141
Keke Vinaravara Veluvelu
(Keke kinera te Devita)
1 Kei Zihova, tepa atu si rau, Mu tuturei toka nau!
Mu avoso mae au pana tepa atu rau!
2 Mu balabala gunia na vina vukivukihi humaṉa lea sa qua vinaravara,
meke sari na limaqu pu ovulu sage ni rau si Mu guni na vina vukivukihi veluvelu.
3 Kei Zihova, Mu kopu nia sa ṉuzuqu,
Mu guana tie kopu sasada pa beruqu,
pude lopu tozi vura nia rau sa sinea,
4 Mu va ilolo au koari na inokorodi rina tinavete kaleadi,
meke pa sinomana koa rina tie kaleadi pa dia tinavete kaleadi,
maqu lopu hite somana nia si keke dia inevaṉa.
5 Keke tie leana si mani va toṉoto au pa tataru,
ba sa vina lavataqu koari na tie kaleadi si namu lopu kaqu va ego hokaria rau,
sina hoke varavara va kari i rau sari na dia tinavete kaleadi.
6 Pana ta vala sari na dia koimata pude ta zutu pa minate koari pu zutudi,
si kaqu gilania rina tie sapu hinokara sari na qua zinama.
7 Kekeṉoṉo guana huda sapu ta viqala meke ta soko va umumu,
si kaqu gua tugo sari na susuridi pa hukihukiridi rina lovudi.
8 Kei Zihova Tamasa, koa Goi mo si doṉo atu rau,
koa Goi mo si hata ia rau sa aqoroana,
Mu lopu luarau pa minate.
9 Mu va sare au koari na sinekesekei tadi na qua kana,
meke koari na sipata tadi na tie kaledi.
10 Madi hoqa pule pa dia sinekesekei teledia sari na tie kaleadi pana tava sare si rau.