13
Аврамо тай Лото розджянпэ
1 Аврамо ромняґа тай всаворяґа барвалимаґа рисиля Еґиптостар дэ Негево, тай Лото джиля лэґа.
2 Аврамостэ кана сля бут ското, рупь тай сувнак.
3 Негевостар вов джялас дурыдэр дромэґа, покы на авиля дэ Вефилё, колэстэ тханэстэ, тев калась ачелас лэхкири катуна, помашкар Вефилё тай Гаё,
4 колэстэ тханэстэ, тев Аврамо дэ колэ стерда жэртвенико. Котэ Аврамо прыакхарда лав РАЕХКИРО.
5 Лотостэ, саво пхирэлас Аврамоґа, кади ж сля фартэ бут хурдо тай баро ското тай катуны,
6 тай пхув на ґалёлас тэ пропарварэ лэн дуен: лэндэ сля кади бут барвалимо, со вонэ на ґалёнас тэ проджювэ екхтханэ.
7 Машкар Аврамохкирэ чябануря тай Лотохкирэ чябануря заджиля холи. Тунчи дэ кодыя пхув джювэнас ханаанея тай периззея.
8 Тунчи Аврамо пхэнда Лотости:
— Мэк на авэла холи на машкар тут тай ман, на машкар тирэн чябануря тай мурэн. Амэ ж пэхкирэ.
9 Подыкх, всавори пхув англа тутэ! Фэдэр розджямпэ: сар ту джяґа пэ зэрво, тунчи мэ порисявава пэ чячи риг, ай сар ту джяґа пэ чячи риг, тунчи мэ порисявава пэ зэрво.
10 Лото подыкхля тай удыкхля, со всавори маля Иордано дэ Цоаро мишто протиндёлас, сар садо РАЕХКИРО, сар пхув Египто. Када сля инте дэ колэ, сар РАЙ спхабарда Содомо тай Гомора.
11 Лото вылиля пэсти всавори маля Иордано тай джиля пэ востоко. Вонэ розджилепе:
12 Аврамо джюда дэ пхув Ханаано , ай Лото джювэлас машкар форуря пэ маля, тховда катуны надур Содомостар.
13 Мануша дэ Содомо сле налаче тай фартэ терэнас бут пхарэ бэзэха англа РАЙ.
14 Тунчи, сар Лото отджиля Аврамостар, РАЙ пхэнда Аврамости:
— Обдыкхпэ колэстар тханэстар, тев ту екхатар. Подыкх пэ северо, тай пэ юґо, пэ востоко тай пэ западо.
15 Всавори пхув, сави ту дыкхэх, Мэ дава тути тай тирэнди чяворэнди пэ всаворэ вако.
16 Мэ терава, со терэн чяворэн авэла пхэрдо, сар тишай пэ пхув. Акэ со сар ко ґалёла тэ пэрэбинэ тишай, тунчи тай тирэ чяворэ авэна побиндэ.
17 Джя, проджяпэ пэ кадыя пхув дэ лунгима тай дэ буґлима. Мэ дава ла тути.
18 Аврамо стидыня катуны тай джиля тэ джювэ надур вэшэстар Мамре дэ Хевроно. Вов стерда котэ жэртвенико РАЕСТИ.