5
Ta Pitu se Izireli koe Tamasa
1 Avosia si hie, gamu na hiama!
Va taliṉa mae, gamu pa Izireli!
Va avoso, gamu pa tututi tanisa baṉara!
Sa vinaripitui hie si atu koa gamu;
na sipata si gamu pa Mizipa,
na vaqara ta nadorona pa Toqere Tabora.
2 Sari tie va gugue si ele lohi la sa va mate tie tadirini.
Kote va lipulipu i Arau sari doduru arini.
3 Arau tumae va leana nia se Iparemi;
Izireli si lopu tome koa Rau.
Agoi Iparemi si ele taliri la pa tinavete maqota;
meke Agoi Izireli si kaleadi tu mua tinavete.
Vina Balau pa Vinahesi Beku
4 Sari dia tinavete kaleadi lopu va malumi
pude pule la koasa dia Tamasa.
Na lulia rini sa hahanana maqota sapu koa pa korapa bulo dia;
meke lopu pamaṉa nia rini se Zihova.
5 Sa vinahesi pule tadi pa Izireli si va sosode pule ni;
sari pa Izireli, gua tugo sari pa Iparemi, si tubarae ni koari dia sinea,
Ziuda ba ta tubarae luli koa rini.
6 Pana turaṉa lani rini sari dia sipi meke bulumakao pude vukivukihi lani koe Zihova,
si lopu dogoria rini si Asa;
na ele va rizu va seu si Asa koa rini.
7 Arini ele sekea sa vinariva egoi te Zihova;
podo koburu pa vale siraṉa si arini.
Kamahire pa dia vinahesi beku pa Inevaṉa Sidara Vaqura
kote mate si arini meke sa dia inuma si kote ta huara.
Vinaripera pa Varikorapadi Ziuda meke Izireli
8 Ivua sa buki pa Qibea,
sa buki kikiho pa Rama.
Ivu va ululae ia sa buki varipera pa Beti Aveni,;
ego tu gamu na varane pa Benisimane, ene kekenu atu.
9 Iparemi si kote ta huara koasa rane vinari kilasi.
Koari na butubutu pa Izireli si kote tozi vura nia Arau nasa si kote ta evaṉa.
10 Sari koimata te Ziuda si gua arini pu va rizu patu voloso.
Kote va titisi gore la nia Rau sa Qua tinaṉaziri koa rini guana keke naqe.
11 Iparemi si ta ṉoṉovala,
ta neti gore koasa vinaripitui,
sina ṉiṉira sa dia hiniva pude vahesi beku.
12 Arau si guana kaqa koe Iparemi,
guana popozu huda koari pa Ziuda.
13 Totoso dogoria Iparemi sa nana minoho,
meke Ziuda sari tubuna,
si taliri la koe Asiria se Iparemi,
meke tioko hata tinokae koasa baṉara lavata vasina.
Ba lopu kote boka salaṉa igo sa,
lopu kote boka va ibu i sa sari tubumu.
14 Ura kote guana laione si Arau koari pa Iparemi,
guana keke laione nomana koe Ziuda.
Kote teuru va umumi Arau meke taloa Qua;
kote paleke taloani Rau, meke loke tie si koa pude harupi.
15 Meke kote pule la si Arau pa Qua vasina
osolae helahelae ni rini sari dia sinea.
Meke kote hata ia rini sa Isumataqu;
pa korapana sa dia tinasuna si kote hata zoṉazoṉa Au rini si Arau.”