14
1 Sa barikaleqe gilaena si kuria sa nana vetu,
ba sa barikaleqe pupuhuna si pa limana soti mo huara gore nia sapu tanisa.
2 Asa pu toṉoto nana inene si pamaṉa nia sa se Zihova,
ba asa pu kaleana nana hahanana si korona nia sa si Asa.
3 Sa zinama tanisa tie pekipeki si ta seke nia sa mudina,
ba sa beruna sa tie gilae si hukatana si asa.
4 Pana loke bulumakao pude dakua sa geligeliana pepeso si kokoba sa mua vetu vekovekoana ginani,
ba pa ṉiniraṉira tanisa bulumakao si soku sa vua.
5 Sa tie va sosode hinokarana si tozia sa hinokara,
ba asa pu kokohana si sekesekei tugo.
6 Sa tie ṉoṉovala si hata ia sa ginilagilana lohina ba lopu dogoria sa,
ba sa tinumatumae si kamo tuturei koasa tie pu gilagilana.
7 Mu koa va seu koa sa tie pekipekina,
na loke ginilagilana si kote vagia goi koari nana zinama.
8 Sa ginilagilana tanisa tie gilae si pude tumae nia sa nana siraṉa,
ba sari hahanana kaleadi tadi na tie pekipeki si tuturaṉa va sea.
9 Va sisire nia ari tie pekipeki sa hinerehere tana sinea,
ba sari tie leadi si qetu nia meke hata vinariva taleosae.
10 Hopeke bulo si tumae ni sari hopeke dia tinalotaṉa,
meke votiki tie lopu kote boka tumae ni sari dia hopeke qinetuqetu.
11 Sa vetu tanisa tie kaleana si kote ta huara,
ba sa ipi tanisa tie ṉoṉo si kote turu hola.
12 Koa nana sa siraṉa sapu doṉo guana toṉoto pa tie,
ba pa vina betona si kamo la tu pa minate.
13 Na hinegere si boka tomea sa tinasigiti pa bulo,
meke sipu hola sa qinetuqetu si koa hola sa tinalotaṉa.
14 Sari tie kaleadi si kaqu vagi vuadi sari dia hahanana,
meke sa tie leanana si kaqu ta pia.
15 Sa tie sapu lopu goto si hoke va hinokara hoboro mo,
ba sa tie gilae si kote vizata va leana koari nana inene.
16 Sa tie gilagilana si pamaṉa nia se Zihova meke kilua sa kinaleana,
ba sa tie pekipeki si pupuhu meke sasurae hoboro lamae.
17 Sa tie bubugoro haru si tavete hoboro,
meke sa tie sekesekei si ta hakohakoe.
18 Saripu lopu goto si hoke va kamo pupuhu tugo,
ba sa tie gilae si toropae nia sa tinumatumae.
19 Sari tie kaleadi si hoke todoṉo ni sari tie leadi,
meke sari tie koluradi si tepatepa tinokae koari tie toṉoto.
20 Sari tie malaṉa si ta hakohakoe tugo koari turaṉadia,
ba sari tie tagotago si soku sari na dia baere.
21 Asa pu hakohako nia sa turaṉana si sea,
ba tamanae si asa pu tataru ni saripu loke gedi.
22 Sarini pu kuhana ni si kaiqa hiniva kaleadi si hoke muliuṉu taloa tugo,
ba arini pu balabala pude tavete va leana si kote vagia sa tataru nabuna meke sa sinoto va nabu koe Tamasa.
23 Doduru tinavete mamatadi si koai na lineana,
ba sa zama palae si na minalaṉa kamoa.
24 Sari na tinagotago tadi na tie gilaedi si na dia toropae baṉara,
ba sa dinuviduvili si na pakupaku tadi tie pekipeki.
25 Na tie va sosode hinokara si harupu tie,
ba sa tie va sosode kokoha si sekesekei.
26 Asa pu pamaṉa nia se Zihova, si ta kopue koa Sa,
meke sari nana koburu kote boka la tome vasina.
27 Na pinamaṉana e Zihova si na bukaha tanisa tinoa,
va kekere taloa ia sa tie koasa sipata tanisa minate.
28 Na butubutu nomana si na ṉiniraṉira tanisa baṉara,
ba pana loketoṉa tie si loke laena mo sa koburu tavia.
29 Sa tie sapu lopu bugoro si tagoa sa ginilagilana,
ba asa pu bubugoro haru si va vura ia sa nana pinekipeki.
30 Na bulo sapu koa bule si ponia tinoa sa tini,
ba sa kinonokono si va popozu susuri.
31 Asa pu ṉoṉovali saripu malaṉa si va sisire nia sa sa Tamasa pu tavetedi,
ba asa pu tataru nia sa tie loke gana si pamaṉa nia sa Tamasa.
32 Totoso kamo sa tinasuna si hoqa gore sari tie kaleadi,
ba totoso kamo sa minate si ta rupaha dia sari tie toṉoto.
33 Na ginilagilana lohina si koa pa bulona sa tie gilaena,
meke koari pu pekipeki ba vata gilana pule nia si asa.
34 Na tinoṉoto si ovulia sa butubutu,
ba na sinea si variva kurekure koari na tie.
35 Na baṉara si qetu nia sa nabulu gilaena,
ba sa nabulu variva kurekurena si ta ṉaziri nia sa.