38
Vinaravara Tanisa Tie sapu Koa Ta Sigiti
(Keke kinera te Devita)
1 Ke Zihova, Mu lopu nore au pa Mua binugoro,
Mu lopu va kilasau pa Mua tinaṉaziri.
2 Ele tava bakora si rau koari na Mua tupi,
meke ele seke nau limamu Goi.
3 Ta sigiti hola si rau, sina koa gua koasa Mua binugoro,
moho sa doduru tiniqu koari na qua sinea.
4 Lodu mate si rau koari na qua sinea,
guana keke pinaleke mamatana hola si arini koa rau,
sapu lopu boka paleki rau.
5 Muzi meke humaṉa hikare sari na bakoraqu,
ura kaleana hola sa qua dinuviduvili.
6 Ene koqoho si rau sina gigiri sa qua tinasigiti,
kabo alili si rau doduru rane.
7 Maṉini hola sa tiniqu meke tata mate qua.
8 Ta naqoto gore si rau meke loke qua ṉiniraṉira hokara;
silava si rau sina koa pa tinasuna sa maqomaqoqu.
9 Ke Baṉara, sa qua inokoro nomana
pude ta salaṉa si gilania Goi.
Bakala koa Goi sa qua tinasigiti.
10 Duṉaduṉana sa buloqu, na malohoro si rau,
meke rida tugo sari na mataqu.
11 Sari na qua baere na turaṉaqu si lopu hiva tata mae au,
sina koa gua koari na tubuqu,
meke sari na turaṉaqu soti ba turu va seu dia koa rau.
12 Arini pu hata au pude va mate au si sekesekei nau rini.
Arini pu hiva vata sigitau si sekesekei nau pude ṉoṉovalau,
meke lopu makudo hatihati au rini pude raza au gua.
13 Ba guana tie nuliqu si rau, sapu lopu boka avavosae,
meke guana tie pokaqu si rau sapu lopu boka zama.
14 Uve, guana tie nuliqu si rau,
ke lopu boka olaṉa sina lopu avavosaequ.
15 Ba koa Goi Zihova mo si kalavarae si rau;
ke Baṉara, qua Tamasa, Agoi mo si kaqu harupau pa qua tinasuna.
16 Tepa atu si rau, mu lopu va malumi Goi sari na qua kana
pude eri nia sa qua tinasuna,
madi lopu qetu nia rini sa qua hinoqa.
17 Ura tata mate si rau,
meke koa ta sigiti doduru rane.
18 Helahelae ni rau sari na qua tinavete kaleadi;
meke pulepaho ni rau sari na qua sinea.
19 Ba ṉiṉira sarini pu kana hoboro nau;
meke sokudi sarini pu kukiti sea nau.
20 Sarini pu hobe nia kinaleana sa qua tinavete leana,
si kukiti nau rini sina tavete valeana si rau.
21 Ke Zihova, Mu lopu veko pani au;
Mu lopu koa va seu koa rau, ke qua Tamasa.
22 Tuturei mae toka nau,
ke Baṉara, qua Hinarupu!