33
О Яков дикхляс э Исавес
1 О Яков дикхляс, кай авэл о Исав тай лэса штаршэл мануша. Ов паляшты э пуен машкарэ ки Лия, ки Рахиль тай ко дуй иргатинкес.
2 Ов тхэдяс э иргатинкен тай лэнги пуен ангал, э Лия тай лаки пуен пал лэндэ, ай э Рахиля э Иосифеса пал алаендэ.
3 Ай ов гело ангал, пашолас пэ пхралэстэ тай бангило джи ки пху эфтавар.
4 Ай о Исав прастанило мамуй ко Яков, диняс ангали лэс, читяспэс лэски мэнятэ тай чюмидиняс лэс, тай он рунэ.
5 О Исав дикхляс э джювлен тай э пуен тай пхучляс:
— Кон адава туса?
О Яков пхэнляс:
— Адала пуя, савэн о Дэл миласа диняс тэ иргатес.
6 Пашылэ о иргатинкес пумарэ пуенца тай бангилэ.
7 Дэчи пашылэ тай бангилэ э Лия тай лаки пуя. Пал алаендэ пашылэ о Иосиф тай э Рахиль ли бангилэ.
8 О Исав пхучляс ко Яков:
— Соски ту бичялдян алаи адала атарэс мамуй мандэ?
— Мэ манглём тэ аракхав мила андэ тэ якхендэ, мо сагбус, — пхэнляс ов.
9 О Исав пхэнляс:
— Мандэ си алаи бут, мо пхрал. Ачяв тинро туки.
10 — На, мангав тут! — пхэнляс о Яков. — Мэ тэ аракхлём мила андэ тэ якхендэ, дэчи лэ мандар адава башладипэ. Манги тэ дикхав то муй — адава сар тэ дикхав о муй э Дэвлэско, вай ту муклян ман аякха миласа.
11 Мангав тут, лэ мандар адава башладипэ, вай о Дэл сас миласа мандэ, тай мандэ си алаи, со манги камэл.
О Яков лачес мангелас, тай о Исав лиляс о башладипэ.
12 Дэчи о Исав пхэнляс:
— Гадэ, камэл тэ джяс ко дром. Мэ кан астаравман паш тутэ.
13 Ай о Яков пхэнляс:
— Мо сагбус джянэл, кай о пуя би зораки тай мэ камэл тэ дикхав пал бакря тай гурувня, савэ дэн сути. Лэн лачес тэ кувдиеса хоть екх дес, о гайваня кан мэрэн.
14 Мэ джял мо сагбус ангал пэ иргатестэ, ай мэ кан джяв тэмэли, сар кан джян о атарэс ангал мандэ тай сар кан джян о пуя, бискай на кан авэн мэ сагбустэ андэ Сеир.
15 О Исав пхэнляс:
— Мук ман тэ ачявав туса мэ манушэн сарсавэн.
— Соски? — пхучляс о Яков. — Рэсэл ли одова, кай мэ аракхлём мила андэ якха мэ сагбустэ.
16 Тай о Исав одова жэ дес гело палэ пэстэ андэ Сеир.
17 Ай о Яков гело андэ Суккот, катэ ов тхэдяс пэски кхер тай катунэс э гайваненги. Аки соски адава тхан бучёл Суккот.
18 О Яков ало андар Паддан-Арам, лачимаса ало ки диз Шэхем андэ Ханаан тай ачило тэ бэшэл ангал диз.
19 Шэлэ рупунэ которэнги ов киндяс ко чявэ ки Хаморески, ко дад ки Шэхемеско, котор пху, опэр савятэ ов тхэдяс пи катуна.
20 Отхэ ов кердяс алтари тай тхэдяс лэс Эль-Элохей-Йисраэль.