48
О Яков алгыштиел пэ турунен э Манассияс тай э Ефремес
1 Вахытестар э Иосифески пхэнлэ:
— То дад насвало.
О Иосиф лиляс пэса до чявэн, э Манассияс тай э Ефремес.
2 Э Яковески пхэнлэ:
— Тутэ ало то чяво о Иосиф.
О Израиль кидиняспэс зораса, ваздиняспэс тай бэшло опэр тхан.
3 О Яков пхэнляс э Иосифески:
— Андэ Луз, ки пху Ханаан, манги сикавдяспэс о Дэл о Баро-Зорало тай алгышты ман.
4 Ов пхэнляс манги: «Мэ кан дав тут бутэ пуен, кан бутярав тут, кан керав тутар бут дюнядэс тай кан дав адая пху тэ овэл екхараи тэ пуенги».
5 Акана тэ чявэ о дуй, кай аракхлилэ туки андэ Египти бискай мэ алём атхэ, кан овэн минрэ. Сар о Рувим тай о Симеон, о Ефрем тай о Манассия кан овэн минрэ.
6 О пуя, савэ кан аракхлён туки пал лэндэ, кан овэн тинрэ, тай лэндэ кан овэл котор пху андар паи лэнги пхралэнго.
7 Кана мэ ававас андар Паддан, ми Рахиль мули ки пху Ханаан, кана амэ самас дага опэр дром, надур катар Эфрата. Оничин мэ пароскердём ла отхэ, опэр дром ко Эфрата (самким Вифлееми).
8 О Израиль дикхляс э Иосифески чявэн тай пхучляс:
— Кон адала?
9 О Иосиф пхэнляс пэ дадэски :
— Адава о чявэ, савэн о Дэл диняс ман атхэ.
О Израиль пхэнляс:
— Ан лэн мандэ, тэ алгыштияв лэн.
10 О Израиль катар пхурипэ на лачес дикхелас. О Иосиф андяс пэ чявэн пашэ пэ дадэстэ, тай одова чюмидиняс тай диняс ангали лэн.
11 О Израиль пхэнляс э Иосифески:
— Мэ джи на тюшундым генэ тэ дикхав тут, ай о Дэл диняс ман тэ дикхав джи тэ пуен.
12 О Иосиф гелдяс лэн катар кочя ки Израилески тай бангело лэски джи ки пху.
13 Дэчи о Иосиф тхэдяс э Ефремес катар прави рик пэстар, катар леви васт катар Израиль, ай э Манассияс катар леви риг пэстар, катар прави катар Израиль, тай андяс лэн паш пэ дадэстэ.
14 Ай о Израиль сидиняс о прави васт тай тхэдяс опэр шэро ки Ефремеско, хоч ов эсас о тикно, кердяс хачи пэ васта, тай о леви ов тхэдяс опэр шэро ки Манассияско, хоч о Манассия сас о баштутно.
15 Дэчи ов алгышты э Иосифес тай пхэнляс:
— О Дэл, ангал Савэстэ пхерэнас о дада минрэ о Авраам тай о Исаак, о Дэл, Саво сас мо чёбани алаи мо бэшыпэ джи адалэ десески,
16 о Миляики, саво кутардиелас ман вэрсавэ джюнгалимастар, мэ алгыштиел адалэ пуен. Мэ овэл андэ лэндэ мо нав тай о нав мэ дадэнго э Авраамеско тай э Исаакеско, тай мэ овэн бут лэнги пуя опэр пху.
17 Кана о Иосиф дикхляс, кай о дад тхэдяс о прави васт опэр шэро ки Ефремеско, ов уло касывэтлыс тай лиляс пэ дадэс вастэстар, тэ тхэл катар шэро ки Ефремеско опэр шэро ки Манассияско.
18 О Иосиф пхэнляс:
— На, дадэ, аки акава — о баштутно. Тхэ о прави васт опэр лэски шэрэстэ.
19 Ай о дад на мангляс тай пхэнляс:
— Мэ джянав, мо чяво, мэ джянав. Ли лэстар кан овэл дюняс, ли ов кан овэл баро. Ай лэско тикно пхрал кан овэл баро лэстар, тай лэски пуя кан овэн бут дюнядэс.
20 Тай ов алгышты лэн одова дес тай пхэнляс:
— О израильтяня кан пхэнэл тумарэ нава, сар алгыштима: «Мэ керэл тут о Дэл, сар э Ефремес тай э Манассияс».
Аякха о Израиль тхэдяс э Ефремес ангал Манассия.
21 О Израиль пхэнляс э Иосифески:
— Мэ мэрав, ай о Дэл кан овэл тумэнца тай кан анэл тумэн ки пху тумарэ дадэнги.
22 Мэ дав тут бут пху, ниш тэ пхралэн, дав тут генэ котор пху горадэнца, саво мэ лилём ко аморея камаса тай лукеса.