8
Segel kahitu a — Ramatuaꞌ a eilaꞌo-limalope nara sipo ra fufuuꞌ hitu
Boe ma Bibi-lopo Anaꞌ ria buka segel kahitu a. Kekeneu te, basa-basan fo rai nusatetu-ikutemaꞌ a roi neneeꞌ a. Ta hapu esa nahahara boeꞌ, bate losaꞌ jam seseriꞌ esa. Basa de, au ita eilaꞌo-limalope hitu reme nusatetu-ikutemaꞌ a mai. Ara rapadei rahere rai Manetualain mata Na, de ara sadia ralalau Ni. Sira esaꞌ ko sipoꞌ fufuu na.
Boe ma eilaꞌo-limalope fekeꞌ esa neme nusatetu-ikutemaꞌ a mai, napadei nai mei fo riꞌ ara hotu reniꞌ ai-nana maboomeniꞌ a, mata na. Ana homu mako lilopilas esa, fo riꞌ biasa ara tao ai-nana maboomeniꞌ neuꞌ daleꞌ. Ara fee ni ai-nana maboomeniꞌ dodouinaꞌ, fo ana epoꞌ nabuan noo Manetualain lahenda nara huhule-haradoin. Basa de ana neni mako lilopilas ria, sama leoꞌ tutunu-hohotuꞌ maboomeniꞌ, de taon neuꞌ mei lilopilas ria lain, nai kadera manapareta a mata na. Basa de ana hotu ai-nana maboomeniꞌ ria. Boe ma boomeni na ae leo Manetualain mata na neu, sama-sama no basa huhule-haradoiꞌ neme Ramatuaꞌ a lahenda nara.
Basa de, eilaꞌo-limalope a hai na aipilaꞌ neme mei ria mai, de tao nahenu mako lilopilas a. Boe ma ana tuꞌu mako ria leo dae-bafoꞌ a neu. Kekeneu te, au ita narela ii-onaꞌ nai dae-bafoꞌ a. Boe ma natata natututiꞌ lii na bau na seli, ma dae a natakeko.
Basa de, eilaꞌo-limalope kahituꞌ fo reme nusatetu-ikutemaꞌ a mai a, ara rahehere ao nara sakaꞌ fuu sira fufuu nara.
Fuu fufuu masososaꞌ a — aipilaꞌ a naa heni parusa ra
Fai fo eilaꞌo-limalope masososaꞌ a fuu ria fufuu na, boe ma uda es ma aipilaꞌ manaepoꞌ no daa, dadiꞌ nanapoꞌa leo dae-bafoꞌ a mai. Aipilaꞌ a naa heni nau mana momodoꞌ fo nai basa mamanaꞌ ara. Maneniko ita bati dae-bafoꞌ a neuꞌ babatiꞌ telu, sona aipilaꞌ a naa heni a, nana babatiꞌ esa rian. Ma kalu ita bati basa ai-huuꞌ nai dae-bafoꞌ a neuꞌ babati telu, sona aipilaꞌ a naa heni a, nana babatiꞌ esa rian.
Fuu fufuu kadua a — mate tasiꞌ a oe-isin
Fai fo eilaꞌo-limalope kadua a fuu ria fufuu na, boe ma hataꞌ esa sama leoꞌ lete bauinaꞌ a pila, lokopiro leo tasiꞌ daleꞌ neu, losaꞌ tasiꞌ a babatiꞌ esa neme babatiꞌ telu mai dadi daa. Boe ma banda fo rasoda rai tasiꞌ daleꞌ, mate basa babatiꞌ esa neme babatiꞌ telu mai. Ma ofaꞌ fo rai tasiꞌ a boe ralulutuꞌ heni babatiꞌ esa neme babatiꞌ telu mai.
Fuu fufuu katelu a — oe a dadi maliꞌ
10-11 Fai fo eilaꞌo-limalope katelu a fuu ria fufuu na, boe ma ruu bauinaꞌ esa sama leoꞌ obor bauinaꞌ esa pila, tuda neme lalai mai. Ruuꞌ ria nade ‘Maliꞌ’. Fai fo ana tuda mai, boe ma oe fo rai lee ra, ma oe mataꞌ ara dadi maliꞌ. Basa de lahenda fo rinuu oe ria a, mate dodouinaꞌ. Kalu ita bati basa lee ra, ma oe mataꞌ fo rai dabafoꞌ a reuꞌ babatiꞌ telu, sona dadi maliꞌ a, nana babatiꞌ esa.
Fuu fufuu kahaa a — ledo a, bulaꞌ a, ma ruuꞌ ara dadi maiuꞌ
12 Basa de, eilaꞌo-limalope kahaa a fuu ria fufuu na. Kekeneu te, ledo a, bulaꞌ a, ma ruuꞌ ara hapu fefepaꞌ, de ledo a, bulaꞌ a ma ruuꞌ ara babatiꞌ esa neme babatiꞌ telu mai dadi maiuꞌ. De kalu leledoꞌ sona ledo a ta nahaa nabasa leledoꞌ esa katema, ma hatuꞌ sona bulaꞌ a no ruuꞌ ara ta rahaa rabasa hatuꞌ esa katema.
13 Boe ma au botiꞌ laka ka te, au ita parupua esa laa namemetoꞌ nai lalai. Ana naloo nae, “Besa-besa o! Huu fo eilaꞌo-limalope fekeꞌ telu reme nusatetu-ikutemaꞌ a mai, bei ta fuu sira fufuu nara fa. Maneniko fuu fufuuꞌ sira sona tantu soe bauinaꞌ a tuda laꞌe basa lahenda fo rasoda rai dae-bafoꞌ a.”
8:3 Amos 9:1; Kalua reme Masir 30:1, 3 8:5 Malaka Agama ra Atoran 16:12; Yeskial 10:2; Kalua reme Masir 19:16; Daebafo Rupa-lole Bebeuꞌ a 11:19; 16:18 8:7 Kalua reme Masir 9:23-25; Yeskial 38:22 8:10-11 Yesaya 14:12; Yeremia 9:15 8:12 Yesaya 13:10; Yeskial 32:7; Yoel 2:10, 31; 3:15