3
Barabarata se Izireli
1 Be veko pania keke tie sa nana barikaleqe
meke keke votiki tie haba hobea sa barikaleqe asa,
vea, boka vagi pule nia sa palabatu kekenu si asa?
Lopu kote va kaleana toa ia gamu sa mia pepeso?
Ba agoi, Izireli, si koa guana maqota sapu puta turaṉa soku tie,
vea, kote kamahire kekere pule mae tu koa Rau si agoi?”
zama vura gua se Zihova.
2 Zama pule si Asa, “Mu eṉa sage la koari na toqere loke duduli na hudadi, mamu dogoria.
Vea, koa nana tugo keke vasina sapu lopu ele ekoa goi guana maqota?
Pa vale siraṉa si habotu si agoi, aqani sari mua babaere,
guana tie Arebia d sapu habotu pa qega.
Agoi ele va kaleana ia sa pepeso
koari mua hahanana maqota meke mua kinaleana.
3 Gua asa ke ta tuqe pule sari kolo pa lei,
meke sa ruku si lopu hoqa.
Ba agoi si loke mua kinurekure hokara
na ele vagia sa kineha tadi na maqota.
4 Ba vaquru tioko mae Au mo goi:
‘Qua Papa, Qua baere sapu podalae totoso vaquraqu,
5 vea kote bugoro eko nau mo Goi si arau?’
Gua asa sari mua zinama,
ba kaleadi lamo sari tinavete taveti agoi.”
Tavete Luli Ziuda sari Tinavete Kaleadi te Izireli
6 Pa totosona sapu baṉara se Zosaea si zama se Zihova koa rau, “Vea dogoria goi sapu tavetia Izireli, guana barikaleqe kaleanana? Sage la si asa koari doduru toqere ululudi meke pa kaurudi ri doduru huda aqaqoro meke barabarata pa vasidi arini.
7 Rovea Rau sapu hokara kote pule mae si asa koa Rau mudina sapu taveti sa sari doduru arini gua, ba lopu hite tu, meke dogoria nana sa tasina vineki lopu ta ronuna, se Ziuda, sari doduru pu taveti sa.
8 Arau ponia pepa vinari luari se Izireli, lopu kopu nia sa sa vinariva egoi, meke garunu taloa nia Rau sina barabarata lamo si asa. Ba dogoria tugo Rau sa tasina vineki, sapu lopu ta raṉena, se Ziuda si loke nana minatagutu; asa ba vura la barabarata nana tugo.
9 Na lopu hite va noma nia binalabala Izireli sari tinavete va kaleana tanisa, ke va boni ia sa sa pepeso meke barabarata si asa koari vinahesidi ri na patu na huda.
10 Vea gugua, ba sa tasina vineki kaleanana, se Ziuda si lopu hinokara kekere pule mae si asa koa Rau pa doduruna sa bulona, na kokohana mo,” zama vura gua se Zihova.
11 Zama se Zihova koa rau, “Se Izireli sapu loke nana rinaṉeraṉe si toṉoto hola nia se Ziuda sapu korona vahesi Au.
12 La, mamu zama vura nia sa inavoso hie koari pa kali gede:
‘Mu kekere pule mae, agoi Izireli pu loke mua rinaṉeraṉe,’ zama vura gua se Zihova,
‘Lopu kote bugoro nigo Rau,
ura na koa Au na tataru variva taleosae si Rau,’ zama vura gua se Zihova,
‘Lopu kaqu bugoro lamo si Rau.
13 Ba mu helahelae nia mo sa mua sinea,
na va karikari mae si agoi koa Arau Zihova sa mua Tamasa,
sa mua tataru si ele poni la nia goi koari tamasa karovodi,
pa kaurudi ri na huda aqaqoro,
meke koromu vahesi Au agoi,’ ”
zama vura gua se Zihova.
14 Zama vura pule se Zihova, “Mi kekere pule mae, gamu na tinoni pu loke mia rinaṉeraṉe, ura Arau mo sa loamia. Arau kote vizata gamu, keke pa hopeke vasileana, karua pa hopeke puku butubutu, meke kote turaṉa puleni gamu Rau pa Zaione.
15 Meke kote poni gamu Rau sari sepati pu luli sari hiniva pa Buloqu Rau, arini pu kote turaṉa gamu pa tinumatumae meke ginilagilana.
16 Koari rane arini totoso soku hola meke toqolo si gamu koasa pepeso si sari tie si lopu kote zama, ‘Sa Bokese Vinariva Egoi te Zihova,’ gua. Na lopu kote koa pa dia binalabala babe balabala pulea rini; na lopu kaqu saivi ia tu rini babe tavete pule ia si keke vaqurana.
17 Pa totoso asa si sa popoa Zerusalema si kote poza nia ‘Na habohabotuana baṉara te Zihova,’ arini, meke doduru butubutu si kote varigara pa Zerusalema pude va lavatia sa Pozana e Zihova. Lopu kote luli arini sari bulo kaleanadi sapu tasunadi hola.
18 Koari rane arini, sa butubutu te Ziuda si kote koa keke turaṉia sa butubutu Izireli, meke kote pule varigara si arini koasa tinaraovo pa popoa pa kali gede, meke pule la koasa popoa sapu poni nia Rau koari tiatamamia pude na dia tinago.
Sa Vinahesi Beku Tadi na Tie te Tamasa
19 Zama si Rau telequ:
‘Hiva hola si Arau pude kopuni gamu guana tuqu soti
meke poni gamu sa pepeso ta okoraena,
na tinago tolavaena, holani sapu tadi votiki butubutu.’
Hokara kote poza Nau ‘Tamaqu’ gamu si Rau
meke lopu taliri taloa ba luli eko mo koa Rau, gua.
20 Ba gamu na butubutu Izireli si gua tugo na barikaleqe sapu lopu hinokara koasa nana palabatu,
totoso lopu soto va nabu pa vinahesiqu Rau,”
zama vura gua se Zihova.
21 Na kabo si ta avoso pa toqere loke dudulidi na hudadi,
na taruqoqo meke kebokebo sari tie pa Izireli,
sina ta muliṉae hokara sa tinoṉoto
meke ele muliṉi nia arini se Zihova sa dia Tamasa.
22 Zama pule se Zihova, “Kekere pule mae, gamu na tinoni pu loke mia rinaṉeraṉe koa Rau.
Kote salaṉa gamu Rau koari na mia tinavete kaleadi meke turaṉa pule maeni gamu koa Rau.”
Meke olaṉa sari pa Izireli, “Uve, mami pule atu koa Goi,
ura Agoi Zihova sa mami Tamasa.
23 Hinokara sapu sari na vinevehe pa vinahesi beku koari na toqere
meke koari na toa si kokohadi mo;
hinokara sapu koe Zihova mo, sa nada Tamasa,
si boka ta harupu sari pa Izireli.
24 Podalae totoso koburu si gami si la sa vinahesina sa tamasa variva kurekurena, se Beolo,
meke vagi pani sari vuadi rina tinavete tadi tiatamamami,
sapu sari dia koburu vineki na koreo
meke sari bulumakao na sipi.
25 Mami eko gore pa kinurekure,
mami nobi nia sa vina goremami.
Ele tavete va sea si gami koe Zihova sa mami Tamasa,
gami meke sari tiatamamami;
podalae totoso koburu si gami kamo pa rane ṉinoroi
si lopu va tabea gami se Zihova sa mami Tamasa,” gua.