Susuraꞌ neme Paulus mai
fee
Filemon
1
Soda-moleꞌ
1 Susuraꞌ ia neme au mai, Paulus. Au nonoo ki Timotius boe haitua haraoe soda-moleꞌ. Sadi aꞌa ka bubuluꞌ, ara ena au nai bui ia daleꞌ, nana huu au tui-beka fee lahenda ra, laꞌeneuꞌ Yesus Kristus.
Au duiꞌ susuraꞌ ia
fee o, Filemon, fo riꞌ ami sue-lai, ma dadi mana noi esa moo ami;
2 fee susi Apfia, fo riꞌ ami tao ni sama leoꞌ ami toranoom;
fee Arkipus, fo riꞌ mela-maku sama-sama no ami nai nonoi-tataoꞌ ia;
ma fee saraniꞌ fo biasa rabua, ela hule-haradoi nai o uma ma.
3 Au hule Amaꞌ Manetualain ma ita Ramatuan Yesus Kristus, ratudu Sira dale malolen neuꞌ emi, fo ela emi bisa masoda no tetu-temaꞌ, mole-dame, ma tesatei-tamadaleꞌ.
Paulus hule makasi nana huu Filemon
4 Filemon! Maneniko au hule-haradoi fee o, au hule makasi neuꞌ Ramatuaꞌ a, nana huu o masoda ma.
5 Au amanene dodouꞌ, laꞌeneuꞌ o mamahere Ramatua Yesus, ma susue-lalaim neuꞌ lahenda kamahereꞌ ara.
6 Huu no o namahere ma, de o bisa masoda daleꞌ esa moo lahenda kamahere fekeꞌ ara. Au hule-haradoi fo kalu emi matudu dale malole mara esa no esa, sona bisa boe-boe bubuluꞌ basa hata malole, fo ita bisa taon soaneuꞌ Ramatua Yesus.
7 Aꞌa! Huu no o susue-lalai ma, de o tao ma au amahoꞌo, ma tao matetea au dale ka. Ma o susue-lalai ma boe, tao natetea lahenda kamahereꞌ dodouꞌ dale nara.
Paulus hule fo Filemon natudu susue na neuꞌ Onesimus boe
8-9 Aꞌa e! Au parluu leo iaꞌ: au dadi uꞌ Kristus lahenda nadedenun. No ria na, au anuu hak de pareta o tao hata ia. Tehuu au ta nau pareta o fa, hule adaꞌ noi tutulu-fafaliꞌ, sama leoꞌ lahenda fo lasiꞌ so a, de hule tutulu-fafaliꞌ. Au dadi lahenda manahukuꞌ, nana huu au tuka Yesus Kristus. Huu ria na, de au aparani hule tutulu-fafaliꞌ neuꞌ o, nana huu au bubuluꞌ o sue-laiꞌ lahenda dodouꞌ.
10 Au hule o matudu susue-lalai ma neuꞌ au ana ki, Onesimus. Ria nana sama leoꞌ au ana boki ka, huu fo no au nonoi-tatao ki, de ana namahere Yesus tepoꞌ fo au nai bui ia daleꞌ.
11 Au bubuluꞌ Onesimus nana o atam. Ana nalai heni aon. Ma au bubuluꞌ, maulu na ana ta nanuu sosoa-raraaꞌ hata esa neuꞌ o boeꞌ. Tehuu besaꞌ ia, au amahere ae ana nanuu sosoa-raraaꞌ dodouꞌ, soaneuꞌ ita dua.
12 Au sue an seli, tehuu au nau adenu faliꞌ ana leo o neti.
13 Matetu na, au nau ana leo nahere noo au, fo bisa kati o, ela nalalau au nai ia. Huu fo au ta bisa tao hata-hata esa nai ia boeꞌ. Au dadi lahenda manahukuꞌ, nana huu au afada lahenda laꞌeneuꞌ Ramatua Yesus Tutui Malole Na.
14 Au ta nau aseti o fo tuka au hihii-nanau ka, tehuu o hihii-nanau mesam. De, maneniko o ta nau fa, sona au ta bisa tao hata-hata esa laꞌeneuꞌ Onesimus, huu fo ria nana o atam.
15 Bate o afi mae leo iaꞌ: Ramatuaꞌ a nataaꞌ Onesimus laꞌo ela o, ta dooꞌ a fa, fo ana natafali main ela leo no o losa doo na.
16 Tepoꞌ fo nalai a, ana dadi adaꞌ noi neuꞌ o ata ma. Tehuu besaꞌ ia ana natafali mai, ria boe dadi neuꞌ o fadi susue ma so. Au sue an seli boe! De besaꞌ ia, ria sosoa-raraan neuꞌ o a, nana tamba so. Ria ta dadi adaꞌ noi neuꞌ o atam fa, tehuu ria boe dadi neuꞌ o fadim fo sama-sama mamahere Kristus.
17 De, leo iaꞌ aꞌa. Maneniko o tao au neuꞌ, tia-lai mananoi-manataom, sona au hule fo sipoꞌ man sama leoꞌ au riꞌ manamaiꞌ ria.
18 Tehuu uniꞌ ko leo Onesimus tao nasalaꞌ o, do ana bei nahuta o, nemeꞌ na fo ela au riꞌ lepa-asaa an.
19 Hutaꞌ ia ra, au riꞌ duiꞌ mata ki: Au, Paulus, neuꞌ ko bae kati Onesimus huta na fee Filemon. Dai so do? Bate ta parlu au afarereneꞌ fee o huta kadodouina ma neuꞌ au a. Bosoꞌ mafarene henin, o dadi muꞌ Ramatuaꞌ a lahendan, nana huu au.
20 De, aꞌa tulu-fali au nai hata ia ra, nana huu ita kileobobokiꞌ esa nai Ramatuaꞌ a daleꞌ so. Matatama au dale ka leo naꞌ, huu fo ita sama-sama dadi teuꞌ Kristus nuu-enan.
Paulus duiꞌ nateꞌe susura na
21 Aꞌa! Au duiꞌ susuraꞌ ia fee o, nana huu au amahere ae, o nau mamanene matalolole neuꞌ au. Au ameda an, neuꞌ ko o tao lena neme hata fo au hule a.
22 Bei hata esa bali. Sadia fee au kama esa dei. Au amahere Ramatuaꞌ a namanene neuꞌ emi huhule-haradoim, ma neuꞌ ko Ana soi enoꞌ ela poꞌi na au eme bui ia daleꞌ mai, fo atafali u dama emi nai naa.
23 Epafras nai ia. Ria dadi lahenda manahukuꞌ, nana huu ana nafada lahenda laꞌeneuꞌ Yesus Kristus, sama leoꞌ au boe. Ana haitua fee o haraoe soda-moleꞌ boe.
24 Au nonoo mana noi kara, Markus, Aristarkus, Demas, ma Lukas boe haitua haraoe soda-moleꞌ.
25 Au hule ita Ramatuan Yesus Kristus, fo natudu dale malole Na neuꞌ emi basa.
Noi ri naꞌ so!
Soda-moleꞌ,
Paulus.