꞌai si nae, “Nenene matalolole! Neuꞌ ko Lahenda esa mai kuasa Na lena au. Leo mae au dadi uꞌ Ria atan boe, ta araa fa. Au sarani emi pake oe, tehuu neuꞌ ko Ana tao lena au, huu fo tao na henu emi dale mara neniꞌ Manetualain Dula-dale Malalao-malalafu Na. Neuꞌ ko Ana tao makamomoi emi, sama leoꞌ lahenda hotu heni kadafuꞌ ara.
17 Ana huku lahenda mana tao salaꞌ ara, sama leoꞌ lahenda mana oru a teeꞌ heni hade a kikili-kauan. Basa nate Ana nadai hade neuꞌ ara, reuꞌ soꞌa ra daleꞌ, tehuu hotu heni kikili-kauan. Leoꞌ na boe, neuꞌ ko Kristus huku lahenda mana tao salaꞌ ara, ma tuꞌu si leo aipila mana basa taꞌa daleꞌ reu.”
18 No ria na, Yohanis fee nafarereneꞌ lahenda ra hihii-nanauꞌ rupaꞌ, ma tui si Manetualain Tutui Malole Na.
19-20 Tepoꞌ ria boe, Yohanis mulai dedea lelekaꞌ laꞌeneuꞌ Herodes nonoi-tataon. Dedea na leo iaꞌ: Herodes nana gubernor nai propinsi Galilea. Ria sala na dodouꞌ. Leo-leoꞌ ana tonda na fadi na sao ina na, nade Herodias. Sekonaa te, fadi na bei nasoda, ma bei ta namaetuꞌ no Herodias fa. Herodes leleo-lalaꞌon ta laꞌe fa, de Yohanis nasaꞌai lelekaꞌ ana, losaꞌ Herodes eteꞌ ao na. Boe ma Herodes hopu nan, de tee ni leo bui daleꞌ neu.
Yohanis sarani Ramatua Yesus
(Mateos 3:13-17; Markus 1:9-11)
21 Maꞌulu na, tepoꞌ fo bei ta hopu ra Yohanis fa, ana sarani lahenda dodouꞌ. Ma ana sarani Yesus boe. Basa ria de Yesus hule-haradoi, boe ma lalai natahuꞌa.
22 Tutiꞌ a Manetualain Dula-dale Malalao-malalafu Na onda neuꞌ Ana. Dula-daleꞌ ria rupa na sama leoꞌ manupui kalasi a. Boe ma hara oeꞌ esa neme lalai mai nae,
“O nana Au Ana susue Ka.
O tao ma Au amahoꞌo naroo.”
Ramatua Yesus bei-baꞌi nara, tuka papa Yusuf
(Mateos 1:1-17)
23 Tepoꞌ fo Yesus mulai nafada lahenda ra laꞌeneuꞌ Manetualain eno masoda na, nana teu Ni bate telu hulu. Lahenda ralelaꞌ rae, Yesus nana Yusuf Anan. Yusuf bei-baꞌi nara siiꞌ:
Yusuf papa na riꞌ, Eli.
24 Eli papa na riꞌ, Matat.
Matat papa na riꞌ, Lewi.
Lewi papa na riꞌ, Melki.
Melki papa na riꞌ, Yanai.
Yanai papa na riꞌ, Yusuf.
25 Yusuf papa na riꞌ, Matatias.
Matatias papa na riꞌ, Amos.
Amos papa na riꞌ, Nahum.
Nahum papa na riꞌ, Hesli.
Hesli papa na riꞌ, Nagai.
26 Nagai papa na riꞌ, Maat.
Maat papa na riꞌ, Matatias.
Matatias papa na riꞌ, Semein.
Semein papa na riꞌ, Yosek.
Yosek papa na riꞌ, Yoda.
27 Yoda papa na riꞌ, Yohanan.
Yohanan papa na riꞌ, Resa.
Resa papa na riꞌ, Serubabel.
Serubabel papa na riꞌ, Sealtiel.
Sealtiel papa na riꞌ, Neri.
28 Neri papa na riꞌ, Melki.
Melki papa na riꞌ, Adi.
Adi papa na riꞌ, Kosam.
Kosam papa na riꞌ, Elmadam.
Elmadam papa na riꞌ, Er.
29 Er papa na riꞌ, Yosua.
Yosua papa na riꞌ, Elieser.
Elieser papa na riꞌ, Yorim.
Yorim papa na riꞌ, Matat.
Matat papa na riꞌ, Lewi.
30 Lewi papa na riꞌ, Simeon.
Simeon papa na riꞌ, Yahuda.
Yahuda papa na riꞌ, Yusuf.
Yusuf papa na riꞌ, Yonam.
Yonam papa na riꞌ, Elyakim.
31 Elyakim papa na riꞌ, Melea.
Melea papa na riꞌ, Mena.
Mena papa na riꞌ, Matata.
Matata papa na riꞌ, Natan.
Natan papa na riꞌ, Daud.
32 Daud papa na riꞌ, Isai.
Isai papa na riꞌ, Obet.
Obet papa na riꞌ, Boas.
Boas papa na riꞌ, Salmon.
Salmon papa na riꞌ, Nahason.
33 Nahason papa na riꞌ, Aminadab.
Aminadab papa na riꞌ, Admin.
Admin papa na riꞌ, Arni.
Arni papa na riꞌ, Hesron.
Hesron papa na riꞌ, Peres.
Peres papa na riꞌ, Yahuda.
34 Yahuda papa na riꞌ, Yakob.
Yakob papa na riꞌ, Isak.
Isak papa na riꞌ, Abraham.
Abraham papa na riꞌ, Tera.
Tera papa na riꞌ, Nahor.
35 Nahor papa na riꞌ, Seruk.
Seruk papa na riꞌ, Rehu.
Rehu papa na riꞌ, Pelek.
Pelek papa na riꞌ, Eber.
Eber papa na riꞌ, Sela.
36 Sela papa na riꞌ, Kenan.
Kenan papa na riꞌ, Arpaksad.
Arpaksad papa na riꞌ, Sem.
Sem papa na riꞌ, Noh.
Noh papa na riꞌ, Lamek.
37 Lamek papa na riꞌ, Metusalak.
Metusalak papa na riꞌ, Henok.
Henok papa na riꞌ, Yared.
Yared papa na riꞌ, Mahalalel.
Mahalalel papa na riꞌ, Kenan.
38 Kenan papa na riꞌ, Enos.
Enos papa na riꞌ, Set.
Set papa na riꞌ, Adam.
Adam nana, riꞌ Manetualain ana aadu Na.