3
Atoran soaneuꞌ lahenda fo sakaꞌ dadi mauli-malaka saraniꞌ
1 Memaꞌ tebe lahenda rae, “Lahenda fo nau dadi mauli-malaka saraniꞌ, sona sosoa na nae, ana here na nonoi-tataoꞌ esa malole na seli.” Dedeaꞌ ria memaꞌ tetebes ara.
2 Mauli-malaka saraniꞌ a masoda na muste leo iaꞌ: hada-parin malole, ma dite-tama no noi saoinaꞌ esaꞌ a. Nanea nala ao na. Ma dale na balaroe-balanauꞌ. Lahenda hadaꞌ ana. Uma na lelesun nanasoiꞌ soaneuꞌ fui ra. Ma ana nabeꞌi nanori lahenda fekeꞌ.
3 Bosoꞌ manamafuꞌ, bosoꞌ baunasa. Lahenda fo naraa, nana riꞌ lahenda fo nanuu dale susue-lalaiꞌ, nahiiꞌ noi mole-dame, ma ta mananaa lena-mataꞌ.
4 Ana muste bisa ator uma-lon no malole. Ana nara boe muste feen hada-horomata ma ramanene neuꞌ ana.
5 Maneniko ana ta bisa ator nala ria uma-lon fa, sona tao leoꞌ bea fo ana bisa ator Manetualain lahenda kamahereꞌ nara?
6 Malole lenaꞌ here lahenda fo namahere na natea nai Kristus daleꞌ. Bosoꞌ soꞌu mauli-malaka saraniꞌ nemeꞌ lahenda fo besaꞌ ko namahere neuꞌ Ramatua Yesus, fo ela ana bosoꞌ koao. Bosoꞌ losa Ramatuaꞌ a hukun sama leoꞌ Ana huku nitu ra malakan.
7 Here lahenda hada-pari malole. No enoꞌ ria ana ta maeꞌ hata-hata esa boeꞌ. Ma nitu ra malaka na ta bisa tao ratudan.
Lahenda fo tulu-fali mauli-malaka saraniꞌ
8 Leoꞌ na boe, neuꞌ lahenda manatulu-manafali mauli-malaka saraniꞌ ara. Sira muste lahenda hada-pari malole, ta maa masaraliꞌ, ta manamafuꞌ, ma bosoꞌ manatendetuuꞌ.
9 Dale nara muste malalao-malalafuꞌ ma ara muste homu rahere Manetualain nanori-nafadan, fo natudun neuꞌ ita lahenda kamahereꞌ ara.
10 Parisaꞌ matalolole masoda nara, ma nonoi-tatao nara. Maneniko lahenda ta hapu sira sala nara, sona besaꞌ ko soꞌu si, fo tulu-fali mauli-malaka saraniꞌ ara.
11 Leoꞌ na boe neuꞌ sira saoina nara. Muste inaꞌ fo hada-parin malole. Bosoꞌ sosoa nara noi dedea ramumulu lahenda. Muste ranea ralelaꞌ ao nara, ma lahenda bisa ramahere si boe.
12 Manatulu-manafali mauli-malaka sarani ara boe muste touꞌ fo dite-tama no noi saoinaꞌ esaꞌ a. Sira boe muste ator ralelaꞌ uma-loo, ma ana nara.
13 Maneniko ara ralalau saraniꞌ ara no malole, sona tantu lahenda boe-boe hadaꞌ asa. Ma ara boe-boe raparani, ta biiꞌ dedea laꞌeneuꞌ sira namahere nara neuꞌ Yesus Kristus.
Ita namahere na huu-pedan
14-15 Timotius! Au amahehenaꞌ ta dooꞌ a soꞌ te au bisa mai dama o. Maneniko au pute-ai, fo ababakoꞌ, sona susuraꞌ ia losa naꞌuluꞌ o lima ma. Au duiꞌ ia fo afada o ae, Manetualain kileoboboki nara masodan muste leoꞌ bea. Bosoꞌ mafarene henin mae, Manetualain masodaꞌ losa do-doo na neu. Ma lahenda nara sama leoꞌ uma esa batu tutuu-tetendeꞌ ma dii toka matea fo doruꞌ nahere Manetualain nanori-nafada roo-tetu na.
16 Manetualain soi natudu hata nino kahereꞌ nemeꞌ ita namahere na mai. Leo iaꞌ:
Kristus mai nai dae-bafoꞌ a so,
pake ita lahenda a rupa-lolen.
Manetualain Dula-dale Na boe natudu nae,
Yesus nana tebe-tebe Manetualain Anan.
Manetualain eilaꞌo-limalopen rai nusatetu-ikutemaꞌ a rita Ni boe.
Manetualain nahene-naꞌaeꞌ Ana leo nusatetu-ikutemaꞌ a neu,
ma soꞌu nadedema Ni.
Basa lahenda nusaꞌ ara ramenene Tutui Na.
Nai basa mamanaꞌ nai dae-bafoꞌ a hapu lahenda ramahere neuꞌ Ana.
Ita tamahere leo naꞌ!