4
Каин ай Авель
1 О Адам лас тэ траий пэска ромняса ла Еваса, сар жювляса. Вой кэрдилас кхамны ай кэрдас Каинос. Вой пхэндас: «Сар о Рай Яхва кэрдас, кадэ ви мэ кэрдэм манушэс».
2 Котар латэ аракхадилас лэско прал Авель.
О Авель дыкхлас пала бакрэнгэ ай буснянгэ кырдура, ай о Каин бутязыяс пэ пхув.
3 Па врама Каин дас даро каринг о Рай Яхва анда кодо, со дэлас э пхув.
4 Ай о Авель андас май лаще ай тхулэ бакрэн ай буснян анда кодал алатура, кон аракхадилэ англунэ. О Рай Яхва дыкхлас лащимаса по Авель ай лэско даро,
5 алом по Каин ай лэско даро чи дыкхлас кадэ. Каин холяйлас, ай лэскэ пэлас намишто.
6 Атунчи о Рай Яхва пхэндас лэ Каиноскэ:
— Состар тукэ пэлас намишто? Состар калилас тиро муй?
7 Тэ кэрэса, сар трубуй, чяк ви ту авэса драго. Ай кана кэрэс на кадэ, сар трубуй, атунчи пашо тиро вудар гарадилас бэзэх: вов камэл тэ паранчюлый пэ тутэ, алом ту трубуй тэ визэрис лэс.
8 О Каин пхэндас пэскэ пралэскэ Авелёскэ:
— Авэн пэ мал.
Кана вон сас пэ мал, Каин щюдас-пэ по пэско прал Авель ай мудардас лэс.
9 Атунчи о Рай Яхва пхэндас лэ Каиноскэ:
— Кай тиро прал Авель?
— Чи жянав, — пхэндас вов. — Мэ чяк чи сым лэско лышытори.
10 О Рай Яхва пхэндас:
— Со ту кэрдан? Рат тирэ пралэско цыпий каринг Мандэ анда пхув.
11 Аканак ту сан прокляцымэ, нашадо па пхув, сави путэрдилас тэ лэл андэ пэстэ тирэ пралэско рат, щёрдо тирэ вастэса.
12 Кана бутязыса пэ пхув, вой май бут чи дэла тукэ хабэ. Ту пхирэса бикхэрэско па пхув.
13 Каин пхэндас лэ Раскэ лэ Яхваскэ:
— Мури дош май бари, сар мэ шай инкрав ла, сар мэ шай бирий.
14 Аканак Ту нашавэс ман па пхув, ай Ту чи дыкхэса ман май бут: мэ пхиро бикхэрэско па пхув, ай англуно, кон дыкхла ман, мударла ман.
15 Алом о Рай Яхва пхэндас лэскэ:
— На. Тэ мударла вари-кон Каинос, кодолэс рэсэла эфтавар май бут анда кадо.
Ай о Рай Яхва ащядас по Каин э вурма, тэ маладёла вари-кон лэса, тэ на мударэл лэс.
16 О Каин гэластар катар о Рай Яхва ай траияс андо тхэм, кай бущёлас Нод, пэ ғайналоски риг катар Эдэм.
Каиноскэ парапутя
17 Каин траияс пэска ромняса, ай вой пэлас кхамны, ай аракхадилас латэ Ханох. Андэ коды врама Каин кэравлас форо ай щютас лэскэ анав пала пэско щяво Ханох.
18 Кай о Ханох аракхадилас Ирад, кай о Ирад аракхадилас Мехуяэл, кай о Мехуяэл аракхадилас Метушаэл, ай кай о Метушаэл аракхадилас Ламех.
19 Ламех лас пэскэ дуе ромнян: екх бущёлас Ада, э кавэр Цылла.
20 Кай э Ада аракхадилас Явал: вов кэрдилас дад кодолэ манушэнгэ, кон траин андэ цэрғи ай барарэн кхэрутнэ алатон.
21 Лэско прал бущёлас Ювал: вов кэрдилас дад саворэнгэ, кон башавэн пэ арфа ай тутураза.
22 Ви кай э Цылла сас щяво, Тувал-Каин, саво кэрлас са анда галбэно харкума ай састри. Тувал-Каиноски пхэн сас Наама.
23 О Ламех пхэндас пэскэ ромнянгэ:
— Ада ай Цылла, шунэн ман,
Ламехоскэ ромня, лэн сама пэ мурэ ворби.
Мэ мудардэм муршэс анда кадо,
кэ вов щиндас ман,
тэрнэ щявэс анда кадо,
кэ вов маладас ман.
24 Тэ рэсла эфтавар май бут анда Каин,
антунчи анда Ламех рэсла эфтавардэш
тай эфтавар май бут.
Сиф ай Энош
25 Адам траияс пэска ромняса. Латэ аракхадилас щяво, ай вой дас лэскэ анав Сиф, ворбаса: «О Дэл дас ман инкэ щяворэс мэштык о Авель, савэс мудардас о Каин».
26 Ви кай о Сиф сас щяво, ай вов щютас лэскэ анав Энош.
Андэ коды врама мануш лынэ тэ рудин лэ Раскэ лэ Яхваскэ.