47
Zihova sa Ṉati Baṉara Lavata
(Keke kinera tadi na tie pa butubutu Livae pa tutina e Kora)
Mi popohara ni limamia gamu doduru tinoni!
Mi kera velavela va ululae pa qinetuqetu koasa Tamasa.
Mani ta pamaṉae se Zihova, sa Tamasa Ululuna Hola,
na Baṉara Lavata si Asa,
ṉati hiniva nia Sa sa doduru kasia popoa.
Pa Nana tinokae si koa mataqara holani gita sari na votiki butubutu,
meke va boka gita Sa pude koa totoli ni si arini.
Vizata poni ni gita Sa sa nada popoa soti,
sa qinetuqetu tadigita na butubutu te Zekopi,
sapu tataru hola nia sa Tamasa.
 
Sipu korapa sage la pa Nana habohabotuana Baṉara se Zihova,
si iraṉa pa qinetuqetu sari na tinoni,
meke ivui rini sari na buki.
Mada kera vahesia sa Tamasa!
Mada kera vahesia!
Kera vahesia sa nada Baṉara!
Kera vahesia!
 
Ura Tamasa si na Baṉarana sa doduru kasia popoa.
Mada kera vahesia!
Habotu sa Tamasa pa Nana habohabotuana Baṉara madina,
meke totoli ni Sa sari na butubutu.
Sari doduru ṉati hiniva pa kasia popoa
si somana varigara koari na butubutu tanisa Tamasa te Ebarahami.
Ṉiṉira hola ni sa Tamasa sari doduru qeto minate varipera.
Asa sa Ṉati hiniva lavata,
ṉiṉira hola sa Nana tinolie!