2
Sari na Kupokupo si guana Vinabalau koasa Rane te Zihova
1 Mi ivua sa buki, sa vina balau pa Zaione,
sa toqere hopena te Tamasa.
Mi holoqoru gamu na tinoni pa Ziuda!
Sina sa rane te Zihova si tata hokara mae.
2 Kaqu opoadumu meke huporo dudukurumu sa rane asa.
Sa puku minate lavata tadi na kupokupo
si zukuru la guana huporo sapu nobi tamuni sari na toqere.
Loke tiṉitoṉa sapu kekeṉoṉo gua asa,
meke lopu kaqu ta evaṉa pule tugo.
3 Gani va matei rini sari na linetelete guana sinulu nika.
Sa popoa pa kenudia rini si gua puta tugo sa Inuma Idini,
ba pa mudidia si na vasina qegana.
Loke tie si kaqu boka goveteni si arini.
4 Doṉo guana hose si arini;
haqala guana hose varipera.
5 Sipu horu si arini pa batudi rina toqere,
si halabutu guana totopili varipera si arini;
pidapidala guana duduli popadi pa nika si arini,
meke turu va tokele guana va namanama pude rapata.
6 Sipu ta dogoro mae si arini si holoqoru beto sari doduru tie;
beasa beto isumatadi.
7 Rapata guana tie varane si rini,
haele sagei rini sari na goba guana tie varipera.
Ene toṉoto la si arini meke lopu hobe sa dia vina totoanae,
8 babe ene vari henie si arini.
Loke tie si boka lavelave puleni,
meke loketoṉa si boka hukati.
9 Bebeno la ia rini sa vasileana nomana;
haqala holani rini sari na goba;
haele sagei rini sari na vetu
meke lopoto nuquri rini sari na vuida guana tie hikohiko.
10 Niu sa pepeso sipu zukuru la si arini;
neneqara tugo sa maṉauru.
Sa rimata meke sa sidara si tava huporo,
meke lopu pelara pule sari na pinopino.
11 Velavela i e Zihova sari na koimata pa Nana qeto minate.
Sari na tie varipera pu va tabena Sa si sokudi meke ṉiṉiradi.
Ve toleṉe gua variva holoqoruna gua sa rane te Zihova!
Esei kaqu boka toa nia si asa?
Sa Tinioko Pude Kekere
12 “Ba kamahire,” gua se Zihova,
“Mi kekere va hinokara,
mamu pule mae koa Rau koasa minadi pa hinenahena pa kinabo meke pa tinalotaṉa.
13 Mi vata dogoro nia pa bulomia sa tinalatoaṉa, na kinuliusu,
sina sa rinikatadi sari na mia poko si lopu pada.”
Pule mae koe Zihova sa mia Tamasa.
Varitokae meke ta siṉie tataru si Asa;
ṉoṉona meke kopu nia sa Nana vina tatara;
va namanama doduru totoso si Asa pude taleosae tie,
meke hoke veko pania Sa sa vina kilasana sapu ele va nama nia Sa.
14 Gina kote hobea mo e Zihova sa mia Tamasa sa Nana binalabala
meke manani gamu Sa koasa vinari tomoina sa ginani.
Meke kaqu tiqe poni nia huiti na vaeni gamu si Asa.
15 Mi bukia sa buki pa Toqere Zaione,
tozini sari na tie pude madi pa hinenahena,
mamu tavetia si keke vinarigara!
16 Mamu varigarani sari na tinoni;
va namanama i koa keke vivinei madina;
turaṉa maeni sari na barogoso;
varigarani sari na koburu meke sari na haha tugo.
Gua tugo saripu tiqe varihabadi si
madi luari sari dia lose, madi mae tugo.
17 Sari na hiama pu varavara tokani sari na tinoni pa kenuna e Zihova pa vari korapana sa hope meke sa sasada koasa Zelepade,
si kaqu kabo meke zama,
“Mu tataruni sari Mua tinoni, ke Zihova.
Mu lopu va malumi sari na votiki butubutu
pude va kari babe va sisireni gami meke zama guahe, ‘Avei sa mia Tamasa gua?’ ”
Va Masuria Tamasa sa Pepeso
18 Gua asa ke, kaqu va dogoro nia Zihova sa Nana tinalotaṉa koasa Nana pepeso;
koa nana tugo sa Nana tataru koari Nana tinoni.
19 Meke kaqu olaṉi Sa si arini,
“Kamahire si kaqu ponini gamu Rau sa huiti na vaeni,
meke na oela olive, meke kaqu deṉa tugo si gamu.
Lopu kaqu va kari pule gamu rina votiki butubutu.
20 Kaqu va rizu pani Rau sari na rovana kupokupo pu mae guadi pa kali Iuparetisi,
meke kaiqa si kaqu ta hadu la gua pa qega.
Sari dia kupokupo kenudi si kaqu ta hadu va lodu pa Kolo Matena,
meke arini pu mumudi mae si kaqu ta hadu la gua pa Kolo Meditareniani.
Kaqu humaṉa hikare sari tomatedi.
Kaqu huari Rau si arini sina koa gua sapu tavete atunia rini koa gamu.”
21 Ke gamu na inuma, mi lopu matagutu,
ba mamu koa qetuqetu,
sina ele tavete ponini gamu e Zihova sari doduru tiṉitoṉa arilaedi hola.
22 Gamu na kurukuru ṉame, mi lopu matagutu.
Ele buma valeana sari duduli;
ele vua pule sari na huda,
meke soku sari na piqi meke na qurepi kamahire.
23 Mi koa qetu gamu na tinoni pa Zaione,
mi qetuqetu nia gua sapu ele tavete ponini gamu e Zihova sa mia Tamasa.
Pa Nana hahanana toṉotona si ele ponini gamu sa ruku pa totoso podalae ibu;
ele zoropo gore mae nia Sa sa ruku ibuna koa gamu,
meke sa ruku pa totoso podalae maṉini gua tugo totoso lahe.
24 Sari na vasina ta paqaha sari na kiko huiti koari na qaqalotodi pa totoso pakepakete si kaqu ta siṉie huiti;
sari na vovoina pa kalina sa munamunalana,
si kaqu siṉi ta luluapae i na vaeni meke na oela olive.
25 Kaqu poni puleni gamu Rau gua sapu ele siana nia gamu
pa vuaheni sipu gani va matei ri na rovana kupokupo sari mia linetelete;
na Arau mo garunu atuni koa gamu sari na rovana kupokupo sara.
26 Kaqu soku gemi ginani meke kaqu deṉa hola.
Kaqu vahesia gamu se Zihova sa mia Tamasa,
sapu ele tavete ponini gamu sari na tinavete variva magasadi.
Sari na Qua tinoni si lopu kaqu tava karikari pule.
27 Meke agoi, Izireli, si kaqu gilania sapu koa somana koa gamu si Arau,
meke sapu Arau, se Zihova, Arau mo sa mia Tamasa meke loketoṉa pule.
Sari na Qua tinoni si lopu kaqu tava karikari pule.
Sa Rane te Zihova
28 Koari na rane mumudi si kaqu zoropo gore la nia Rau koari doduru tie sa Maqomaqoqu.
Meke sari na tumia koreo na vineki vaqura si kaqu korokorotae;
meke sari na barogoso si kaqu putaputagita;
meke sari na tie vaqura si kaqu dogori sari na dinogodogorae variva magasadi.
29 Pa totoso tugo asa si kaqu zoropo gore la nia Rau sa Maqomaqoqu
kamo la gua tu koari na nabulu, sari palabatu na barikaleqe.
30 Kaqu evaṉi Rau sari na vina gilagila variva magasadi koasa rane sana pa maṉauru meke pa pepeso;
kaqu ta evaṉa na minate, meke sa nika meke tuṉaha nika moatana.
31 Kaqu tava huporo sa rimata,
meke kaqu ziṉara guana ehara sa sidara sipu lopu ele kamo sa rane arilaena meke variva holoqoruna te Zihova.
32 Ba sari doduru tie pu tepa la tinokae koe Zihova si kaqu ta harupu.
Gua sapu ele zama nia e Zihova,
“Ari kaiqa pu vizati Rau pa Zerusalema meke pa toqere Zaione si kaqu ta harupu.”