7
1 Totoso hiva va pule la ni Rau sari tinagotago tadi na Qua tinoni,
meke totoso hiva salaṉia Rau se Izireli,
si sari sinea te Iparemi si vura bakala tu
meke sari tinavete kaleadi te Sameria si ta dogoro mo.
Na sekesekei si tavetia rini,
tie hikohiko si nuquru vetuvetu,
meke sari puku tie si hiko pa sisiraṉa;
2 ba lopu boka tumae nia rini
sapu Arau va nonoga i Qua sari doduru dia tinavete kaleadi.
Vari likohae ni mo dia sinea si arini;
dogoro betoi mo Arau.
Na Sinekesekei si pa Vetu Baṉara
3 Va qetuqetu ia rini sa baṉara koari dia kinaleana,
meke va hegeri rini sari koburu tavia koari dia kinohakoha.
4 Ari doduru si barabarata beto mo,
ṉada gua tugo na oputu
sapu lopu kilu ta sutuṉu pule koasa tie kinakina palava
podalae totoso ta mono sa palava osolae sage si asa.
5 Pa rane inevaṉa tanisa baṉara
si viviri pa napo vaeni sari na koburu tavia,
meke somana naponapo sa baṉara koari kasa pu va sisire nia sa zinama te Tamasa.
6 Sari bulo dia si gua tugo na oputu;
halala sa dia kinukiti totoso la vivinei ia rini.
Sari dia inokoro si lera doduruna sa boṉi;
meke katu halala pana munumunu.
7 Doduru arini si ṉada gua tugo na oputu;
va matei rini sari dia baṉara.
Doduru dia baṉara si hoqa,
ba lopu keke si tioko hata tinokae koa Rau.
Izireli meke sari Kaiqa Butubutu
8 Se Iparemi si vari henie koari kaiqa butubutu huporo;
se Iparemi si guana keki naperena sapu lopu ta iliri meke kina kale.
9 Sari tie karovodi la va murimuri pania sa nana ṉiniraṉira,
ba lopu boka tumae nia sa.
Podalae keo sa kaluna,
ba lopu va nonoga ia sa.
10 Sa vinahesi pule te Izireli va sosode pule nia koa sa,
be vea bakala gua sari doduru hire
ba lopu kekere pule la koe Zihova sa nana Tamasa si asa
babe hata ia sa si Asa.
11 Se Iparemi si guana duduru,
sapu boka ta koha mo meke loke nana binalabala.
Kekenu si tioko hata tinokae koe Izipi,
beto si taliri la pule koe Asiria.
12 Totoso la si arini, si kote ipa ni vaqara Arau si arini;
kote daku goreni Rau gua ari na kurukuru tapuru.
Pana avosi Rau varigaradi,
si kote saputu vagi mo Rau.
13 Madi ta talotaṉa si arini,
sina ene va seu si arini koa Rau!
Kote kamoi tinahuara
sina va karikari mae koa Rau si arini!
Hiva hola nia Rau pude harupu puleni si arini
ba vivinei kokoha Nau rini si Arau pa tie.
14 Lopu kabo mae si arini koa Rau pa bulodia
ba koari dia teqe mo si kabo arini.
Varigara si arini pude tepa huiti meke vaeni vaqura
ba taliri va seu tu koa Rau si arini.
15 Arau va tumatumae i meke va ṉiṉira i,
ba qoraqora nau rini koari dia tinavete kaleadi.
16 Lopu taliri la si arini koa sa Tamasa sapu Ululuna Hola;
guana bokala lopu toṉotona si arini.
Sari dia koimata si kote hoqa pa vedara
koa gua koari dia zinama vinahesi pule.
Koasa ginugua hie si kote tava sisire si arini
pa popoa Izipi.