12
Sa Vina Gorevurana sa Kinorokorotae
1 Koasa totoso asa, si kote turu kopu se Maekolo, sa ṉati mateana sapu lavelaveni sari mua tinoni. Kote na totoso koa ia tinasigiti, gua sapu lopu ele ta evaṉa pa pinodalaena sapu vura mae sari na butubutu baṉara kamo kamahire. Ba koasa totoso asa, sari mua tinoni, doduru pu ta kubere pozadi koasa buka, si kote ta harupu.
2 Soku tina tie pu ele mate meke ta pomunae pa pepeso si kote vaṉunu pule: kaiqa si kote la pa tinoa hola, meke kaiqa si kote la pa kinurekure loke vinabetona.
3 Sarini pu gilaedi si kote ṉedala guana kalalasa pa maṉauru, meke arini pu turaṉa soku tie la pa tinoṉoto si kote ṉedala gua rina pinopino ninae rane ka rane.
4 Ba agoi Daniela, si mu tuku ia sa buka hie mamu veko nia tokoro, pude lopu kaqu ta tiro pule osolae kamo sa totoso tava gorevura sa kinorokorotae. Soku si kote ene la meke mae, hata ia pude hoda ia sa dia tinumatumae,” gua sa tie sapu pokopoko lineni.
5 Meke arau, Daniela, si doṉo la, meke isa pa kenuqu si turu dia sari karua tie, keke pa kali taqele mae gua koasa ovuku, meke keke pa kali taqele la gua.
6 Keke ari karua si zama la koasa tie pokopoko lineni, sapu turu nana pa kali sage koasa beru kolo pa ovuku, “Vea kote seunae gua meke kote tava gorevura sari tiṉitoṉa variva magasadi hire?” gua si asa.
7 Sa tie sapu pokopoko lineni, sapu turu nana pa kali sage koasa beru kolo pa ovuku, si ovulu sage nia sa lima mataona meke sa lima gedena la pa maṉauru, meke avosia rau zama tokotokoro pa pozana si Asa sapu toa hola ninae rane ka rane. Zama guahe si asa, “Kote ta evaṉa si arini pa keke totoso, karua totoso, meke pa kukuru totoso. Totoso tava kilasa va kaleana sa ṉiniraṉira tadi na tie madidi te Tamasa si kote hokoto sari doduru tiṉitoṉa hire.”
8 Avosia rau, ba lopu va bakalia rau. Ke nanasa si rau, “Qua baṉara, kote vegugua vina hokotodi sari doduru hire?”
9 Olaṉa si asa, “Daniela, topue taloa mua, sina sari zinama si ele ta tuku meke ta veko tokoro osolae kamo sa totoso tava gorevura sa kinorokorotae.
10 Soku si kote tava vulasa, loke kisakisadi meke tava via, ba sari tie kaleadi si kote tavete va kaleana eko lamo. Lopu keke ari tie kaleadi kote va bakalia, ba arini sapu gilaedi si kote va bakalia mo.
11 Podalae koasa totoso sapu tava noso sa vinukivukihi pa hopeke rane meke kote va turu ia sa si keke beku variva malederena sapu vata evaṉia sa tinahuara nomana, si kote koa nana si ka keke tina karua gogoto sia ṉavulu puta rane.
12 Tamanae sa tie sapu aqa nia meke kamo ia sa vina betona sa keke tina ṉeta gogoto toloṉavulu lima rane.
13 Ba sapu agoi, si mu topue taloa mua osolae kamo sa totoso tava gorevura sa kinorokorotae. Kote mate si agoi meke pa vina betodi rina rane si kote turu pule si agoi pude vagia sa pinia sapu ta hia nia agoi.”