4
1 Mi avosia sa zinama hie, gamu na barikaleqe pu deana guana bulumakao pa Basani,
gamu pu koa koasa toqere pa Sameria,
gamu si ṉoṉovali sarini pu malaṉa meke arini pu loke gedi
meke zama la koari mia palabatu, “Paleke poni gami napo,” gua.
2 Gua sapu hopena se Zihova Baṉara si tokotokoro si Asa:
“Hinokara sa totoso asa si kote kamo mae,
sa totoso kote ta rita qaqahere si gamu meke ta turaṉa taloa,
doduru gamu si kote ta soto vinetuṉu.
3 Hopeke gamu si kote vura toṉoto taloa
kote vura gua koari na lopa pa goba,
meke kote ta gona vura la gua pa toqere Hemoni,”
zama vura gua se Zihova.
Lopu Boka Tava Tumatumae se Izireli
4 “La pa Betolo, mamu tavete va kaleana vasina:
la pa Qiliqali, mamu tavete va kaleana nono la tu.
Paleke maeni sari mia vinukivukihi doduru munumunu,
mia keke pa manege pa doduru vina ṉeta vuaheni.
5 Sari mia bereti koa i na isiti d si mae variponi ni pude zama leana,
mamu vahesi puleni gamu koari mia vinariponi moka;
gamu tie Izireli, vivinei va titie ni,
ura arini si qetuqetu ni gamu pude taveti,”
zama vura gua se Zihova sa Baṉara.
6 “Arau poni gamu tia kokobadi pa doduru vasileana lavata
meke va ovia gamu koari na vasileana hitekedi,
ba lopu kekere pule mae si gamu koa Rau,”
zama vura gua se Zihova.
7 “Tuqe pule nia tugo Rau sa ruku koa gamu
totoso ṉeta sidara koa meke pakepakete, gua.
Ponia ruku Arau si keke vasileana,
ba va noso ia Rau koa sa keke pa kalina.
Keke inuma si vagi ruku
ba keke si loketoṉa meke popa taloa.
8 Sari tie si tedeve hata kolo pa keke vasileana la pa keke
ba lopu boka vagi va leana kolo pude napo,
gua ba lopu kekere pule mae si gamu koa Rau,”
zama vura gua se Zihova.
9 “Soku totoso si seke i Rau sari mia inuma meke gua tugo sari inuma vaeni,
sekeni givusu maṉini meke nokinoki Rau.
Na kupokupo henai sari mia piqi na huda olive,
gua ba lopu kekere pule mae si gamu koa Rau,”
zama vura gua se Zihova.
10 “Sari na oza si garunu atu ni Rau koa gamu
gua sapu tavete ia Rau pa Izipi.
Va mate i Rau pa vedara sari mia tie vaqura,
turaṉae mia hose ta zau vagidi.
Sari isumia si va siṉi ni humaṉa muzi tomate Rau sapu mae guadi koasa mia vinarigara ipi,
gua ba lopu kekere pule mae si gamu koa Rau,”
zama vura gua se Zihova.
11 “Arau va mate pani sari kaiqa koa gamu
gua sapu huara i Arau si pa Sodomu meke Qomora.
Agoi si guana itito sapu ta saputu vagina pa nika,
gua ba lopu kekere pule mae si gamu koa Rau,”
zama vura gua se Zihova.
12 “Gua ke hie si kote tavete atu nia Arau koa gamu na butubutu Izireli,
meke sina kote tavete atu nia Rau koa gamu na tie Izireli,
ke mi va nama pude tutuvu ia sa mia Tamasa.”
13 Asa pu va podaki sari toqere,
pu tavetena sa givusu,
meke tozi vurani sari Nana binalabala koari na tie,
Asa pu va iliri la nia pa hinuporo sa vaqavaqasa,
meke tete koari na vasidi ululudi pa popoa pepeso,
e Zihova Tamasa tadi na Qeto Minate sa Pozana Sa.