92
Keke Kinera Vinahesi
(Keke kinera pude kera nia pa rane Sabati)
1 Kei Zihova, leana hola si pude zama leana atu koa Goi,
pude kera va lavata Igo, kei Tamasa pu Ululuna Hola.
2 Pude tozi vura nia sa Mua tataru nabuna doduru munumunu,
meke sapu kopu ni Goi sari na Mua vina tatara pa doduru boṉi.
3 Kaqu ta kerae koari na mike,
meke pa loberena sa hapu.
4 Kei Zihova, Agoi si va qetu au koari na Mua tinavete,
kera qetuqetu si rau koari na tinavete pa Limamu Goi.
5 Kei Zihova, nomadi hola sari na Mua tinavete,
meke lohidi hola sari na Mua binalabala!
6 Sa ginugua hie si lopu boka gilania rina tie duvili,
meke ari na tie pu lopu gilania sa Tamasa si lopu boka tumae nia,
7 sapu sari na tie kaleadi si gina kote toa valeana guana duduli,
meke sarini pu va kalekaleana si boka mamutu,
ba kote ta huarae beto taloa hokara si arini,
8 sina Agoi Zihova si koa na ṉati hiniva ninae rane.
9 Gilania gami sapu kaqu tava mate sari na Mua kana,
meke sari doduru tie kaleadi si kaqu tava kilasa.
10 Ba ele va ṉiṉira au Goi si rau, kekeṉoṉo na bulumakao kokoreo pinomona;
ele mana nau Goi si rau pa qinetuqetu.
11 Ele dogoroni mataqu rau sa vina kilasadi rina qua kana,
meke ele avosia rau sa kinabo tadi na tie kaleadi.
12 Sari na tie toṉoto si kaqu toa na vua valeana guana huda pamu,
meke kaqu toqolo guana huda sida pa Lebanoni.
13 Kaqu koa hola pa vetu hopena te Zihova si arini,
meke koa valeana pa Zelepade te Tamasa.
14 Pana ele koadi, ba vua valeana,
meke buma valeana na toqolo valeana doduru totoso.
15 Sa dia tinoa valeana si vata dogoro nia sapu toṉoto se Zihova,
meke loke sinea si ta dogoro koasa Tamasa sa qua Patu aqoroana.